پويىز اپاتىنان زارداپ شەككەندەرگە قولداۋ كورسەتىلەدى

جامبىل وبلىسى اۋماعىندا بولعان اپات كەزىندە اتالعان جولاۋشىلار پويىزىنىڭ  8 ۆاگونى رەلستەن شىعىپ كەتكەن. مالىمەت بويىنشا, توتەنشە جاعداي سالدارىنان 11 جولاۋشى جاراقاتتانىپ, 1 ءجاسوسپىرىم قازا تاپقان ەدى. سونىمەن قاتار, اتالعان وقيعا ماشينيست تەمىرجولدىڭ قيسايعانىن كورىپ, كولىكتى شۇعىل تەجەگەنىنەن ورىن العانى دا جاريالاندى.

بۇرىن جازعانىمىزداي, وقيعا ورنىنا جامبىل وبلىستىق توتەنشە جاعدايلار دەپارتامەنتىنىڭ ماماندارى, شۋ اۋداندىق توتەنشە جاعدايلار ءبولىمى, سونىمەن قاتار تولە بي اۋىلى ماڭىنداعى كۇرە جولدىڭ مەديتسينالىق قىزمەتىنىڭ شۇعىل ارەكەت جاساعى مەن ارنايى تەحنيكالار زارداپ شەگۋشىلەرگە ءتيىستى كومەك كورسەتتى. ال اپاتقا ۇشىراعان پويىزدىڭ بارلىق جولاۋشىلارى «استانا – قىزىلوردا» باعىتىنداعى پويىزعا اۋىستىرىلدى.

وقيعا جامبىل وبلىسى اۋماعىندا ورىن العاندىقتان, وبلىس اكىمى اسقار مىرزاحمەتوۆتىڭ تاپسىرماسىمەن وبلىس اكىمىنىڭ ءبىرىنشى ورىنباسارى بەكبولات ورىنبەكوۆ, وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ, وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى تالعات سابيروۆ جانە جەرگىلىكتى پوليتسيا قىزمەتى باسشىسىنىڭ ورىنباسارى مۇرات بايسەركەنوۆ وقيعا ورنىنا جەتكەن بولاتىن. سونىمەن قاتار, ارنايى كوميسسيا قۇرىلىپ, اپاتتىڭ سالدارى مەن زاردابىن جويۋ جولىنداعى جۇمىستار باقىلاۋعا الىندى.

مالىمەتتەرگە سۇيەنسەك, اپاتقا ۇشىراعان پويىزدىڭ بارلىق 20 ۆاگونىنىڭ ىشىندە 800-گە تارتا ادام بولعان. ال اۋدارىلعان 3 ۆاگوندا 152 جولاۋشى بار ەكەن. ال وبلىس اكىمىنىڭ ءبىرىنشى ورىنباسارى بەكبولات ورىنبەكوۆتىڭ ايتۋىنشا, وننان اسا جولاۋشىعا دەر كەزىندە مەديتسينالىق كومەك كورسەتىلگەن. سونداي-اق, وقيعا ورىن العان كۇنى زارداپ شەككەن 11 ادام قالالىق اۋرۋحاناعا, 3 ادام اۋداندىق اۋرۋحاناعا جەتكىزىلگەن. وقيعا ورنىندا 12 جاسار الەكسەي مالنەۆتىڭ قايتىس بولعانى بەلگىلى بولدى.

جامبىل وڭىرىندە پويىز اپاتىنىڭ ورىن الۋى بۇكىل ەلدى الاڭداتقانى انىق. وسى ورايدا ەلىمىزدىڭ ينۆەستيتسيالار جانە دامۋ ءمينيسترى جەڭىس قاسىمبەك اتالعان وقيعا بويىنشا پىكىر بىلدىرگەن بولاتىن. سونىمەن قاتار, قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ پويىز اپاتىنا قاتىستى تەرگەۋدى ءوز باقىلاۋىنا الاتىندىعىن مالىمدەدى.

پويىز اپاتىنا بايلانىستى جامبىل جول بولىمشەسىنىڭ شۋ ستانساسىندا «قازاقستان تەمىر جولى» ۇك» اق باسقارما توراعاسى قانات الپىسباەۆ, ينۆەستيتسيا جانە دامۋ مينيسترلىگى كولىكتەردى باقىلاۋ كوميتەتىنىڭ توراعاسى اسەت اساۋباەۆ جانە «قازاقستان تەمىر جولى»  جۇك تاسىمالداۋ» اق پرەزيدەنتى-ورىنداۋشى ديرەكتورى ورالحان كۋلاكوۆ بۇقارالىق اقپارات قۇرالدارى وكىلدەرىمەن بريفينگ وتكىزدى. جيىن بارىسىندا قانات الپىسباەۆ «قازاقستان تەمىر جولى» ۇلتتىق كومپانياسى تاراپىنان قارالى وتباسىنا 2 ميلليون تەڭگەدەن استام قارجى بەرىلەتىنىن مالىمدەدى. سونىمەن قاتار, اپاتتان زارداپ شەككەن ازاماتتارعا جاراقاتتارىنىڭ اۋىرلىعىنا بايلانىستى 500 مىڭ تەڭگەدەن 1 ميلليون تەڭگەگە دەيىن بەرىلەتىنىن جەتكىزدى. اتالعان جيىندا «قازاقستان تەمىر جولى» ۇك» اق جانىنان جەدەل شتاب قۇرىلىپ, قازىرگى كەزدە اتالعان شتاب ۆاگونداردىڭ جولدان شىعىپ كەتۋىنە قاتىستى بارلىق زارداپتاردى جويۋ شارالارىن ۇيلەستىرىپ جاتقانى دا ايتىلدى.

توتەنشە جاعداي ورىن العان جەردە قازىر ءارتۇرلى 9 تەحنيكا مەن 300-گە جۋىق تەمىرجولشى قالپىنا كەلتىرۋ جۇمىستارىن جۇرگىزىپ جاتىر. نەگىزىنەن پويىز قوزعالىسى ەكىنشى جول ارقىلى جۇزەگە اسىرىلۋدا. سونىمەن قاتار, باسقوسۋ بارىسىندا ايتىلعانداي, اتالعان وقيعاعا قاتىستى ەلىمىزدىڭ باس كولىك پروكۋراتۋراسىنىڭ قاداعالاۋىمەن ءتيىستى قۇقىق قورعاۋ ورگاندارى قىلمىستىق ءىس قوزعاعان. بۇل رەتتە قانات الپىسباەۆ ارنايى قۇرىلعان كوميسسيا وقيعانىڭ ناقتى سەبەپ-سالدارىن ءبىر ايدىڭ ىشىندە انىقتايتىنىن ايتتى.

حاميت ەسامان, «ەگەمەن قازاقستان»

جامبىل وبلىسى