جانىمىزدا جۇرگەن جاقسىلار تۋرالى ايتۋ اركەز پارىز. وتكەن عاسىرداعى اشارشىلىق, قۋعىن-سۇرگىن, سوعىس قاسىرەتىن ءوز كوزىمەن كورىپ, وعان كۋا بولعان جاندار بۇگىندە سيرەك. دەگەنمەن دە, تاريحتىڭ ءتىرى كۋاگەرلەرى ەل ىشىندە ءالى دە بولسا بار.
بۇگىندە 108 جاستاعى جىبەك اجە دە سول ءبىر زۇلماتتى جىلداردى كوزىمەن كورىپ, كوكىرەگىمەن تۇيسىنگەن جان. عاسىردان دا ۇزاق جاساعان اجەمىزدىڭ ءومىرى ۇرپاققا ۇلگى. ول كەزىندە جامبىل وبلىسىنىڭ شۋ اۋدانىنداعى كالينين ۇجىمشارىندا ەڭبەك ەتتى. سوعىس جىلدارى دا تىلدا ايانباي ەڭبەك ەتىپ, تالاي بەينەتتى باستان كەشتى. زامانا زاپىرانىن كورىپ, بۇگىنگى شۇعىلالى كۇنگە جەتىپ وتىرعان جىبەك اجە تاعدىردىڭ بۇيرىعىمەن ءۇش ۇل مەن قىزدى دۇنيەگە اكەلىپ, ازامات ەتىپ تاربيەلەدى.
بۇگىندى تاڭدا سوناۋ قيىن-قىستاۋ كەزەڭدەر ارتتا قالىپ, ەلىمىز ەگەمەندىك العان ساتكە كۋا بولىپ وتىرعان اجەي زاماننىڭ تىنىشتىعىنا, قوعامنىڭ تۇراقتىلىعىنا شۇكىر ەتەدى. «تىنىشتىق پەن تۇراقتىلىقتان اسقان بايلىق جوق. ءبىز تالاي قيىن كەزەڭدەردى باستان كەشىردىك. ەندى بۇگىندە ەلىمىزدىڭ باسىنا شۋاقتى كۇن تۋدى. وسى بەيبىت كۇننىڭ قادىرىن بىلىڭدەر, قاراقتارىم», دەيدى جىبەك تۇرعىنتاەۆا.
«قارتىڭ – قازىناڭ» دەيدى حالقىمىز. كوپ جاساپ, كوپتى كورگەن جىبەك اجە ءاردايىم جاستارعا ءبىلىم الىپ, ادام بولۋدى, ەلگە پايداسى تيەتىن ازامات بولۋدى وسيەت ەتەدى. بۇگىندە ول تاراز قالاسىنداعى توقتاعۇل دەگەن بالاسىنىڭ قولىندا تۇرادى ەكەن. تولقىناي اتتى نەمەرە كەلىنى اجەنى باعىپ, العىسىن الىپ وتىر. ادامنىڭ بۇل ومىردەگى باستى ماقساتى, ادامي تىلەگى ۇرپاعىنىڭ جاقسىلىعىن كورۋ عوي. بۇل تۇرعىدا دا جىبەك اجە باقىتتى جان. «جاس كۇنىمدە بەينەت بەر, قارتايعاندا زەينەت بەر» دەگەن قازاقتىڭ تىلەگى وسى دا...
حاميت ەسامان,
«ەگەمەن قازاقستان»
جامبىل وبلىسى