بيىك شىڭدارى كوك تىرەگەن اقباس تاۋلار كورىنەدى الىستان. ونىڭ بەر جاعىنداعى جوتا-جوندار تەڭىز تولقىندارى سەكىلدى كوگىلدىر مۇنارعا ورانىپ, تولقىپ جاتقانداي اسەرگە بولەيدى.
كۇنگە شاعىلىسىپ, كۇلىم قاققان اينا كولدىڭ جاعاسىنداعى بوز ۇيلەر الىستان كوز سالعان كىسىگە سۋ بەتىندە باياۋ قالقىپ جۇرگەن ءبىر توپ اققۋعا ۇقسايدى. ال شىندىعىندا, بۇل – قىرعىزدىڭ مايتالمان اقىنى توقتاعۇل ساتىلعانوۆتىڭ 150 جىلدىق مەرەيتويىنا ارنالىپ تىگىلگەن ۇيلەر بولاتىن.
...كول ورتاسىندا ءبىر كەمە تۇر. ونىڭ پالۋباسىنا ىلىنگەن قىرعىزدىڭ قىزىل جالاۋى اۋەلدە سۋ بەتىندەگى قىزعالداق سەكىلدى كوز تارتادى.
كوڭىلىڭىز ەلەڭدەپ, كوكوراي كوكتەمدى اڭسايدى. شىركىن-اي, مىناۋ ولكە قىزعالداققا ورانىپ جاتقان شاقتا كەلەر مە ەدىك دەيسىز قىزىعىپ. كول جاعاسىنداعى ەشكى تال دا ءسىزدىڭ وسى ويىڭىزدى قۇپتاعانداي باياۋ ىرعالىپ, باسىن يزەپ قويادى.
بۇل ولكەنىڭ جالپى اتاۋى – كەتپەن توبە. ال مانالى بەرى ءبىزدىڭ كول دەپ ويلاپ كەلە جاتقانىمىز كادىمگى ورتالىق ازيا كارتاسىنان ويىپ تۇرىپ ورىن الاتىن توقتاعۇل سۋ قويماسى.
ءبىر قىزىعى, بالا كۇ-نىڭىزدە اجەڭىزدىڭ ءتىلىن الماي, قىڭىرايىپ: «ماعان ءبۇيتىپ ۇرسا بەرسەڭىز, كوكەمنىڭ ۇيىنە كەتەم دە قالام!» دەپ قورقىتپاق بولعان كەزىڭىزدە, ول كىسىنىڭ: «وي, تەنتەك! كەتپەسەڭ, كەتپەن توبەدەن اسىپ كەت!» دەيتىن ءسوزى ەسىڭىزگە ءتۇسىپ, ەرىكسىز جىمياسىز.
كوزدى اشىپ-جۇمعانشا وتە شىققانداي بولىپ كورىنەتىن سول ءبىر ءتاتتى كۇندەردى ساعىنىپ وتىرىپ ويلايسىز: «ياپىر-اي, باياعى اجەم ايتقان كەتپەن توبە وسى ەمەس پە ەكەن؟!»
نۇرعالي وراز, «ەگەمەن قازاقستان»