كاتونقاراعاي اۋدانىنىڭ سولونوۆكا اۋىلىنداعى 30 جىلعا جۋىق ۋاقىت قاراۋسىز قالعان الما باعى قايتا قالپىنا كەلتىرىلمەك. كەزىندە بۇل جەردە الما, قاراقات پەن تاڭقۋراي جايقالا ءوسىپ, اۋىل تۇرعىندارىنىڭ كوز قۋانىشىنا اينالعان ەكەن.
«مەن بۇل باقتا 1969-1978 جىلدارى جۇمىس ىستەدىم. مىڭعا جۋىق جەمىس اعاشتارى جايقالا وسكەن تاماشا باق ەدى. كولحوز المالاردى كۇزگە تاياۋ كولىكپەن اۋدانداعى ءارتۇرلى مەكەمەلەرگە اپارىپ ساتاتىن. باقتىڭ نەگىزى 1952 جىلى سولونوۆكا اۋىلىنىڭ تۇرعىنى فيليمون بەرديۋگيننىڭ باستاماسىمەن قالانعان. ول كەزدە كولحوزدا دەنى دۇرىس تەحنيكا دا بولعان جوق. سوندىقتان فيليمون ۇلدارى نيكولايمەن جانە ۆلاديميرمەن بىرگە قولىنا كۇرەك الىپ, بىرنەشە شاقىرىم ارىق قازدى. ول الما باعىنداعى ءاربىر تالعا ءوز بالالارىنداي ۇلكەن قامقورلىق جاسادى», دەپ ەسكە الادى وسى اۋىلدىڭ تۇرعىنى, زەينەتكەر ليديا كوروتكوۆا.
«باقپاسا مال كەتەدى» دەگەندەي, ف.بەرديۋگين 1980-جىلداردىڭ اياعىندا زەينەتكەرلىككە شىققاننان كەيىن الما باعى دا قاراۋسىز قالىپ, اعاشتارى شابىلىپ, مال جايىلاتىن جەرگە اينالادى. بيىل جىل باسىندا كاتونقاراعاي اۋدانىنىڭ اكىمى احمەتقالي نۇرعوجين وتكىزگەن ەسەپتى كەزدەسۋدە اۋىل تۇرعىندارى الما باعىن قالپىنا كەلتىرۋ جونىندە ۇسىنىس ايتىپتى. ۇسىنىس قولداۋ تاۋىپ, كوكتەمدە جەرگىلىكتى مەكتەپ, اكىمدىك قىزمەتكەرلەرى مەن اۋدان ورتالىعى – ۇلكەن نارىننان كەلگەن ەرىكتىلەر كومەگىمەن باقتا بىرنەشە مارتە سەنبىلىك ۇيىمداستىرىلىپ, اۋماق تولىق تازارتىلىپ, ارتىق اعاشتار كەسىلىپتى.
ۇرپاققا ۇلگى بولارلىق يگى ىسكە وسى اۋىلدىڭ تۋماسى, اۋداندىق ەمحانانىڭ باس دارىگەرى ساۋلە بايگەرەەۆا دا اتسالىسقان.
ء«بىز بيىل سولونوۆكاداعى باقتاعى ونشاقتى الما اعاشىنا جاڭا الما بۇتاقتارىن بايلاپ, جالعادىق. ەگۋ جۇمىستارى دەيمىز عوي. 40-قا جۋىق اعاشتى كەلەسى جىلعا دايىنداپ جاتىرمىز. سۆينچاتكا دەگەن اۋىلدا المالار جاقسى وسەدى. سول جەردەن وسىندا اكەلىپ وتىرعىزساق پا دەگەن ويىمىز بار», دەيدى تۋعان اۋىلىنىڭ ەرتەڭىنە بەيجاي قارامايتىن دارىگەر.
ازامات قاسىم, «ەگەمەن قازاقستان»
شىعىس قازاقستان وبلىسى,
كاتونقاراعاي اۋدانى