ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ايتىلعان مىندەتتەردى جۇزەگە اسىرۋ اياسىندا وتكەن جىلى وڭىردە م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆتىڭ باستاماسىمەن «اۋليەاتا ءوڭىرىنىڭ كيەلى گەوگرافياسى» اتتى عىلىمي-زەرتتەۋ جۇمىستارى باستالعان بولاتىن.
اتالعان باستاماعا بايلانىستى جۋىردا وقۋ ورداسىنىڭ باس عيماراتىنىڭ الدىنان «اۋليەاتا – كيەلى مەكەن-ءىى» اتتى عىلىمي ەكسپەديتسيا ءوڭىر اۋداندارىنا جول تارتتى.
ەكسپەديتسيا تاراز قالاسىندا جانە وزگە اۋدانداردا ءتورت باعىت بويىنشا زەردەلەۋ, زەرتتەۋ جۇمىستارىن جۇرگىزۋدى جوسپارلاپ وتىر. ءبىرىنشى باعىت تاراز قالاسىنداعى قاراحان كەسەنەسى, قالي ءجۇنىس مونشاسى, تورتكۇل كەرۋەن سارايى, قاراساي شاتقالى جانە تەكتۇرماس كەسەنەسى بولسا, ەكىنشى باعىتىندا جامبىل اۋدانى, ايشا ءبيبى اۋىلىنداعى ايشا ءبيبى, بابادجا حاتۋن كەسەنەسى, جۋالى اۋدانىنىڭ بەرىكقارا شاتقالى مەن عۇن-سارمات قورعانى, تالاس جانە سارىسۋ اۋداندارىنىڭ كيەلى جەرلەرى قامتىلعان. ال ءۇشىنشى باعىتى جەتىتوبە قورعانى, قۇلان كەنتى, مەركى قالاشىعى, اسپارا بەكىنىسى, سىپاتاي باتىر كەسەنەسى, مەركى, ت.رىسقۇلوۆ جانە قورداي اۋداندارىنداعى مادەني كەشەندەر بولسا, ءتورتىنشى باعىتى شۋ اۋدانىنداعى جايساڭ عيباداتحاناسى, بالاساعۇن قالاشىعى, حيام بەكىنىسى, جاڭاجول قونىسى جانە مويىنقۇم اۋدانىنىڭ سۇڭقارتاۋ مەن حانتاۋ كيەلى مەكەندەرى بولىپ سانالادى.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, تاريح عىلىمدارىنىڭ دوكتورى ايمان دوسىمباەۆا وتكەن جىلعى ەكسپەديتسيا بارىسىندا تاراز قالاسى مەن بىرقاتار اۋدانداردان ەسكى مەشىت, كونە مونشالاردىڭ تابىلعانىن, قاراتاۋ جوتالارى مەن جۋالى اۋدانىنىڭ بەرىكقارا شاتقالى تاريحي قۇندىلىققا تولى ەكەنىن ايتا كەلىپ, بيىلعى جىلى دا بۇل جۇمىستىڭ ءساتتى جالعاساتىنىنا سەنىم ءبىلدىردى.
حاميت ەسامان,
«ەگەمەن قازاقستان»
جامبىل وبلىسى