مەملەكەت باسشىسىنىڭ تاپسىرماسى بويىنشا پرەمەر-مينيستر باقىتجان ساعىنتاەۆ جانە قر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ جۇمىس ساپارىمەن تۇركىستان قالاسىنا بارىپ, وندا قالانىڭ وبلىس ورتالىعى رەتىندەگى دامۋ كەلەشەگىمەن تانىستى.
جۇمىس ساپارى بارىسىندا ارالانعان بىرقاتار الەۋمەتتىك نىساندار: «نۇرلى جەر» تۇرعىن ءۇي قۇرىلىسى مەملەكەتتىك باعدارلاماسى اياسىندا سالىنىپ جاتقان «وتىرار» جاڭا شاعىن اۋدانى جانە ق. ا. ياسساۋي اتىنداعى حالىقارالىق قازاق-تۇرىك ۋنيۆەرسيتەتى.
ب. ساعىنتاەۆ پەن ءا. جاقسىبەكوۆكە تۇركىستان قالاسىن دامىتۋدىڭ باس جوسپارىن ىسكە اسىرۋ بارىسى تۋرالى باياندالىپ, جاڭا اكىمشىلىك-ىسكەرلىك ورتالىقتى دامىتۋ جوسپارلارى, اتاپ ايتقاندا الەۋمەتتىك, جول, قۇرىلىس ينفراقۇرىلىمدارىن جانە تكش ودان ءارى جاڭعىرتۋ جوسپارلارى ۇسىنىلدى.
سونىمەن قاتار تۇركىستان وبلىسىنىڭ اكىمى ج. تۇيمەباەۆ «كونە تۇركىستان» تاريحي بولىگىن جاڭعىرتۋ جوباسى تۋرالى ايتىپ بەردى. جوبا ق. ا. ياسساۋي كەسەنەسى ماڭىنداعى قورعانداردى رەكونسترۋكتسيالاۋعا باعىتتالعان جانە 2026 جىلعا دەيىن جۇزەگە اسىرىلادى.
بۇگىنگى تاڭدا تۇركىستان قالاسىنىڭ اۋماعى 7,4 مىڭ كم² قۇرايدى. اكىمشىلىك ءبولۋ اياسىندا قالا 12 كەنت جانە اۋىلدىق وكرۋگتەن جانە 35 ەلدى مەكەننەن تۇرادى. 1 مامىرداعى جاعداي بويىنشا حالىق سانى 263 مىڭ ادامدى قۇرايدى.
وسى جىلدىڭ قاڭتار–مامىر ارالىعىندا ونەركاسىپتىك ءوندىرىس كولەمى 6329,6 ملن تەڭگەنى نەمەسە 2017 جىلدىڭ وسىنداي كەزىندەگى كورسەتكىشتىڭ 108,5% قۇرادى. اۋىل شارۋاشىلىعى ونىمدەرىنىڭ كولەمى 5,9%-كە 8392,4 ملن تەڭگەگە دەيىن ۇلعايدى.
1 ماۋسىمداعى جاعداي بويىنشا, ارەكەت ەتىپ تۇرعان شوب سۋبەكتىلەرىنىڭ سانى 13,3 مىڭدى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 1,5%-كە جوعارى كورسەتكىش. قۇرىلىس جۇمىستارىنىڭ كولەمى 2896,3 ملن تەڭگەنى (100,9%) قۇرادى. 33 368 م² تۇرعىن ءۇي نەمەسە وتكەن جىلدىڭ ءتيىستى كەزەڭىندەگى دەڭگەيمەن سالىستىرعاندا 101,9% پايدالانۋعا بەرىلدى.
ەسكە سالا كەتەيىك, كەشە مەملەكەت باسشىسىنىڭ «قر اكىمشىلىك-اۋماقتىق قۇرىلىسىنىڭ كەيبىر ماسەلەلەرى تۋرالى» جارلىعىمەن وڭتۇستىك قازاقستان وبلىسى تۇركىستان وبلىسى دەپ قايتا اتالىپ, اكىمشىلىك ورتالىعى تۇركىستان قالاسى بولدى.
«وبلىس ورتالىعى عاسىرلار بويى قازاق حاندىعىنىڭ جانە بۇكىل تۇركى الەمىنىڭ ساياسي ءارى رۋحاني ورتالىعى بولعان تۇركىستان قالاسىنا كوشىرىلەدى», — دەدى قازاقستان پرەزيدەنتى ن. نازارباەۆ جارلىققا جاريا تۇردە قول قويۋ راسىمىندە.