تاۋەلسىزدىكتىڭ 18-جىلى ەلىمىز ءۇشىن وڭاي بولعان جوق. وتكەن جىلدارداعى قارجىلىق داعدارىستان كەيىن ەل ەكونوميكاسىن ساۋىقتىرۋعا 14 ملرد اقش دوللارى جۇمسالدى. سوعان قاراماستان, ەلىمىزدىڭ التىن-ۆاليۋتا قورى جىلدىڭ سوڭىندا 52 ملرد اقش دوللارىنا جەتتى. «جول كارتاسىن» جۇزەگە اسىرۋعا رەسپۋبليكالىق جانە جەرگىلىكتى بيۋدجەتتەردەن 191,5 ملرد تەڭگە ءبولىنىپ, جۇمىسسىزدىق دەڭگەيى 6,3 پايىزعا ازايدى. وسى جىلى مينسك قالاسىندا بەلارۋس, قازاقستان جانە رەسەي مەملەكەتتەرى باسشىلارى ءۇش ەلدىڭ اراسىندا كەدەن وداعىن قۇرۋ تۋرالى قۇجاتقا قول قويدى.
7 قاڭتار – استانا قالاسىندا ايات, سايات جانە جانات ەسىمدى ۇشەم دۇنيەگە كەلدى. قۋانىشتى حاباردى ەستىگەن قالا اكىمى يمانعالي تاسماعامبەتوۆ بۇل وتباسىنا قالانىڭ قاق ورتاسىنان ءۇش بولمەلى پاتەردىڭ كىلتىن تابىستادى.
25 اقپان – ەكىنشى ۇلتتىق حالىق ساناعى باستالدى. بۇعان رەسپۋبليكا بويىنشا ءبىر ۋاقىتتا 50 مىڭعا جۋىق ساناقشى تارتىلدى. حالىق ساناعىنىڭ قورىتىندىسى بويىنشا 1999 جىلعى ساناقپەن سالىستىرعاندا حالىق سانىنىڭ ءوسىمى 6,8 پايىزدى قۇراپ, جالپى تۇرعىندارى سانى 16196,8 مىڭ ادامعا جەتتى. ولاردىڭ ىشىندە: قازاقتار ۇلەسى – 63,6, ورىستار – 23,3, وزبەكتەر – 2,9, ۋكرايندار – 2,0, ۇيعىرلار – 1,4, تاتارلار – 1,2, نەمىستەر 1,1 پايىز بولدى.
6 ءساۋىر – پرەزيدەنت ن.نازارباەۆ استاناعا رەسمي ساپارمەن كەلگەن يران يسلام رەسپۋبليكاسىنىڭ باسشىسى ماحمۇد احمادينەجادپەن كەزدەستى.
28 ءساۋىر – الماتىدا پرەزيدەنت نۇرسۇلتان نازارباەۆتىڭ توراعالىق ەتۋىمەن حالىقارالىق ارالدى قۇتقارۋ قورىنىڭ (حاقق) قۇرىلتايشى مەملەكەتتەر باسشىلارىنىڭ ءسامميتى بولىپ ءوتتى.
13 مامىر – ەلباسى ن.نازارباەۆ ەلىمىزگە رەسمي ساپارمەن كەلگەن كورەيا رەسپۋبليكاسىنىڭ پرەزيدەنتى لي مەن باكپەن كەزدەسىپ, ەكى ەل اراسىنداعى ىنتىماقتاستىقتى تەرەڭدەتۋ جونىندەگى ءىس-قيمىل جوسپارى مەن «بالقاش» جىلۋ ەلەكتر ستانساسى جوباسى بويىنشا كەلىسىمگە قول قويدى.
15 مامىر – استاناداعى تاۋەلسىزدىك سارايىندا «نۇر وتان» حالىقتىق دەموكراتيالىق پارتياسىنىڭ ءحىى سەزى ءوتتى. سەزدە ەل پرەزيدەنتى, پارتيا توراعاسى نۇرسۇلتان نازارباەۆ ءسوز سويلەدى.
16 ماۋسىم – ەلباسى نۇرسۇلتان نازارباەۆ ەكاتەرينبۋرگ قالاسىندا وتكەن شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسىنا قاتىستى.
1 شىلدە – استاناداعى بەيبىتشىلىك جانە كەلىسىم سارايىندا الەمدىك جانە ءداستۇرلى دىندەر ليدەرلەرىنىڭ ءىىى سەزى باستالدى. وعان دۇنيەجۇزىنىڭ 35 ەلىنەن 77 وكىل قاتىستى.
3 شىلدە – استانا قالاسىنىڭ ىرگەسىندە ورىن تەپكەن يندۋستريالىق پارك اۋماعىندا لوكوموتيۆ قۇراستىرۋ زاۋىتى پايدالانۋعا بەرىلىپ, ونىڭ سالتاناتتى اشىلۋىنا مەملەكەت باسشىسى نۇرسۇلتان نازارباەۆ قاتىستى.
29 تامىز – ن.نازارباەۆ سەمەي يادرولىق پوليگونى جابىلعان 29 تامىزدى دۇنيەجۇزىلىك يادرولىق قارۋدى سىناۋعا قارسى ءىس-قيمىل كۇنى دەپ جاريالاۋ تۋرالى ۇسىنىس جاسادى. بۇل يدەيانى الەمنىڭ جەتەكشى مەملەكەتتەرى قولداپ, بۇۇ باس اسسامبلەياسى قارارىمەن ماقۇلداندى.
30 تامىز – قازاقستان كونستيتۋتسياسى كۇنىنە وراي ەلوردادا العاش رەت اسكەري شەرۋ وتكىزىلدى. وندا ەلباسى – جوعارعى باس قولباسشى ن.نازارباەۆ اسكەري شەرۋدى قابىلدادى.
12 قاراشا – استانا قالاسىندا ەلباسى نۇرسۇلتان نازارباەۆ ەقىۇ-نىڭ باس حاتشىسى مارك پەررەن دە بريشامبومەن كەزدەستى. ەقىۇ-نىڭ باس حاتشىسى ەلىمىزدىڭ الداعى جىلى ەقىۇ-عا توراعالىق ەتۋى اتالمىش ۇيىمدى دامىتۋعا ۇلكەن سەپتىگىن تيگىزەتىنىن مالىمدەدى.
13 قاراشا – پرەزيدەنت ن.نازارباەۆ تىكەلەي جەلى ارقىلى قازاقستاندىقتارمەن سۇحبات جاسادى. وندا ەلباسى جىلدىڭ نەگىزگى ناتيجەلەرىن قورىتىندىلاپ, ازاماتتاردىڭ ەڭ وزەكتى سۇراقتارىنا جاۋاپ بەردى. تىكەلەي جەلىگە 45 مىڭنان استام سۇراق ءتۇستى.
12 جەلتوقسان – استانادا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ جانە قحر توراعاسى حۋ تسزينتاونىڭ قاتىسۋىمەن «تۇرىكمەنستان – وزبەكستان – قازاقستان – قىتاي» گاز قۇبىرىنىڭ قازاقستاندىق ۋچاسكەسىن پايدالانۋعا بەرۋ ءراسىمى ءوتتى.
15 جەلتوقسان – استانا قالاسىندا تاۋەلسىزدىكتىڭ 18 جىلدىعىنا وراي سالتاناتتى جيىن ءوتتى. وندا ءسوز سويلەگەن مەملەكەت باسشىسى ن. نازارباەۆ, ءبىز جاڭا قازاقستاندى – ارمانىمىز بەن ۇمىتىمىزدەگى مەملەكەتتى جاساي وتىرىپ, ءوز جوسپارلارىمىزدى جۇزەگە اسىرىپ كەلەمىز. قازاق حالقى عاسىرلار بويىنداعى تاريحىندا قازىرگىدەي دەڭگەيدە الەم قوعامداستىعىنىڭ نازارىن وزىنە اۋدارىپ كورگەن ەمەس. ءبىزدىڭ اسقان يگى جەتىستىگىمىزدىڭ ءوزى وسىندا دەدى.
دايىنداعان
بەكەن قايرات ۇلى,
«ەگەمەن قازاقستان»