بەسىك ىزدەپ ءجۇرمىن

ءبىزدىڭ ۇيدەگى سەگىز بالا تۇگەل جاتقان. اعالارىمنىڭ بالالارى دا, اپالارىمنىڭ ياعني, جيەندەر دە وسى بەسىكتە جاتقان. قىر ارقاسىنداعى تالدان جاسالعان كولدەنەڭ اعاش انالاردىڭ بەسىكتى تەربەتكەن ايالى الاقانىنان جىپ-جىلتىر بولىپ تۇراتىن. قازىرگى دۇنيە­دەگى ەڭ ساپالى لاك تا مۇنداي جىلتىراتا الماس. الاقان تابىنان الدەبىر جىلىلىق ەسەتىن.

قۇس توسەگى, ادەمىشە جاستىعى, سان ءسابي­دىڭ ءيىسى سىڭگەن جورگەگى, باياعىدا اپام جاساعان ادەمى پ ۇلىشتەن تىگىلگەن قولباۋ, ورنەكتەلگەن تىزە باۋى, جۇمساق ماتالاردان قاباتتاپ جاسالعان تىزە جاستىعى, بەسىكپەن بىرگە جاساسىپ كەلە جاتقان جىپ-جىلى كورپەسى بۇگىنگىدەي كوز الدىمدا. 

انەبىر تۇستا بەسىكتى «ەسكىلىكتىڭ قالدىعى» دەپ كۇستانالايتىندار بولعان. ءتىپتى, سول كەڭەستىك داۋىردە مەديتسينا ينس­تيتۋتىنىڭ وقىتۋشىلارى بەسىكتىڭ زيانى تۋرالى لەكتسيا دا وقىپتى. تۇتاس قانشاما ۇرپاق ءوسىپ-جەتىلگەن بەسىك بۇگىندە كەرەكسىز بولىپ قالدى. ال بەسىكتىڭ پايداسى تۋرالى كول-كوسىر اڭگىمە ايتۋعا بولار ەدى. وندا جاتقان بالانىڭ تازالىعى, دەنەسىنىڭ جايلى بولۋى, سىز دارىمايتىندىعى عاجاپ ەمەس پە. بەسىك ءبىر قالىپتى جايلى تەربەتىلەدى. وندا جاتقان ءسابيدىڭ دە جۇيكەسى الديلەگەن بەسىكتىڭ ىرعاعىمەن ءبىر قالىپتى جايلى بولىپ قالىپتاسادى.

اپام مارقۇم ەلدەگى كوزىنىڭ سۇعى بار دەيتىن بىرەۋلەر كەلە جاتسا, بەسىكتىڭ ارقاسىنداعى كورپەمەن جابا سالاتىن. دەمەك, بەسىكتىڭ كولدەنەڭ كوزدىڭ سۇعىنان, بەيتاراپ تىلدەن قورعايتىن قاسيەتى بار. حالقىمىزدىڭ ءبىرتۋار پەرزەنتى باۋىرجان مومىش ۇلى: «جاۋدان دا, داۋدان دا قورىقپاعان قازاق ەدىم, ەندى قورقىنىشىم كوبەيىپ ءجۇر. بالالارىن بەسىككە بولەمەگەن, بەسىگى جوق ەلدەن قورقامىن, ەكىنشىسى – نەمەرەسىنە ەرتەگى ايتىپ بەرەتىن اجەنىڭ ازايۋىنان قورقامىن. ءۇشىنشىسى – ءدامدى, ءداستۇردى سىيلامايتىن بالالار ءوسىپ كەلەدى, ونىڭ قولىنا قىلىش بەرسە, كىمدى بولسىن شاۋىپ تاس­تاۋعا دايار. قو­لىنا كىتاپ المايدى. ۇيرەنىپ جاتقان بالا جوق, ۇيرەتىپ جاتقان اجە جوق» دەسە كەرەك.

كەشە كوك­شە­تاۋ قالا­سىن­­­دا­عى بازار­دى, ۇلت­تىق بۇيىم­دار سا­تادى-اۋ دەگەن دۇ­كەن­­دەردى شولىپ شىقتىم. تابا المادىم. ءسىز كورمە­دىڭىز بە؟ 

بايقال ءبايادىل,

«ەگەمەن قازاقستان»

كوكشەتاۋ