2018 جىلعى 1-4 ماۋسىم ارالىعىندا ە. ومىرزاقوۆ اتىنداعى قوستاناي وبلىستىق فيلارمونياسىنىڭ «اقجەلەڭ» فولكلورلىق ءانسامبلى «رۋحاني جاڭعىرۋ» باعدارلاماسىنىڭ شەڭبەرىندە جانە استانانىڭ 20 جىلدىعىنا وراي مىسىردا ءوتىپ جاتقان «رامازان كەشتەرى» اتتى حالىقارالىق مۇسىلمان حالىقتارىنىڭ فەستيۆالىنە قاتىستى.
ءىس-شارا بارىسىندا قوستانايلىق ارتىستەر كاير جانە دامانحۋر قالالارىنىڭ وپەرالىق تەاترلارىندا كونتسەرت قويدى.
حالىق اسپاپتارىنان قۇرالعان ءانسامبلدىڭ ونەرىن مىسىرلىق ونەرسۇيەر قاۋىم ىقىلاسپەن تىڭدادى. قازاق مۋزىكاسىن ەرەكشەلەندىرەتىن ۇلكەن مۇرا قازاقتىڭ ءتۇرلى كۇيلەرى جۇرتشىلىقتى تاڭ قالدىردى. «اقجەلەڭ» ءانسامبلى قورقىتتىڭ قوبىز سارىندارى, قۇرمانعازىنىڭ كۇيلەرى, سۇگىر مۇرالارى سياقتى حالقىمىزدىڭ ۇرپاقتان ۇرپاققا بەرىلىپ كەلە جاتقان اۋەندەرىن جوعارى دەڭگەيدە ورىنداي وتىرىپ, قازاق مادەنيەتىنىڭ جاسامپازدىعىن اراب قاۋىمىنا پاش ەتتى.
كونتسەرتتەر مىسىر تەلەديدارىنان تىكەلەي ەفيردەن كورسەتىلدى جانە بىرنەشە رەت قايتالاندى. سونىمەن قاتار, «اقجەلەڭ» ءانسامبلى مىسىرلىق ء«نىل-مادەنيەت» تەلەارناسىنىڭ تىكەلەي ەفيرىنەن «باس قوسۋ» اتتى 3 ساعاتتىق باعدارلاماسىنىڭ قوناعى بولدى. ەلشى ارمان يساعاليەۆتىڭ ەلىمىزدىڭ ساياسي-ەكونوميكالىق جەتىستىكتەرى, ەلباسىنىڭ باستامالارى, قازاقستان مەن مىسىر اراسىنداعى ەكىجاقتى قاتىناستار تۋرالى بەرگەن سۇحباتىمەن باستالعان ءىس-شارادا قوستانايلىق ونەرپازدار كورەرمەندەردى دومبىرا, قوبىز سياقتى حالىق اسپاپتارىمەن تانىستىرىپ, ءتۇرلى كۇيلەردى ورىندادى. سونىمەن قاتار, كۇيلەردىڭ قىزىقتى حيكايالارى باياندالدى.
ءىس-شارا بارىسىندا قازاق ادەبيەتىنە دە نازار اۋدارىلدى. «كوشپەندىلەر» تريلوگياسىن اۋدارعان پروفەسسور م.رياد جانە «موڭعول قىزى», «الجير» اتتى رومانداردىڭ اۆتورى مىسىرلىق جازۋشى م.حاليم ءسوز سويلەپ, قازاقستاندىق مادەنيەت بويىنشا وي-پىكىر الماستى.
«ON Live» ارناسىنىڭ تاڭەرتەڭگى «Sabah ON» باعدارلاماسىندا «اقجەلەڭ» ءانسامبلىنىڭ مۇشەسى ىبىراي ەسجانوۆ قوناقتا بولىپ, كورەرمەندەردى قازاق دومبىراسىنىڭ ەرەكشەلىكتەرىمەن تانىستىردى. «اقساق قۇلان», «كوڭىل تولقىنى» جانە ت.ب. كۇيلەردى كەرەمەت ورىنداپ بەردى.
جالپى العاندا, «جاھاندىق الەمدەگى قازاقستاندىق زاماناۋي مادەنيەت» جوباسىنىڭ شەڭبەرىندە ىسكە اسىرىلعان ءىس-شارا تابىستى ءوتتى. باسقا حالىقتاردىڭ مادەنيەتىندە كەزدەسپەيتىن قازاق ۇلتىنىڭ اسپاپتىق پەساسى بولىپ تابىلاتىن «كۇي» جانرى مىسىرلىق قاۋىمدى تاڭ قالدىردى. «اقجەلەڭنىڭ» ونەرپاز ارتىستەرى ورىنداعان مۋزىكادان اسەر العان مىسىر حالقى قازاق مادەنيەتىمەن ودان ءارى تانىسۋعا نيەتتى.