شىلدەنىڭ كۇنى جاۋىنمەن باستالدى. سول كۇنى جارىقتىق ىسىپ باستالدى دا ءتۇس اۋا تاۋدان اقشا بۇلت كورىنىپ, عايىپتان اۋا رايى وزگەرىپ شىعا كەلدى. اشىق اسپاندى الدىمەن اقشا بۇلت جاپتى. شىلدەنىڭ العاشقى كۇنى كۇن كۇركىرەدى. اۋا رايى دا وزگەرىپ سالا بەردى.
كيىكوتى – بيىكتىگى 70 سانتيمەترگە جەتەتىن كوپجىلدىق شوپتەكتەس وسىمدىك. تىك ءارى تۇكتى, ۇزىنشا ءتورت قىرلى, ساباقتارى قىزعىلت, كوپ بۇتاقتى. جاپىراقتارى قاراما-قارسى ورنالاسقان. ساعاقتارى ۇزىن جۇمىرتقا ءتارىزدى سوپاقشا كەلەدى, جيەكتەرى ءبۇتىن ءبىر سۋرەت دەرسىز. جوعارعى جاعىنان قاراعاندا, جاپىراقتارى جاسىل ءتۇستى, ەكى جاعىنان دا كىشكەنە قارا نۇكتەلەرى بار اسپەتتى كەيپى ەلەستەيدى. گۇلدەرى مايدا, سىپىرعىش تارىزدەنىپ جيىلعان, قىزعىلت كۇلگىن ءتۇستى. مامىر ايىنان باستاپ, تامىز ايى ارالىعىندا گۇلدەيدى. ونىڭ جەر بەتىندەگى بولىگىن گۇلدەگەن كەزىندە جيناپ الادى. ءدۇريا دالانى بۇرقىراتىپ, ادەمى جۇپار يىسىمەن جان دۇنيەڭدى قىتىقتاپ, سەزىمىڭدى تەربەپ, وزگەشە اسەرمەن باۋراپ الادى. «كيىكوتى سيرەپ, تومەننەن ۇركىپ, تاۋعا شىعىپ كەتىپتى». تالانتتى جازۋشى اعامىز مارحابات بايعۇتوۆ «قورعانسىز جۇرەك» كىتابىنداعى «كيىكوتى» اڭگىمەسىندە كوڭىلىندەگى ادەمى سەزىمدى بەدەرلەپ جەتكىزەدى. «تومەننەن, ياعني ادامداردان ۇركىپ, تاۋ باسىنا ەرىكسىز شىعىپ كەتكەن اڭ دا, قۇس تا بار. مىسالى, ءبىزدىڭ رەسپۋبليكانىڭ سيمۆولى بولىپ جاريالانعان تەڭبىل بارىس. ارقارلار مەن تاۋتەكە, تاۋەشكىلەر. كيىگىمىز سول. قۇستان: ۇلار, كەكىلىك...
«ەندى جان-جانۋارلاردى قويىپ, وسىمدىك تە تاۋعا قاراي قاشاتىن بولىپتى. كيىكوتىنىڭ شيپالى قاسيەتىن ءبىلىپ العان كەلىمسەكتەر ونى باۋداي ءتۇسىرىپ, وتاپ جاتىر ەكەن», دەپ جازادى كەمەل جازۋشىمىز شەرحان اعامىز جۋىقتا «ەگەمەن قازاقستان» قۇراستىرعان ءبىر تومدىق «نامىس نايزاعايى» جيناعىندا. شىركىن قاراتاۋدىڭ ەتەگىندە بۇلكىلدەپ اققان بالىقشى بۇلاعىنىڭ باسىندا اڭقىلداي جەتكەن جالبىزدىڭ بۇرقىراپ مۇرىن جارعان اڭسار ءيىسى كەلەدى ەكەن. جانىمىزداعى جولسەرىك سەرىك نارىمبەتوۆ دەگەن ازاماتتان سۇراعانبىز:
– بۇل جەردە كيىكوتى وسە مە؟
– مىنا كوكتوبەنىڭ بەتكەيىندە كوپ, – دەگەن.
تاۋ باسىندا جۇرگەنىمىزدى سوندا بىلدىك. ءسال كوتەرىلگەنىمىز سول, ءيىسى بۇرقىراي كيىكوتى الدىمىزدان شىقتى. كوكتوبەدەن بۇلاق باسىنا تۇسەردە ءبىر تال كيىكوتىن ەستەلىككە الىپ, كۇندەلىك داپتەرىمىزدىڭ ءبىر بەتىنە سالىپ قويدىق. جارىقتىق, ءيىسى بۇرقىراپ, تاۋ باسىنان بىزبەن بىرگە كەلەدى.
كيىكوتىنىڭ گ ۇلى.
ساپارباي پارمانقۇل, «ەگەمەن قازاقستان»
تۇركىستان وبلىسى, سوزاق اۋدانى, سۋىندىق اسۋى