سابانتوي تاتار حالقىنىڭ ەگىن بىتىك شىقسىن دەگەن تىلەكپەن جاسايتىن كوكتەم مەرەكەسى. سەمەيدەگى ەرتىس جاعالاۋىندا شىعىس قازاقستان وبلىستىق تاتار قوعامدىق ورتالىعىنىڭ ءتورايىمى, تاتارستاننىڭ ەڭبەك سىڭىرگەن قايراتكەرى, كاميليا يسمايلوۆانىڭ جەتەكشىلىگىمەن تاتار حالقىنىڭ ۇلتتىق مەرەكەسى كەڭ اۋقىمدا, وبلىستىق دەڭگەيدە اتاپ ءوتىلدى. اتاۋلى مەرەكەدە تاتار حالقىنىڭ ءان-جىرلارى شىرقالىپ, ۇلتتىق ويىندارىنان سايىس ءوتتى. تاتارستاننىڭ ەڭبەك سىڭىرگەن مادەنيەت قىزمەتكەرى, داڭقتى سپورتشى روم يلماتوۆتىڭ ايتۋىنشا «تاتارچا كۋراس» ويىنىنا قاتىسۋشىلاردىڭ سانىندا شەك بولمادى.
بەسقاراعاي اۋدانىنان ارنايى كەلگەن باشكولدىك تاتار اعايىندار ۇلتتىق تاعامدارىنان ءدام تاتىردى. بارلىعى جينالىپ, تاتار حالقىنىڭ تالانتتى ۇلى عابدوللا توقاي ەسكەرتكىشىنىڭ باسىنا گۇل شوقتارىن قويدى. ەلدى بەرەكەلى تىرلىككە باستايتىن شارانى دىنىنە بەرىك تاتار حالقىنىڭ ءداستۇرى بويىنشا يمام تىلەك ايتىپ باستادى.
شاراعا وبلىستىق ىشكى ساياسات باسقارماسىنىڭ باسشىسى نەللي كراسنوباەۆا, سەمەي قالاسىنىڭ اكىمى ەرماك ءسالىموۆ, بەسقاراعاي اۋدانىنىڭ اكىمى داۋلەت باتىرباەۆتار قاتىستى.
– قۇرمەتتى سەمەيلىكتەر جانە قالا قوناقتارى! ىنتىماق-بىرلىگى جاراسقان, اباي, مۇحتار, شاكارىمدەر تۋعان قاستەرلى ولكەدە ءبىز باۋىرلاس تاتار حالقىنىڭ «سابانتوي» مەرەكەسىن بەسقاراعايلىق باۋىرلارىمىزبەن بىرگە تويلاۋدامىز,-دەدى سەمەي قالاسىنىڭ اكىمى ەرماك ءسالىموۆ,-تاتار حالقىنان قانشاما تالانتتار شىققان. بەيبىتشىلىككە, بەرەكە-بىرلىككە شاقىراتىن بۇل مەرەكە بىزدەر ءۇشىن اسا قىمبات. سوندىقتان بارشاڭىزعا مىقتى دەنساۋلىق, وتباسىلارىڭىزعا اماندىق تىلەيمىن, مەرەكە قۇتتى بولسىن!
وبلىستىق ىشكى ساياسات باسقارماسىنىڭ باسشىسى نەللي كراسنوباەۆا وبلىس اكىمى دانيال احمەتوۆتىڭ اتىنان جينالعان قاۋىمدى قۇتتىقتاپ, ارنايى ماراپاتتارىن تابىس ەتتى. بەسقاراعاي اۋدانىندا دوستىق ءۇيىنىڭ جۇمىسىن جانداندىرعانى ءۇشىن اۋدان اكىمى داۋلەت باتىرباەۆ العىس حاتپەن ماراپاتتالدى.
– سەمەي قالاسىنىڭ تۇرعىندارىن, وبلىس حالقىن قۇتتىقتايمىن!-دەدى بەسقاراعاي اۋدانىنىڭ اكىمى داۋلەت باتىرباەۆ,-وسى سابانتويعا بەسقاراعاي اۋدانى ءۇش اۆتوبۋس بولىپ لىقا تولىپ كەلدىك. باشكول دەگەن اۋىلىمىز بار, كىل تاتارلار تۇرادى. بيىل سەمەي قالاسىنىڭ اكىمدىگىنىڭ شاقىرۋىمەن وسىندا كەلدىك. قازاق ءۇي تىكتىك, پالاۋ فەستيۆالىن وتكىزىپ جاتىرمىز. بەسقاراعايدا 28 ۇلت ءومىر ءوزارا تاتۋ-ءتاتتى ءومىر سۇرەدى. مەملەكەت باسشىسى نۇرسۇلتان نازارباەۆتىڭ ساليقالى, سارابدال ساياساتىنىڭ اراسىندا اۋىلداعى دوستىق ءۇيىنىڭ ءتۇرلى ۇلتتارى تاتۋلىق پەن تۇراقتىلىقتى ءبىر شاڭىراق استىندا ساقتاپ كەلەدى. ءوزىم دە وسى سەمەيدىڭ تۋماسى بولعاندىقتان سابانتوي ماعان دا اسا قىمبات. وسىنداي شارانى ۇيىمداستىرعان وبلىستىق اكىمشىلىككە بەسقاراعاي حالقى اتىنان ريزاشىلىعىمدى جەتكىزگىم كەلەدى.
ەڭبەك ارداگەرى راشيدا حاسانوۆانىڭ ايتۋىنشا, «سابانتوي» - تاتار تىلىندە «جەر وڭدەۋ تويى» دەگەن ءسوز ەكەن, وتباسىلىق مەرەكە. تاتار حالقىنىڭ جەردى وڭدەپ, ەگىن سالاتىن كوكتەم كەزەڭىنىڭ تويى. ەگىن بىتىك شىقسىن, جيىن-تەرىم مول بولسىن, ەل توق بولسىن دەگەن تاتار ەلىنىڭ ارمان-تىلەكتەرى جيناقتالعان. مەرەكەدە تاتار حالقىنىڭ ۇلتتىق ويىندارى - تاتار كۇرەسى, ارقان تارتۋ جانە تاعى دا باسقا كوپتەگەن سپورتتىق ويىندار وينالدى. سابانتويعا كەلگەندەر تاتار ەلىنىڭ ۇلتتىق تاعامدارىنان ءدام تاتىپ, كونتسەرتتىك باعدارلامانى تاماشالادى.
راۋشان نۇعمانبەكوۆا
سۋرەتتەر اۆتوردىكى.
سەمەي