ورتالىق كوممۋنيكاتسيالار قىزمەتىندە اقپارات جانە كوممۋنيكاتسيالار ءمينيسترى داۋرەن اباەۆتىڭ قاتىسۋىمەن ءباسپاسوز ءماسليحاتى ءوتتى. كەزدەسۋ بارىسىندا مينيستر ۆەدومستۆونىڭ ءبىر جىل كولەمىندە اتقارعان جۇمىستارى مەن الداعى جوسپارلارى تۋرالى باياندادى.
«وسى جىلدىڭ 16 مامىرىندا اقپارات جانە كوممۋنيكاتسيالار مينيسترلىگىنىڭ حالىق الدىنداعى ەسەپ بەرۋ جيىنى ءوتتى. وتكەن جىلى دا ءدال وسىنداي فورماتتاعى كەزدەسۋ وتكىزگەن بولاتىنبىز. مەنىڭ ويىمشا, مۇنداي شارالار مەملەكەتتىك ورگاندار مەن حالىق اراسىنداعى بايلانىستى نىعايتۋعا جاقسى مۇمكىندىك بەرەدى. ەسەپتىك كەزدەسۋ سەلەكتورلىق ءتارتىپ بويىنشا وتكىزىلدى. ياعني ەلىمىزدىڭ بارلىق ايماعىمەن بايلانىس ورناتتىق. كەزدەسۋگە جالپى ەسەپ بويىنشا 1000-عا جۋىق ادام قاتىستى.
بۇل ءىس-شاراعا قاتىسۋشىلاردىڭ اراسىندا ورتالىق مەملەكەتتىك ورگانداردىڭ, مينيسترلىككە قاراستى قوعامدىق كەڭەس پەن باق-تىڭ, بايلانىس وپەراتورلارىنىڭ, IT-كومپانيالار مەن ۇكىمەتتىك ەمەس ۇيىمداردىڭ وكىلدەرى بولدى. ەسەپتىك كەزدەسۋ «حابار24» تەلەارناسى مەن bnews.kz اقپاراتتىق اگەنتتىگى سايتى ارقىلى ونلاين رەجىمدە ترانسلياتسيالاندى. باق ارقىلى جان-جاقتى تاراتىلدى. سونىمەن قاتار ءمينيستردىڭ بلوگى مەن call-ورتالىق ارقىلى سۇراقتاردى قابىلداۋ ۇيىمداستىرىلدى. وسىلايشا جالپى سانى 33 سۇراق كەلىپ ءتۇستى. زالدان 11 ادام سۇراق قويدى. 22 سۇراق ەلىمىزدىڭ وزگە وبلىستارىنان جولداندى. بۇل سۇراقتاردىڭ باسىم بولىگى مەملەكەتتىك قىزمەت كورسەتۋ ساپاسىنا بايلانىستى بولدى. سونداي-اق ۇيالى بايلانىس وپەراتورلارىنىڭ جۇمىسىنا, باق تۋرالى زاڭعا قاتىستى جانە «تسيفرلى قازاقستان» مەملەكەتتىك باعدارلاماسىنىڭ جۇزەگە اسۋىنا بايلانىستى سۇراقتار قويىلدى», دەدى مينيستر.
سونىمەن قاتار ول وتكەن جىلى قابىلدانعان «تسيفرلى قازاقستان» مەملەكەتتىك باعدارلاماسىنىڭ باعىتتارىنىڭ ءبىرى – ەلدەگى ينتەرنەت-ينفراقۇرىلىمىن دامىتۋ بولىپ تابىلاتىنىن تىلگە تيەك ەتتى.
«قازىرگى ۋاقىتتا ەلىمىزدەگى 13 ميلليوننان استام ادام جوعارى جىلدامدىقتاعى ينتەرنەتكە قول جەتكىزدى. حالىق سانى 10 مىڭ ادامنان تۇراتىن ەلدى مەكەندەر 3G بايلانىسىمەن, 50 مىڭنان استام تۇرعىنى بار مەكەندەر 4G ستاندارتىمەن قامتىلعان. وتكەن جىلى ەلىمىزدىڭ بارلىق اۋدان ورتالىقتارى ءتورتىنشى بۋىنداعى ينتەرنەت جەلىسىمەن قامتىلدى. مينيسترلىكتىڭ بۇدان كەيىنگى مىندەتى كەڭ جولاقتى ينتەرنەتتى اۋىلدىق ەلدى مەكەندەرگە جەتكىزۋ بولىپ تابىلادى, ول ءۇشىن مەملەكەتتىك-جەكەمەنشىك ارىپتەستىك جوباسىنا سايكەس ءتيىستى جۇمىس جۇزەگە اسىرىلۋدا. جوبا اياسىندا 2021 جىلعا دەيىن جوعارى جىلدامدىقتاعى ينتەرنەتپەن جالپى سانى 2 ميلليوننان استام تۇرعىنى بار 1249 اۋىلدىق ەلدى مەكەن قامتىلاتىن بولادى», دەدى مينيستر.
بۇدان بولەك اقپارات جانە كوممۋنيكاتسيالار ءمينيسترى د.اباەۆ ۇيالى تەلەفونداردىڭ پايدالانۋشىلارى ءوز قۇرىلعىلارىن 2018 جىلدىڭ سوڭىنا دەيىن تىركەۋى قاجەت ەكەنىن ەسكەرتىپ ءوتتى.
«ۇيالى تەلەفونداردى تىركەۋ ءۇشىن ۇيالى بايلانىس وپەراتورلارىنىڭ ابونەنتتىك بولىمشەلەرىنە بارۋدىڭ قاجەتى جوق. ابونەنتتەر ونلاين نەمەسە SMS ارقىلى تىركەلە الادى. ايتا كەتەتىن تاعى ءبىر جايت, «تسيفرلى قازاقستان» مەملەكەتتىك باعدارلاماسىن ىسكە اسىرۋ اياسىندا «ەلەكتروندى ۇكىمەت جانە ەلەكتروندى مەملەكەتتىك قىزمەتتەر» كۋرسى بويىنشا وقىتۋ ادىستەمەسى مەن جوسپارى جاسالدى, ونىڭ كومەگىمەن حالىقتىڭ تسيفرلى ساۋاتتىلىعىن ارتتىرۋ جوسپارلانۋدا. 2018 جىلدىڭ ماۋسىمىنان تامىز ايىنا دەيىن «ۇات» اق, «قازپوشتا» اق, «زەردە» اق جانە جەرگىلىكتى اتقارۋشى ورگاندارمەن بىرلەسە وتىرىپ, شامامەن جارتى ميلليون ادامدى تسيفرلى ساۋاتتىلىققا ۇيرەتۋ كوزدەلگەن. وقىتۋ كەلەسى باعىتتار بويىنشا جۇرگىزىلەدى. ءبىرىنشى, «نەگىزگى تسيفرلى داعدىلار» بويىنشا. ەكىنشى, «ەلەكتروندى ۇكىمەت جانە ەلەكتروندى مەملەكەتتىك قىزمەتتەر» بويىنشا. ءۇشىنشى, «اشىق ۇكىمەت» باعىتىندا. سوڭعىسى – «ەلەكتروندى كوممەرتسيا» بويىنشا. بۇعان ينتەرنەتتە ونىمدەر مەن قىزمەتتەردى ساتىپ الۋ, ساتۋ جانە تاراتۋ داعدىلارىن قامتيتىن ەلەكتروندى كوممەرتسيا كۋرستارى جاتادى. جالپى, 8 ميلليون ادامنىڭ تسيفرلى ساۋاتتىلىعىن ارتتىرۋ جوسپارلانىپ وتىر», دەدى داۋرەن اباەۆ.
راۋان قايدار,
«ەگەمەن قازاقستان»