بۇگىن ۇكىمەت ۇيىندە قر پرەمەر-ءمينيسترى باقىتجان ساعىنتاەۆتىڭ توراعالىعىمەن «بايتەرەك» ۇلتتىق باسقارۋشى حولدينگى» اكتسيونەرلىك قوعامىنىڭ ديرەكتورلار كەڭەسىنىڭ كەزەكتى وتىرىسى ءوتتى, دەپ حابارلايدى primeminister.kz.
وتىرىس بارىسىندا حولدينگتىڭ 2017 جىلعا ارنالعان جىلدىق ەسەبى بەكىتىلدى, ول قازاقستان رەسپۋبليكاسىنىڭ مەملەكەتتىك جانە ۇكىمەتتىك باعدارلامالارىن ىسكە اسىرۋ, قارجىلىق ناتيجەلەر, حولدينگتىڭ ەسەپتى كەزەڭدەگى ماڭىزدى وقيعالارى جانە ونىڭ ەنشىلەس ۇيىمدارىنىڭ قىزمەتى تۋرالى اقپاراتتان تۇرادى.
«بايتەرەك» ۇبح قر پرەزيدەنتىنىڭ جارلىعىمەن 2013 جىلى دامۋ ينستيتۋتتارىن, قارجى ۇيىمدارىن باسقارۋ جانە ۇلتتىق ەكونوميكانى دامىتۋ جۇيەسىن وڭتايلاندىرۋ ماقساتىندا قۇرىلدى. حولدينگ 11 ەنشىلەس ۇيىمدى بىرىكتىردى.
سونىمەن قاتار, ديرەكتورلار كەڭەسى «قازاقستاننىڭ دامۋ بانكى» اكتسيونەرلىك قوعامىمەن 2015–2019 جىلدارعا ارنالعان قازاقستان رەسپۋبليكاسىنىڭ يندۋستريالدى-يننوۆاتسيالىق دامۋ مەملەكەتتىك باعدارلاماسىنىڭ جوبالارىن قارجىلاندىرۋعا ارنالعان بيۋدجەتتىك نەسيەلەر الۋعا, سونداي-اق وتاندىق وندىرۋشىلەردى قولداۋ اياسىندا اۆتوبۋستار, تراكتورلار مەن كومباينداردىڭ ليزينگىن ىسكە اسىرۋ ماقساتىندا مامىلە جاساسۋدى ماقۇلدادى.
بۇدان وزگە, ديرەكتورلار كەڭەسى حولدينگتىڭ دامۋ جوسپارىن ورىنداۋ جانە 2017 جىلدىڭ قورىتىندىسى بويىنشا جىلدىق بيۋدجەتتىڭ اتقارىلۋى تۋرالى ەسەپتەرىن ماقۇلدادى.