پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ مۇشەلەرى قازاقستان پرەزيدەنتىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا بەلگىلەنگەن مىندەتتەردى ىسكە اسىرۋ اياسىندا لاتىن الىپبيىنە كوشۋ جانە قازاق تىلىندەگى تەرمينولوگيانى جەتىلدىرۋ ماسەلەلەرى بويىنشا مادەنيەت جانە سپورت مينيسترلىگىنىڭ باسشىلىعىمەن كەزدەستى, دەپ حابارلادى پالاتانىڭ ءباسپاسوز قىزمەتى,
شارانى اشقان كوميتەت توراعاسى بىرعانىم ءايتىموۆا ەلباسىنىڭ «قازاقستان-2050» ستراتەگياسى مەن «بولاشاققا باعدار: رۋحاني جاڭعىرۋ» ماقالاسىندا 2025 جىلدان باستاپ لاتىن الىپبيىنە كوشۋ تۋرالى ايتقانىن ەسكە سالىپ, ءىس قاعازدارى, مەرزىمدى ءباسپاسوز, وقۋلىقتار لاتىن الىپبيىمەن باسىلىپ شىعا باستاۋى ءتيىس ەكەنىن اتاپ ءوتتى.
كەزدەسۋدە ءسوز العان مادەنيەت جانە سپورت ءمينيسترى ارىستانبەك مۇحامەدي ۇلى قازىرگى كەزەڭدە ورفوگرافيالىق جۇمىس توبىنىڭ بىرنەشە وتىرىسى وتكەنى جانە جاڭا ءالىپبيدىڭ ەملە ەرەجەلەرىنىڭ تۇجىرىمداماسى دايىندالعانى تۋرالى حاباردار ەتتى. قىركۇيەك ايىندا ەملە ەرەجەسىنىڭ جوباسى ماماندارعا, بارلىق وقۋ ورىندارىنا جانە ءتيىستى مەكەمەلەرگە جىبەرىلىپ, تانىستىرىلاتىن بولادى. ولاردان كەلگەن ۇسىنىستار ەسكەرىلىپ, جىلدىڭ سوڭىنا دەيىن ونى بەكىتۋ جوسپارلانعان. ادىستەمەلىك جۇمىس توبى وسى ەملە ەرەجەلەرىن وقۋ ورىندارىندا جانە تاعى دا باسقا مەكەمەلەردە اپروباتسيادان وتكىزىپ, ساراپتامالىق جۇمىس توبى ونىڭ تەحنيكالىق جوبالارى ازىرلەنەدى. تەرمينولوگيالىق جۇمىس توبى ءوز وتىرىستارىندا جاڭا الىپبيگە كوشكەن كەزدە تەرميندەردى قالىپتاستىرۋ ءىسى جۇزەگە اسىپ جاتقانى ايتىلدى.
مينيسترلىكتىڭ الداعى مىندەتى – ۇكىمەت تاراپىنان بەكىتىلگەن 2025 جىلعا دەيىنگى لاتىن گرافيكاسىنا كەزەڭ-كەزەڭىمەن كوشۋ جوسپارىنا سايكەس ساپالى جۇمىس اتقارۋ بولىپ تابىلادى. قازىرگە دەيىن 21 مىڭ تەرمين بەكىتىلسە, ونىڭ 40,8 پروتسەنتى (8571 تەرمين) – ءتول تەرميندەر, ال 59,2 پروتسەنتى (12429 تەرمين) كىرمە جانە ارالاس تەرميندەردى قۇراپ وتىر. وسى تەرميندەرگە جاسالۋ جانە اۋدارۋ تۇرعىسىنان تولىق لينگۆيستيكالىق ساراپتاما جاسالۋدا.
كەزدەسۋدە «ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى» اق اتقارۋشى ديرەكتورى ەربول تىلەشوۆ لاتىن ارپىنە كوشە ماسەلەسى بويىنشا اتقارىلىپ جاتقان جۇمىستارى تۋرالى باياندادى.
ماسالەنى تالقىلاۋعا سەناتور م.باقتيار ۇلى, د.نوكەتاەۆا, ب.جۇماعۇلوۆ, س.ەرشوۆ جانە ءماجىلىس دەپۋتاتى ب.سماعۇل, سونداي-اق عالىمدار مەن ساراپشىلار قاتىستى.
كەزدەسۋ قورىتىندىسى بويىنشا ازىرلەنگەن ۇسىنىستاردى ۇكىمەتكە جانە باسقا دا مۇددەلى مەملەكەتتىك ورگاندارعا جىبەرۋ تۋرالى شەشىم قابىلداندى.