قازاقستان ۇلتتىق وليمپيادالىق كوميتەتىنىڭ پرەزيدەنتى تيمۋر ق ۇلىباەۆ مەزگىلسىز دۇنيەدەن وتكەن دەنيس تەننىڭ اتا-اناسى وكسانا الەكسەەۆنا مەن يۋري الەكساندروۆيچكە كوڭىل ايتۋ جەدەلحاتىن جولدادى.
ء«وز اتىمنان جانە قازاقستان ۇلتتىق وليمپيادالىق كوميتەتىنىڭ, سونداي-اق, ەلىمىزدەگى بارلىق سپورت قوعامىنىڭ اتىنان ۇلدارىڭىز دەنيس تەننىڭ مەزگىلسىز دۇنيەدەن وتۋىنە بايلانىستى قايعىرا كوڭىل ايتامىن. بۇگىن جاس سپورتشىنى تانيتىن, ونىڭ شىعارماشىلىعىن باعالاپ, تالانتىمەن ماقتاناتىن بارشا قاۋىم ءۇشىن قارالى كۇن. ءوزىنىڭ سپورتتىق عۇمىرىندا دەنيس قايتپاس رۋحىمەن, قايسارلىعىمەن, چەمپيوندىق مىنەزىمەن كوزگە ءتۇستى. ول جاس بولعانىنا قاراماستان, وتاندىق مانەرلەپ سىرعاناۋ سپورتىنىڭ ۇشار باسىندا تۇردى. بۇگىن قازاقستان سپورتى داڭقتى چەمپيوندى جوعالتىپ الدى. ءبىز سىزدەرمەن بىرگە قايعىرامىز. دەنيس تەننىڭ جارقىن بەينەسى ءبىزدىڭ جۇرەگىمىزدە ماڭگى ساقتالادى», - دەلىنگەن كوڭىل ايتۋ حاتىندا.