19 جاسىندا مايدان دالاسىنا اتتانعان جاس سارباز تۋعان جەرىمەن قايتا قاۋىشا المادى. قۇسپانعالي بورانباەۆ سول كەزدەگى گۋرەۆ وبلىسى, تەڭىز اۋدانى قىزىلتۋ كولحوزىنان 1941 جىلى سوعىسقا الىنىپ, 28-ءشى اتقىشتار ديۆيزياسىنىڭ قۇرامىندا شايقاسقان ەدى. 1942 جىلى رەسەيدىڭ نوۆگورود وبلىسى پارفينسكي اۋدانى ماڭىندا ەرلىكپەن قازا تاپتى. وسىلاي ءبىر عۇمىر قىرشىنىنان قيىلدى. ءبىر وتاۋدىڭ وتى جاعىلمادى.
ودان بەرى دە 70 جىلدان استام ۋاقىت ءوتىپ كەتتى. اقتوبە قالاسىنداعى ءاليا مولداعۇلوۆا اتىنداعى جانە ياروسلاۆ وبلىسى, رىبينسك قالاسىنىڭ «زا وتۆاگۋ» ىزدەۋ توپتارى بىرلەسىپ, سوعىس ءورتى شارپىعان ورماندى دالادان ساربازدىڭ جەرلەنگەن جەرىن تاپتى. اتىراۋ وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى سالامات سابىر: «قازا تاپقان جاۋىنگەردىڭ سۇيەگى تابىلعان جەردەن اتى-ءجونى ويىلىپ جازىلعان اس ىشەتىن قاسىعى دا شىقتى. وسى جادىگەردىڭ ارقاسىندا جاۋىنگەردىڭ ەسىمى, تۋعان جەرى انىقتالىپ, سۇيەكتى ەلىنە قايتارۋ ءۇشىن اتىراۋ وبلىسى باسشىلىعىنىڭ قولداۋىمەن ارنايى دەلەگاتسيا ۇيىمداستىرىلدى», دەيدى.
ەل زيالىلارىنىڭ قاتىسۋىمەن جاۋىنگەردىڭ سۇيەگى 20 ماۋسىم كۇنى اتىراۋ قالاسىنا اكەلىنىپ, وبلىس ورتالىعىنداعى جەڭىس ساياباعىندا قارالى ميتينگى ءوتتى. سوعىس جانە ەڭبەك ارداگەرلەرى, جاستار مەن وقۋشىلار, زيالى قاۋىم وكىلدەرى قاتىسقان جيىندا وبلىس اكىمى نۇرلان نوعاەۆ: «ەلباسىمىز ن.ءا.نازارباەۆ «ەرەن ەڭبەكتەرى, ۇلگى تۇتار ىستەرى, وجەت مىنەزدەرىمەن مايداندا عانا ەمەس, بەيبىت ومىردە دە بىزگە ۇلگى بولىپ جۇرگەن سوعىس ارداگەرلەرىنە قۇرمەت كورسەتۋ پارىزىمىز» دەگەن بولاتىن. اتا-باباسى ۇستانعان ۇستانىمىنا ادال بولىپ, مايدانعا اتتانىپ, سول جەردە ەرلىكپەن قازا بولعان جەرلەسىمىزدىڭ ەڭبەگى بۇگىنگە دەيىن جەتتى. الايدا تۋعان توپىراعى بۇيىرماي كەلدى. بۇگىن قۇسپانعالي بورانباەۆ ءۇشىن جەڭىس كۇنى تۋدى», دەپ اتاپ ءوتتى.
شىنىندا دا, قازاق ءۇشىن تۋعان توپىراقتان قاستەرلى دۇنيە جوق. «اعامىزدىڭ سۇيەگىن تۋىستارى جاتقان قاۋىمعا جەرلەيمىز. كوڭىلىمىز تولقىپ تۇر. وسىنداي مۇمكىندىك جاساعان وبلىس باسشىلىعىنا اعايىندار اتىنان العىس ايتامىن. اۋىلعا بارىپ, اتا سالتىمەن اس بەرەمىز», – دەيدى مايدانگەردىڭ تۋىسى زليحا دۇيسەكەنوۆا. جەڭىس ساياباعىنداعى قارالى ميتينگتەن كەيىن جاۋىنگەردىڭ سۇيەگى تۋعان جەرى قۇرمانعازى اۋدانىنا جول تارتتى.
جاستايىنان زۇلمات زاماننىڭ ز ۇلىمدىعىن جۇرەگىنەن وتكىزىپ, مايدان دالاسىندا ءومىرى قيىلعان باتىر وسىلايشا تۋعان توپىراعىمەن قاۋىشتى. اڭداعان ادامعا بۇل دا ەلدىڭ ەلدىگى كورىنەتىن تۇس.
باقىتگۇل باباش,
«ەگەمەن قازاقستان»
اتىراۋ