باعانالى وردا, باستى ورداعا اينالعان ەلوردا – تاۋەلسىز ەل تاريحىنداعى ەرەكشە بەلەس, ايتۋلى جەتىستىك.
كەمەلدىك پەن كەنەندىكتىڭ كورىنىسى استانا بۇل كۇندە الەمنىڭ الىپ شاھارلارىمەن تەڭ دارەجەدە. حالقىمىزدىڭ عاسىرلار بويى قالىپتاسقان وركەنيەتىن زاماناۋي تۇرعىدا جاڭعىرتىپ, جاسامپاز جولعا باستادى. ال ەلوردانىڭ مەرەيتويى – حالىقتىڭ قۋانىشى, مەملەكەتتىڭ مەرەيى.
بۇگىندە باس قالانىڭ ايتۋلى مەرەيتويىن لايىقتى دەڭگەيدە وتكىزۋگە دايىندىق جۇمىستارى قارقىندى جۇرگىزىلۋدە. كۇن سايىن دامۋدىڭ جاڭا ساتىسىنا كوتەرىلىپ كەلە جاتقان استانا شاھارىنىڭ ءسانىن كەلتىرىپ, كوركىن ارتتىراتىن جوبالار دا از ەمەس. ماسەلەن, «اراي-2», «استانا-ارەنا», سونىمەن قاتار بوگەنباي باتىر, جەڭىس داڭعىلىنداعى گۇلزارلاردىڭ اباتتاندىرىلۋى قازىنالى مەرەيتويعا دەگەن قىزۋ دايىندىقتى كورسەتەدى. بۇل رەتتە ءاربىر ءوڭىردىڭ ەلورداعا دەگەن ىقىلاسى مەن قۇرمەتى ەرەكشە.
ەلوردا تويىنا اۋليەاتالىقتاردىڭ دا قوسار ۇلەسى قوماقتى. استانا قالاسىنداعى «ۆەلوسيپەد كولىگىنىڭ ينفراقۇرىلىمى» نىسانىنىڭ №3 جەر تەلىمىندە ءتيىستى جۇمىستاردى جۇرگىزۋ جامبىل وبلىسىنىڭ ەنشىسىنە ءتيىپ وتىر. «شىن مانىندە استانا تويى – ەلدىكتىڭ تويى. وسىدان جيىرما جىل بۇرىن ارقا توسىنەن ەڭسە كوتەرگەن ەلوردامىزدىڭ جىل وتكەن سايىن جاسارىپ, جايناي تۇسكەنىن كورۋ بارشا قازاقستاندىقتار ءۇشىن ۇلكەن مەرەي, ماقتانىش ەكەنى انىق. ەلوردامىزدىڭ الەمدىك قوعامداستىق الدىنداعى بەدەلى, مارتەبەسى الاسارماۋى جولىندا تەر توگۋ ءاربىرىمىز ءۇشىن دە ابىرويلى مىندەت دەپ بىلەمىز», دەيدى وبلىستىق قۇرىلىس, جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ادىلەت احاتاەۆ.
ءوڭىردىڭ باس قۇرىلىسشىسىنىڭ ايتۋىنشا, مۇنداعى ۆەلوسيپەد كولىگى جولىنىڭ ۇزىندىعى 12,36 شاقىرىم ەكەن. بۇل ەسىل اۋدانىنىڭ دوستىق كوشەسىنەن قابانباي باتىر داڭعىلىنا دەيىنگى ارالىقتى قامتيتىن اۋماق.
قۇرىلىس جۇمىستارىن ىرگەلى مەردىگەرلىك ۇيىم – «ارايسترويماركەت-2003» جاۋاپكەرشىلىگى شەكتەۋلى سەرىكتەستىگى اعىمداعى جىلعى مامىر ايىندا باستاعان بولاتىن. بۇگىنگى تاڭدا جەر دايىنداۋ, ۇساق تاس, قيىرشىق تاس, جيەك تاس جانە ءىرى ءتۇيىرلى اسفالت توسەۋ جۇمىستارى تولىقتاي ورىندالعان. «وسى جوبا اياسىندا ۆەلوسيپەد كولىگى جولى بويىندا قوقىسقا ارنالعان جاشىكتەر, ورىندىقتار, ۆەلوسيپەدتى ۋاقىتشا ورنالاستىراتىن ارنايى قۇرىلعىلار, ۆەلوسيپەد تۇراقتارى مەن سايكەستەندىرۋ جول بەلگىلەرىن ورناتۋ كوزدەلۋدە. سونىمەن قاتار جەر تەلىمىنىڭ باسىندا جانە سوڭىندا وبلىسىمىز اتىنان ەكى مونۋمەنت ورناتۋ ويلاستىرىلىپ وتىر. مونۋمەنتتەردىڭ ىرگەتاسى كۋرتينسك گرانيتىنەن قالانىپ, سىرتى يران-ەگيپەتتىك تراۆەرتينمەن قاپتالاتىن بولادى», دەيدى ادىلەت احاتاەۆ.
ۆەلوجولداردىڭ اسىرەسە جاستار ءۇشىن سالاماتتى ءومىر سالتىن قالىپتاستىرۋدا ماڭىزى ەرەكشە بولماق. سونىمەن قاتار بۇل – استانا قالاسىنىڭ 20 جىلدىق مەرەيتويىنا وراي جامبىل وڭىرىنەن دە ەرەكشە ەستەلىك.
استانا قالاسىنان باستاۋ العان بارلىق جاڭالىقتىڭ ەلىمىزدىڭ ءاربىر ءوڭىرىنىڭ دامۋ دەڭگەيىنە وڭ اسەر ەتىپ وتىرعانى انىق. تاريحى تىم تەرەڭدە جاتقان قازاق ۇلىسىنىڭ بۇگىنگى ۇلى تويى ەلدىك پەن مەملەكەتتىلىكتىڭ تويى. بابالاردىڭ اماناتىنا ادالدىق تانىتا وتىرىپ, ەرلىك شەجىرەسىن شەرتەتىن ەلدىكتىڭ تويىنا كونە جامبىل ءوڭىرىنىڭ دە قوسارى مول. ارقاشاندا اسقاق كەيىپتى استانانىڭ شۇعىلالى كەلبەتى قازاق جۇرەگىنىڭ تورىنەن ماڭگىلىك ورىن الا بەرەتىنى داۋسىز.
حاميت ەسامان,
«ەگەمەن قازاقستان»
جامبىل وبلىسى