بۇگىن ۇكىمەت وتىرىسىندا اقپارات جانە كوممۋنيكاتسيالار ءمينيسترى داۋرەن اباەۆ Smart city جوباسىن جۇزەگە اسىرۋ بويىنشا ەسەپ بەردى.
ءمينيستردىڭ ايتۋىنشا, بارلىق 16 ءوڭىردىڭ اكىمدىكتەرىندە تسيفرلاندىرۋ كەڭسەلەرى قۇرىلىپ, وعان اكىم ورىنباسارلارى جەتەكشىلىككە تاعايىندالعان. جەرگىلىكتى اتقارۋشى ورگاندار ىسكە اسىراتىن جوبالاردى ۇيلەستىرۋ پروتسەسىن مينيسترلىك جانە «زەردە» حولدينگى نەگىزىندە قۇرىلعان تسيفرلاندىرۋدىڭ ورتالىق شتابى باسقارادى. ارنايى قۇرىلعان تسيفرلاندىرۋ شتابى جوبالاردى ۇيلەستىرۋمەن اينالىسادى جانە اپتا سايىن Smart city جوباسىنا مونيتورينگ جۇرگىزىلىپ وتىرادى.
«قازىردىڭ وزىندە مەديتسينالىق, اقپاراتتىق جۇيەلەر, ەلەكتروندى كۇندەلىكتەر نەمەسە مەكتەپكە دەيىنگى بالالار مەكەمەلەرىنە كەزەككە قويۋ جۇيەلەرى بارلىق ايماقتاردا ەنگىزىلدى. پاۆلودار وبلىسىنىڭ ءبىلىم بەرۋ سالاسىندا ونلاين جۋرنال مەن كۇندەلىكتەردى ىسكە قوسۋ ارقىلى وقۋشىلاردىڭ وقۋ ۇلگەرىمى 3 پروتسەنتكە ءوستى. شىعىس قازاقستان وبلىسىندا اۋدان ورتالىقتارىنان تىس ورنالاسقان 67 دارىگەرلىك امبۋلاتوريالاردى جانە فەلدشەرلىك-اكۋشەرلىك ورىنداردى ينتەرنەت جەلىسىنە قوسۋ ارقىلى حالىققا مەملەكەتتىك قىزمەت كورسەتۋدىڭ ۇلەسى 93 پروتسەنتكە ارتتى», - دەپ اتاپ ءوتتى داۋرەن اباەۆ ۇكىمەتتىڭ كەزەكتى وتىرىسىندا.
باتىس قازاقستان وبلىسىندا العاشقى مەديتسينالىق كومەك كورسەتۋگە كەتەتىن ۋاقىت قىسقاردى. اتاپ ايتقاندا, جەدەل جاردەمدى باسقارۋ جۇيەلەرى ەنگىزىلدى.
ال سمارت تەحنولوگيالاردى ەنگىزۋ اياسىندا استانا كوشە جارىعىنا قىزمەت كورسەتۋ شىعىندارىن 30 پروتسەنتكە دەيىن, ەنەرگيا قورلارىن - 60 پروتسەنتكە دەيىن تومەندەتكەن. جۇيەنىڭ ءوزى ەلەكتر ەنەرگياسىن قاجەتتىلىگىنە بايلانىستى اۆتوماتتى تۇردە بەرىلۋىن رەتتەيدى.
شىمكەنت قالاسىندا جول-كولىك وقيعالارىن, فوتو-بەينە ءتۇسىرۋ جۇيەسىن ەنگىزۋ ارقىلى جول ءجۇرۋ ەرەجەلەرىن بۇزۋ جاعدايلارى 17 پروتسەنتكە ازايعان. ال الماتى وبلىسىنداعى قورعاس بەكەتىندە ادامنىڭ كەلبەتىن تانۋ جۇيەسىنە العاش سىناق جۇرگىزگەندە, ىزدەۋ شارالارىنا جۇمسالاتىن ۋاقىت 15 پروتسەنتكە دەيىن ازايادى دەپ بولجانعان.
«وڭىرلەردىڭ بارلىعى اقىلدى قالا جاساۋعا نەگىز بولاتىن سەرۆيستەردى جاساۋدا كەڭ اۋقىمدى جۇمىس جاساپ جاتىر. مەكتەپتەردىڭ 87 پروتسەنتىنە ينتەرنەت قولجەتىمدى. قالا مەن اۋىل وقۋشىلارى اراسىنداعى ءبىلىم الشاقتىعى شامامەن 30 پروتسەنتكە تومەندەدى. مەملەكەتتىك قىزمەتتەر وڭتايلاندىرىلدى جانە اۆتوماتتاندىرىلدى. ەلەكتروندى مەديتسينالىق كارتانى قولدانۋ جانە قاعاز نۇسقاسىنان باس تارتۋ اياسىندا مەديتسينالىق كارتالاردى جوعالتۋ فاكتورى تولىق جويىلدى», - دەپ ءوز ءسوزىن تولىقتىردى داۋرەن اباەۆ.