داۋرەن اباەۆ ۇزدىك الەۋمەتتىك روليكتى جاريالادى

"قۇرمەتتى دوستار! "نيەت" بايقاۋىنىڭ جەڭىمپازى دميتري گالابيردىڭ ستسەناريى بويىنشا تۇسىرىلگەن الەۋمەتتىك روليكتى نازارلارىڭىزعا ۇسىنامىن!", - دەپ جازدى مينيستر ءوزىنىڭ الەۋمەتتىك جەلىدەگى پاراقشاسىندا.

ايتا كەتەيىك, بۇگىن استانادا "نيەت" بايقاۋىنىڭ جەڭىمپازدارى ماراپاتتالدى. بايقاۋدىڭ نەگىزگى ماقساتى - الەۋمەتتىك بەينەروليكتەردىڭ ۇزدىك ستسەناريلەرىن انىقتاۋ. بايقاۋدىڭ باس جۇلدەسىن الماتىلىق دميتري گالابير جەڭىپ الدى. وعان 1 ميلليون تەڭگە كولەمىندە سىياقى تابىستالدى. سونداي-اق, مينيستر ۇزدىك الەۋمەتتىك روليكتە باستى ءرولدى ويناعان شەرxان ەسىمدى بالانى ارنايى سىيلىقپەن ماراپاتتادى. ەكىنشى ورىندى قۋانىش وماروۆ يەلەندى. وعان Apple MacBook تابىستالدى. ال ءۇشىنشى ورىننىڭ يەسى - رينات تۇرعانبەكوۆ Canon فوتوكامەراسىن ۇتىپ الدى. بۇدان بولەك, ۇزدىك ستسەناريلەردىڭ ءتورت اۆتورىنا ارنايى ديپلومدار مەن ىنتالاندىرۋ سىيلىقتارى تابىس ەتىلدى. ولاردىڭ ستسەناريلەرى بويىنشا بەينەروليكتەر ءالى تۇسىرىلگەن جوق.