العاش رەت سەگىزدىك فورماتىندا وتكەن شانحاي ىنتىماقتاستىق ۇيىمىنىڭ 18-ءشى سامميتىندە تسينداو دەكلاراتسياسى قابىلداندى. قۇجاتقا ۇيىمعا مۇشە 8 مەملەكەتتىڭ باسشىلارى قول قويدى, دەپ حابارلايدى قازاقپارات.
سونداي-اق پرەزيدەنتتەر 17 قۇجاتتى راسىمدەدى. ولاردىڭ قاتارىندا شىۇ-عا مۇشە مەملەكەتتەر باسشىلارى كەڭەسىنىڭ شىۇ-عا مۇشە مەملەكەتتەردىڭ ۇزاقمەرزىمدى تاتۋ كورشىلىك, دوستىق جانە ىنتىماقتاستىق تۋرالى شارت ەرەجەسىن جۇزەگە اسىرۋدىڭ 2018-2022 جىلدارعا ارنالعان ءىس-قيمىل جوسپارىن بەكىتۋ جونىندەگى شەشىمى, 2019-2021 جىلدارعا ارنالعان تەرروريزم, سەپاراتيزم جانە ەكسترەميزمگە قارسى ءىس-قيمىلداعى ىنتىماقتاستىق باعدارلاماسىن بەكىتۋ شەشىمى, 2018-2023 جىلدارعان ارنالعان ەسىرتكىگە قارسى ستراتەگياسىن جانە ونى ورىنداۋ جونىندەگى ءىس-قيمىل باعدارلاماسىن بەكىتۋ شەشىمى, ازىق-ت ۇلىك قاۋىپسىزدىگى بويىنشا ىنتىماقتاستىق باعدارلاماسى جوباسىن ازىرلەۋ جونىندەگى شەشىمى, قورشاعان ورتانى قورعاۋ سالاسىنداعى ىنتىماقتاستىق تۇجىرىمداماسىن بەكىتۋ تۋرالى شەشىمى سىندى 12 قۇجات بار.
مۇنان بولەك, شىۇ-عا مۇشە مەملەكەت باسشىلارىنىڭ جاستارعا بىرلەسكەن ۇندەۋى, شىۇ كەڭىستىگىندەگى ەپيدەميالىق قاتەرگە قارسى ورتاق ءىس-قيمىل تۋرالى بىرلەسكەن مالىمدەمەسى, ساۋدا پروتسەدۋراسىن جەڭىلدەتۋ جونىندەگى بىرلەسكەن مالىمدەمەسى قابىلداندى.
قۇجاتتارعا قازاقستان پرەزيدەنتى نۇرسۇلتان نازارباەۆ, قحر توراعاسى سي تسزينپين, رەسەي پرەزيدەنتى ۆلاديمير پۋتين, قىرعىز پرەزيدەنتى سوورونباي جەەنبەكوۆ, پاكىستان پرەزيدەنتى مامنۋن حۋسەين, تاجىكستان پرەزيدەنتى ەمومالي راحمون, وزبەكستان پرەزيدەنتى شاۆكات ميرزيەەۆ, ءۇندىستان پرەمەر-ءمينيسترى نارەندرا مودي قول قويدى.