ءبىزدى «نۇرلى جەر» تۇرعىن ءۇي قۇرىلىسى باعدارلاماسىنىڭ ورىندالۋ بارىسى الاڭداتىپ وتىر. ارينە, وتكەن كەزەڭدەردەگى كورسەتكىشتەر جامان ەمەس, ماسەلەن, وتكەن جىلى جوسپارلانعان 10,1 ملن شارشى مەتردىڭ ورنىنا 11,2 ملن شارشى مەتر تۇرعىن ءۇي سالىنىپ, پايدالانۋعا بەرىلدى. وسىنىڭ ارقاسىندا 100 مىڭنان ارتىق وتباسى وزدەرىنىڭ تۇرعىن ءۇي ماسەلەسىن جاقسارتتى.
تۇرعىن ءۇي قۇرىلىسىنا بولىنگەن ينۆەستيتسيا كولەمى دە 18 پايىزعا ارتىپ, 980 ملرد تەڭگەنى قۇراعان. سونىڭ ىشىندە مەملەكەت بولگەن 1 تەڭگەگە جەكەمەنشىك ينۆەستيتسيانىڭ 5 تەڭگەسى قوسىلعان. بۇلاردان باسقا مەملەكەت ينجەنەرلىك-كوممۋنالدىق ينفراقۇرىلىمداردى سالۋ ءۇشىن 80 ملرد تەڭگە باعىتتاعان, بۇل جەردەگى مەملەكەتتىك جانە جەكەمەنشىك قاراجاتتىڭ قاتىناسى ءتىپتى 1:9-عا جەتتى.
ەندى مەملەكەت باسشىسىنىڭ باستاماسىمەن قولعا الىنعان «7 – 20 – 25» باعدارلاماسىنىڭ باستالۋىنا بايلانىستى «نۇرلى جەر» باعدارلاماسىن ىسكە اسىرۋداعى ولقىلىقتاردىڭ ءبارى ەسكەرىلىپ, ولاردى شەشۋدىڭ جۇيەلى جولدارى جاسالۋى كەرەك. سوندا عانا تۇرعىن ءۇي قۇرىلىسى قوسىمشا قۋات الىپ, جاپپاي جۇرگىزىلەتىن سيپاتقا قول جەتكىزەدى.
وسى ورايدا ءبىز ءوزىمىز كورىپ جۇرگەن بىرقاتار كەمشىلىكتەردى پرەمەر-مينيستر باقىتجان ساعىنتاەۆتىڭ اتىنا جولداعان دەپۋتاتتىق ساۋالىمىزدا اشىپ, كورسەتتىك. بۇگىنگى تاڭدا قازاقستاندا 16 ءۇي قۇرىلىسى كومبيناتى جۇمىس ىستەيدى. ولار مەملەكەتتىك يندۋستريالىق-يننوۆاتسيالىق باعدارلامانى ىسكە اسىرۋ شەڭبەرىندە سالىنعان. مەملەكەت ولاردىڭ قۇرىلىسىن جان-جاقتى قولداپ, نەسيەلىك ستاۆكالارىن سۋبسيديالاعان, ينجەنەرلىك جۇيەلەردى دە تارتىپ بەرىپ, جالپى ايتقاندا ولارعا 30 ملرد تەڭگەدەي قاراجاتتى شىعىن قىلعان. كومبيناتتار تولىق ىسكە قوسىلعاندا تۇرعىن ۇيلەردىڭ ءاربىر شارشى مەترىنىڭ باعاسىن تومەندەتەدى, قۇرىلىس مەرزىمىن قىسقارتادى دەپ جوسپارلانعان ەدى.
الايدا, بۇگىنگى تاڭدا وسى كاسىپورىنداردىڭ جۇمىسپەن قامتىلۋى 50 پايىزدان اسپاي وتىر. بۇل ولاردىڭ ءارى قاراي دامۋىن تەجەيتىنى ءسوزسىز. قولدانىستاعى زاڭنامالاردا مەملەكەتتىك تۇرعىن ءۇي قۇرىلىسى باعدارلامالارىن ىسكە اسىراتىندىعىنا بايلانىس- تى ولارعا ارنالعان قانداي دا ءبىر پرەفەرەنتسيالار نەمەسە باسقا دا جەڭىلدىكتەر قاراستىرىلماعان.
وسىنداي جاعداي مەملەكەتتىڭ تۇرعىن ءۇي قۇرىلىسىن سالۋ تاپسىرىسىن ءتيىستى تەحنيكالىق جانە تەحنولوگيالىق رەسۋرستارى جوق, سالعان ۇيلەرىنىڭ ساپاسىنا جاۋاپ بەرمەيتىن كەزدەيسوق كومپانيالاردىڭ تەندەردەن جەڭىپ الۋىنا جەتكىزىپ وتىر.
سونىمەن قاتار جەرگىلىكتى اتقارۋشى ورگاندار جاڭا تۇرعىن ۇيلەر اۋداندارىن سالۋعا قىزىعۋشىلىق تانىتىپ كەتتى. الايدا وسى جەرلەردە بالالار باقشاسى, مەكتەپ, اۋرۋحانا سياقتى الەۋمەتتىك ينفراقۇرىلىمداردىڭ قۇرىلىسىن سالۋدى «ۇمىتىپ كەتىپ», جاڭا ۇيلەردىڭ تۇرعىندارىنا ىڭعايسىزدىقتار تۋعىزۋدا.
ۇكىمەت وسى ماسەلەلەردى ەسكەرىپ, پرەزيدەنتتىڭ تاپسىرماسىن ورىنداۋدا ولقىلىقتار جىبەرمەسە ەكەن دەگەن تىلەگىمىز بار. سونىمەن قاتار تۇرعىن ءۇيدىڭ وزىندىك قۇنىن تومەندەتۋگە باعىتتالعان جول كارتاسىن جاساۋدىڭ دا ۋاقىتى جەتتى. تاعى ءبىر ماسەلە اسكەريلەر مەن ولاردىڭ وتباسىنا بايلانىستى. وسى كۇنى تۇرعىن ءۇي قۇرىلىس جيناق بانكى مۇعالىمدەر مەن دارىگەرلەرگە ارنالعان ارنايى ءۇي قۇرىلىسىن جۇرگىزۋدە, ءبىز وسى تاجىريبەمەن اسكەريلەرگە ارنالاتىن ءۇي قۇرىلىستارىنىڭ دا بوي كوتەرگەنىن قالايمىز.
ميحايل بورتنيك,
سەنات دەپۋتاتى