بۇگىن الماتى قالاسى ماڭىنداعى شىمبۇلاق تاۋ شاڭعى كۋرورتىندا ءىىى حالىقارالىق تاۋ جانە سپورت فەستيۆالى باستالدى.
بيىل ءۇشىنشى رەت ءوتىپ وتىرعان فەستيۆالدىڭ ۇيىمداستىرۋشىلارى بۇل شارا الماتى قالاسىنىڭ قازاقستاننىڭ سپورتتىق استاناسى رەتىندە ءيميدجىن جاقسارتۋعا ىقپال ەتەدى دەپ وتىر.
ءۇش كۇنگە سوزىلاتىن فەستيۆال اياسىندا دەمالىس كۇندەرى تابيعي رەلەفتە سپورتتىق جارتاسقا ورمەلەۋ بويىنشا حالىقارالىق جارىستار وتەدى. ءبىر ەمەس, بىرنەشە اسۋدى باعىندىرعان ءداستۇرلى الپينيادا قاتىسۋشىلارى وسى رەتتە جاستار شىڭىنا كوتەرىلەدى (تەڭىز دەڭگەيىنەن 4147 مەتر بيىكتىكتە).
فەستيۆال قوناقتارى سونىمەن قاتار, ماۋنتين-بايك بويىنشا سايىس جانە ءتۇرلى تاۋ سپورتى ءىس-شارالارىن تاماشالايدى. فەستيۆال باعدارلاماسىنا دەنساۋلىق كۇنى دە ەنگىزىلدى. ياعني سەنبى كۇنى فەستيۆالگە الماتىداعى ەڭ تانىمال فيتنەس-كلۋبتاردىڭ كوماندالارى دا قاتىسادى. فەستيۆال كەزىندە ارقانجولمەن شىمبۇلاققا بارىپ-قايتۋ جول اقىسى بار بولعانى 500 تەڭگەنى قۇرايدى.
فەستيۆال اياسىنداعى تاعى ءبىر ايتۋلى وقيعا «الماتىداعى تاۋ ءتۋريزمىن جانە بۇقارالىق سپورتتى دامىتۋ تەتىكتەرى: بۇگىن جانە ەرتەڭ» اتتى ءداستۇرلى «Almaty Mount Forum» حالىقارالىق فورۋمى. اتالمىش ءىس-شارا بارىسىندا وسى سالانىڭ جەتەكشى ساراپشىلارى تاۋ ءتۋريزمىنىڭ الەمدىك نارىعىن جانە ونىڭ الماتىداعى الار ورنىن, تۋريزم يندۋسترياسىنىڭ قالا ەكونوميكاسىن دامىتۋداعى ءرولى, سونداي-اق, الەم جانە قازاقستانداعى تاۋ تۋريزم ينفراقۇرىلىمىن جانداندىرۋعا قاتىستى ماسەلەلەردى تالقىلادى.
بۇگىن ارنايى شاقىرىلعان قوناق, فرانتسياداعى Les Portes du Mont Blanc تاۋ شاڭعى كۋرورتىنىڭ باسشىسى لۋكاس مارشاند ءوز تاجىريبەسىمەن ءبولىستى.
الماتىعا ارنايى كەلگەن تانىمال شۆەد ساياحاتشىسى يوحان نيلسون دا تاۋ ءتۋريزمىن ناسيحاتتاۋدىڭ, ومىرلىك ۇستانىمدارى, اتاقتى ادامداردى تارتۋ تاجىريبەسى تۋراسىندا مىسالداردى قىزىقتى باياندادى. جيھانكەز 140 مەملەكەتتە 30-دان استام ەكسپەديتسيانى باستان وتكەرگەن, سونىڭ ىشىندە وڭتۇستىك پوليۋستەن سولتۇستىك پوليۋسكە 18 ايعا سوزىلعان ەكسپەديتسيا دا بار. وسى ساياحاتتىڭ قۇرامىندا بولعانى ءۇشىن يوحان نيلسون 2015 جىلى گيننەس رەكوردتار كىتابىنا ەندى. قازىرگى تاڭدا تانىمال ساياحاتشى حالىقارالىق تابيعاتتى قورعاۋ جانە جاڭادان قۇرىلعان Snow Leopard Foundation قورلارىنىڭ ەلشىسى بولىپ تابىلادى.
حالىقارالىق تاۋ جانە سپورت فەستيۆالى قازاقستاندىق ەسترادا جۇلدىزدارى قاتىسۋىمەن وتەتىن مەرەكەلىك كونتسەرتتەن كەيىنگى سالتاناتتى جابىلۋ راسىمىمەن ءتامامدالدى. ۇيىمداستىرۋشىلار فەستيۆالدىڭ ءوتۋى الماتى قالاسىنىڭ اكىمدىگى جۇزەگە اسىراتىن بارلىق الەۋمەتتىك جوبالاردىڭ بىرىگۋىن جانە ءوزارا ارەكەتتەسۋىن قامتاماسىز ەتەدى دەپ ۇمىتتەنەدى.
ايناش ەسالي,
«ەگەمەن قازاقستان»
الماتى