ۇستىمىزدەگى جىلعى قىركۇيەك ايىندا ءوتۋى جوسپارلانعان تۇركىتىلدەس مەملەكەتتەر ىنتىماقتاستىعى كەڭەسىنىڭ (تمىك) 6-شى سامميتىنە دايىندىق جۇمىستارى اياسىندا قازاقستان سىرتقى ىستەر ءمينيسترى قايرات ءابدىراحمانوۆ تۇركىتىلدەس مەملەكەتتەردىڭ پارلامەنتتىك اسسامبلەياسىنىڭ (تۇركپا) باس حاتشىسى التىنبەك مامايۋسۋپوۆپەن جانە حالىقارالىق تۇركى اكادەمياسىنىڭ پرەزيدەنتى دارحان قىدىرالىمەن كەزدەسۋ وتكىزدى.
«قازاقستان پرەزيدەنتى نۇرسۇلتان نازارباەۆ دامۋدىڭ جاڭا كەزەڭىنە شىققان تۇركىتىلدەس ىنتىماقتاستىق ماسەلەلەرىنە ەرەكشە ءمان بەرەدى. تۇركپا – تۇركىتىلدەس ەلدەر ينتەگراتسياسىنىڭ نەگىزى بولىپ تابىلادى جانە سوڭعى جىلدارى تۇركىتىلدەس ەلدەردىڭ پارلامەنتارالىق ديپلوماتياسىنىڭ حالىقارالىق دەڭگەيدە تانىلعان ينستيتۋتى بولدى», – دەدى كەزدەسۋ بارىسىندا ق.ءابدىراحمانوۆ. ءمينيستردىڭ ايتۋى بويىنشا, بۇۇ, ەۋروپا كەڭەسى پارلامەنتتىك اسسامبلەياسى, ەقىۇ پارلامەنتتىك اسسامبلەياسى سياقتى حالىقارالىق ۇيىمدارمەن تۇركپا ىنتىماقتاستىق ورناتۋى قاجەت.
ا.مامايۋسۋپوۆ تۇركپا-نىڭ جۇمىسى جايلى جانە ۇيىمنىڭ 10 جىلدىعىن اتاپ ءوتۋ جوسپارى تۋرالى حابارلادى. اتاپ ايتقاندا, تۇركپا باسشىسى ۇستىمىزدەگى جىلدىڭ كۇزىندە تۇركيادا وتەتىن اسسامبلەيانىڭ كەلەسى مەرەيتويلىق پلەنارلىق سەسسياسىنا دايىندىق ءىس-شارالارى جۇرگىزىلىپ جاتقانى تۋرالى مالىمدەدى. «تۇركى ينتەگراتسياسىن ىلگەرىلەتۋگە ىقپال ەتۋ ماقساتىندا ۇيىمنىڭ حاتشىلىعى تۇركپا-عا مۇشە ەلدەردىڭ زاڭنامالارىن ءبىر قالىپقا كەلتىرۋ بويىنشا بەلسەندى تۇردە جۇمىس اتقارۋدا. قازاقستان – ءبىزدىڭ حالىقتارىمىزدى جاقىنداستىرۋ يدەياسىن ناسيحاتتاۋدىڭ باستاماشىسى جانە وسى تۇرعىدا استانا تۇركى الەمىنىڭ ماقتانىشى ەكەنى ايقىن», – دەدى تۇركپا-نىڭ باس حاتشىسى.
حالىقارالىق تۇركى اكادەمياسىنىڭ پرەزيدەنتىمەن كەزدەسۋ بارىسىندا تۇركىتانۋ جانە جالپى تۇركى تاريحىنداعى زەرتتەۋلەردى ودان ءارى كەڭەيتۋ ماسەلەلەرى تالقىلاندى.
د.قىدىرالى سىرتقى ىستەر مينيسترلىگىنە اكادەميانىڭ قالىپتاسۋ پروتسەسىندە زور قولداۋ كورسەتىپ وتىرعانى ءۇشىن العىسىن بىلدىرە وتىرىپ, ينستيتۋت تمىك 6-شى ءسامميتىن وتكىزۋگە لايىقتى ۇلەسىن قوسۋعا جانە عىلىمي-زەرتتەۋ سالاسىندا تۇركىتىلدەس مەملەكەتتەر اراسىنداعى ىنتىماقتاستىقتى دامىتۋدى جالعاستىرۋعا دايىن ەكەندىگىن ءبىلدىردى.
«ەگەمەن-اقپارات»