ەلىمىزدىڭ بارلىق وڭىرىندە تالانتتى دا تالاپتى وقۋشىلارعا قولداۋ جانە سالتاناتتى تۇردە قۇرمەت كورسەتۋ داستۇرگە اينالعان. جۋىردا استانا قالاسىنىڭ اكىمى اسەت يسەكەشەۆ «التىن بەلگى» يەگەرى اتانعان ەلوردالىق 301 تۇلەكتى قۇتتىقتادى.
ۇكىلى ۇزدىكتەردى ماراپاتتاۋ ءراسىمىن استانا قالاسىنىڭ ءبىلىم باسقارماسى مەن وقۋشىلار سارايى ۇيىمداستىردى. «ەلوردا ماقتانىشى» اتتى مەرەكەلىك كەشتە سونىمەن قاتار حالىقارالىق تۋرنيرلەر مەن وليمپيادالاردىڭ جۇلدەگەرلەرى دە سىي-سىياپاتقا يە بولدى. اتالعان شاراعا ەلوردانىڭ قۇرمەتتى ازاماتتارى, ەسترادا ونەرپازدارى, مەكتەپ ۇستازدارى مەن اتا-انالار قاتىستى.
سالتاناتتى جيىندا اتالىپ وتكەندەي, بيىل سونداي-اق 373 تۇلەك ۇزدىك اتتەستات العان. قالا باسشىسى تۇلەكتەردى قۇتتىقتاي وتىرىپ, ەلوردا ۇزدىكتەرىنىڭ رەسپۋبليكالىق, حالىقارالىق وليمپيادالار مەن عىلىمي جوبالار كونكۋرستارىندا 281 مەدال, سونىڭ ىشىندە 121 التىن, 66 كۇمىس, 94 قولا مەدال جەڭىپ العانىن اتاپ ءوتتى.
«بيىل مەكتەپتەردەن دارىندى بالالار تۇلەپ ۇشۋدا. مىسالى, استاناداعى №9 «زەردە» دارىندى بالالارعا ارنالعان مەكتەپتىڭ وقۋشىسى ءنۇرالي سارباقىشتى بىردەن الەمنىڭ 7 ۋنيۆەرسيتەتى وقۋعا شاقىردى. ال ءاليحان قۇدايبەرگەنوۆ پەن ەرارسلان شاياحمەتوۆ – ماتەماتيكادان بارلىق حالىقارالىق وليمپيادالاردىڭ جەڭىمپازدارى. كەمەل نۇرداۋلەت فيزيكادان بارلىق حالىقارالىق وليمپيادالاردا التىن مەدال جەڭىپ العان. №60 مەكتەپ-ليتسەيدە ءبىلىم العان ۆاندەيكاستەل سينتيا سۋلۋ فرانتسۋز تىلىنەن رەسپۋبليكالىق وليمپيادانىڭ التىن مەدال يەگەرى اتانعان. مۇنداي ءبىلىمدى وقۋشىلار سانى جىل وتكەن سايىن ارتىپ كەلەدى. ارينە, بۇل ءبىزدى قۋانتادى. ءبىز ولاردى ماقتان تۇتامىز», دەدى ءا.يسەكەشەۆ.
اكىمنىڭ ايتۋىنشا, بيىل سۇرانىسى جوعارى ماماندىقتار بويىنشا جوعارى وقۋ ورىندارىنا 1 مىڭ گرانت بولىنەدى. ولاردىڭ ىشىندە web-ديزاينەرلەر, bim-مەنەدجەر-جوبالاۋشىلار, IT-ماماندار, قۇرىلىستاعى 3D-باسپا جوبالاۋشىلارى, ينجەنەر-ەلەكترونشىلار بار. اتالعان ماماندىقتارعا استانالىق العىر وقۋشىلاردىڭ كەدەرگىسىز تۇسەتىنىنە كەمەل بولاشاقتى جاستاردىڭ وزدەرى دالەل.
بيىل مەكتەپ ءبىتىرۋشى استانالىق تۇلەكتەردىڭ جالپى سانى 6229 وقۋشى ەكەنىن دە ايتا كەتكەن ءجون.
ميراس اسان,
«ەگەمەن قازاقستان»