قازىر ەلىمىزدە كينو سالاسى جاقسى دامىپ كەلە جاتىر. بۇلدىرشىندەرىمىزدىڭ تالعامىنا قاراي, كوپتەگەن مۋلتيكتەر ءوز ەلىمىزدە دايىندالادى. سونىمەن قاتار وزگە ەلدىڭ مۋلتفيلمدەرىن قازاق تىلىندە سويلەتىپ ءجۇرمىز.
جاقىندا قازاق تىلىندەگى فيلمدەر قاتارىنا تاعى ءبىر ۇزدىك تۋىندى كەلىپ قوسىلدى. اقش–تىڭ كينورەجيسسەرى برەد بەردتىڭ شىعارماسى, ءارتۇرلى قاسيەتتەرگە يە وتباسى تۋرالى «سۋپەر وتباسى-2» قازاق تىلىندە 14-ءشى ماۋسىمنان باستاپ بارلىق كينوتەاترلاردا كىشكەنتاي كورەرمەندەرىمىزگە جول تارتتى. ۇلكەن ەكرانداردا كورسەتىلەتىن فيلمگە تەاتر ارتىستەرى قازاق تىلىندە دۋبلياج جاسادى. اكتەرلەردىڭ تابيعي داۋىسى ءار سيۋجەتكە جان ءبىتىرىپ وتىردى. اتاپ ايتساق: سايا توقمانعاليەۆا (اناسى – ەلاستيك), جانىبەك مۇقاەۆ (اكەسى – بوب), ديدار قۇرالباەۆ ء(ۇيدىڭ كىشكەنتايى – دەش), ايكوركەم ادىلگەرەەۆا (اپكەسى – باليتبار), دىبىستادى. رەجيسسەرى – شاح-مۇرات ورداباەۆ. اسىرەسە اكەسىنىڭ سويلەگەنى قازاقى بولمىسقا ءدال كەلتىرىلىپ, شەبەر دىبىستالعان. قازاقى ءتول سوزدەرىمىزدى ورىندى قولدانىپ, كورەرمەندى كۇلكىگە قارىق قىلدى.
ءماجىلىس دەپۋتاتى, «بولاشاق» قاۋىمداستىعىنىڭ توراعاسى باقتيار ماكەن «ەڭ الدىمەن بۇلدىرشىندەرىمىزبەن ولاردىڭ اتا-انالارىن تۋىندىنىڭ قازاقشا دىبىستالۋىمەن قۇتتىقتاپ, ەلباسىمىز ن.ءا.نازارباەۆتىڭ «رۋحاني جاڭعىرۋ» باعدارلاماسىنىڭ اياسىندا وتاندى ءسۇيۋ, وتباسى قۇندىلىقتارىن, مەملەكەتتى ءسۇيۋ, انا تىلگە دەگەن مارتەبەنى وسكەلەڭ ۇرپاق بويىنا ءسىڭىرۋ ارقىلى دامىتۋدى كوزدەپ وتىرمىز. بولاشاقتىڭ كەپىلى ءبىزدىڭ – جاستارىمىز», دەگەن ىقىلاس-نيەتىن ءبىلدىردى.
ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ءارتىسى, «سەرپەر» جاستار سىيلىعىنىڭ يەگەرى سايا توقمانعاليەۆا «بارلىق تۋىندىلار بالاقايلار ءۇشىن دىبىستالىپ جاتىر, اتقارعان قىزمەتىمىز كورەرمەندەرگە جاقسى پىكىر, وي قالىپتاستىرادى دەپ سەنەمىن. قازاقشا سويلەۋدى – وزىڭنەن باستا», دەگەن ويىمەن ءبولىستى.
كەلەر جىلى قازاق تىلىندە 3 انيماتسيالىق فيلم «مونسترلار دەمالىستا-3», «شاقىلداق جانە ءتورت پاتشالىق», «رال ينتەرنەتكە قارسى» كورەرمەندەرگە ۇسىنىلماق. جالپى وسى ۋاقىتقا «BI-group» كومپانياسى, «بولاشاق» قاۋىمداستىعىنىڭ قولداۋىمەن «وزىڭنەن باستا» اتتى جوبا اياسىندا «Aray media group» ستۋدياسىندا بارلىعى 23 فيلم ءوز انا تىلىمىزگە اۋدارىلعان.
ەلىمىزدە قازاق تىلىندە فيلمدەر سانىنىڭ ارتۋى ءبىزدى قۋانتادى. بۇل يگى ىستەردىڭ بارلىعى قازاق ءتىلى مارتەبەسىن قازىرگى زاماناۋي قۇرىلعىلار, زاماناۋي كومۋنيكاتسيالار ارقىلى دامىتۋدىڭ بىردەن-ءبىر جولى. وسى ۋاقىتقا دەيىن قازاق تىلىندە دىبىستالعان فيلمدەردى «ivi.ru» سايتى ارقىلى تاماشالاۋعا مۇمكىندىك بار.
شاكەباەۆا اينۇر,
2 كۋرس ستۋدەنتى