«استانا» فۋتبول كلۋبىنىڭ جانە قازاقستان قۇراماسىنىڭ قاقپاشىسى نەناد ەريچتى جاتتىعۋ زالىنان كەزدەستىردىم. قاراپايىم حالىق باراتىن جاتتىعۋ زالىنان قازاقستان پرەمەر-ليگاسىنىڭ 4 دۇركىن چەمپيونىن كورەمىن دەپ كىم ويلاعان؟ وتاندىق كوماندالاردىڭ ويىنىن كوپ كورمەيتىنمىن, بىراق «استانا» كومانداسىنىڭ سوڭعى جەتىستىكتەرىن تاماشالاماۋ مۇمكىن ەمەس. ەلوردالىق اياقدوپشىمەن امانداسىپ, جاتتىعۋ بارىسىندا اڭگىمەلەسە كەتتىك.
– جىلدان جىلعا ءسىزدىڭ شەبەرلىگىڭىز ارتىپ كەلە جاتقانداي, مۇنىڭ سىرى نەدە؟
– جىلى لەبىزىڭىزگە راحمەت, بارلىق ويىنشىلار الاڭدا وزدەرىن جاقسى قىرىنان كورسەتۋگە تىرىسادى, بۇل فۋتبولدىڭ ءسوزسىز تالابى. ءار ويىنشى ۇجىمنىڭ جەتىستىگى ءۇشىن ءار جاتتىعۋ سايىن باپكەردىڭ نۇسقاۋلىعىن ورىنداپ, ءوزىن-ءوزى جەتىلدىرىپ وتىرادى.
– وسى ماۋسىمدا ەۋروپا ليگاسىنىڭ توپتىق كەزەڭىندە كەرەمەت ويىندار وتكىزىپ, پلەي-وفف كەزەڭىنە جولداما الدىڭىزدار. توپتىڭ ءفاۆوريتى سانالعان «ۆيليارەالعا» قارسى ويىندا اسقان شەبەر ەكەنىڭىزدى تاعى دا دالەلدەدىڭىز. سول ويىندى ستاديوندا تاماشالاعانمىن, ءسىزدىڭ سەيۆتەرىڭىز بولماعاندا, ءبىزدىن كلۋب 4-5 گول وتكىزەر مە ەدى؟..
– فۋتبول كوماندالىق ويىن, بۇل كوماندانىڭ ەڭبەگى. ءبىز جانكۇيەرلەر ءۇشىن بارىمىزدى سالامىز.
– ەلوردالىق كومانداعا قولداۋ كورسەتىپ, ءسىزدىڭ ويىنىڭىزدى باقىلاپ جانكۇيەر بولعاندايمىن, كوماندامىزدا سىزدەي ويىنشىلاردىڭ بارىن بارشا قازاق فۋتبولىنىڭ جانكۇيەرلەرى ماقتانىشپەن ايتادى! – دەپ ەدىم ول ماقتاعانىما ىڭعايسىزدانىپ, «مەن بۇنى باعالايمىن, مەن ءۇشىن جانكۇيەرلەردىڭ ىقىلاسى ماڭىزدى» دەپ ءوزىنىڭ وتە قاراپايىم ادام ەكەنىن كورسەتتى.
كەزدەيسوق كەزدەسكەندىكتەن نەنادپەن ۇزاق سويلەسە المادىم, قول الىسىپ سۋرەتكە تۇسكەننەن كەيىن ماعان ساتتىلىك تىلەپ: «كەزدەسكەنشە» دەدى. جانكۇيەر ءۇشىن بۇدان اسقان قۋانىش بار ما؟!
ەراسىل اۋەزحان,
№76 مەكتەپ-ليتسەيىنىڭ تۇلەگى
استانا