بۇگىن قر پرەمەر-ءمينيسترى باقىتجان ساعىنتاەۆ IRONMAN 70.3 — ترياتلوننان حالىقارالىق جارىستىڭ ءبىرىنشى جەڭىمپازدارىن ماراپاتتادى. استانا الەمدەگى ءبىر كۇندىك اسا كۇردەلى سانالاتىن جارىس ءتۇرىن وتكىزەتىن تمد-داعى العاشقى قالاعا اينالدى, دەپ حابارلايدى primeminister.kz.
شارا ەلوردانىڭ 20 جىلدىق مەرەيتويى قارساڭىندا استانادا وتۋدە. جارىستىڭ قۇرمەتتى قوناقتارىنىڭ قاتارىندا قازاقستاننىڭ ترياتلون فەدەراتسياسىنىڭ پرەزيدەنتى كارىم ءماسىموۆ, مادەنيەت جانە سپورت ءمينيسترى ارىستانبەك مۇحامەدي ۇلى جانە ت.ب. بولدى.
ۇيىمداستىرۋشىلاردىڭ ايتۋىنشا, سپورت جارىسىنا الەمنىڭ 47 ەلىنەن 1300-دەن استام سپورتشى قاتىستى, ولاردىڭ 700-گە جۋىعى — قازاقستاندىقتار. قاتىسۋشىلار اراسىندا جارىستا العاشقىلاردىڭ ءبىرى بولىپ مارەگە جەتكەن وليمپيادا چەمپيوندارى سەرىك ساپيەۆ پەن الەكساندر ۆينوكۋروۆ, سونداي-اق «سەنىڭ جاڭا قىرىڭ» قوزعالىسىنىڭ كوشباسشىسى ۆاليحان تەن, كۋيلا-كونەدە IRONMAN الەم چەمپيوناتىنا قاتىسقان پاۆەل ارتيۋشەنكو, ترياتلونشى توماس درەيەر جانە الەمدىك ترياتلون تاريحىنا ەنگەن وزگە دە سپورتشىلار بولدى.
باقىتجان ساعىنتاەۆ ءبىرىنشى جۇگىرىستىڭ ءابسوليۋتتى چەمپيوندارىن: ايەلدەر اراسىندا — ديدرا كەيسيدى (Deirdre Casey — يرلانديا) جانە ەرلەر اراسىندا — پيتەر ۆولكوۆيچتى (Peter Wolkowicz — گەرمانيا) قۇتتىقتادى. ولار 113 شاقىرىم قاشىقتىقتا ءۇش ۇزدىكسىز كەزەڭدى ەڭسەردى.
سونداي-اق, جۇلدەلى ورىنداردىڭ جەڭىمپازدارى انىقتالدى: ەرلەر اراسىندا ءىى ورىندى ۆيكتور الەشين (رەسەي), ءىىى ورىندى سەرگەي حازوۆ (رەسەي) الدى. ەكىنشى ورىندا ايەلدەر اراسىندا ليۋبوۆ پوليانسكايا (رەسەي), ءۇشىنشى ورىندى يزابەللا سوبانسكا (پولشا) يەلەندى.
IRONMAN — جالپى ۇزىندىعى 113 شاقىرىم (70,3 ميل) بولاتىن ءجۇزۋ (1,9 كم), ۆەلوجارىس (90 كم), جۇگىرۋ (21,1 كم) سەكىلدى ءۇش ۇزدىكسىز كەزەڭنەن تۇراتىن ءبىر كۇندىك جارىس. تولىق قاشىقتىقتى ەڭسەرىپ شىققان سپورتشىعا «تەمىر ادام» اتاعى بەرىلەدى. ترياتلونشىلار وسى جىلدىڭ قىركۇيەك ايىندا وڭتۇستىك افريكادا وتەتىن الەم چەمپيوناتىنا قاتىسۋ ءۇشىن 50 سلوتقا كۇرەسۋدە.