تاۋەلسىزدىكتىڭ العاشقى جىلدارى, ياعني 1993 جىلى وڭتۇستىك قازاقستان وبلىسىنداعى ماقتاارال اۋدانىندا ء«مىرزاشول جۇلدىزدارى» اتتى جاس انشىلەردىڭ ونەر بايقاۋى ۇيىمداستىرىلعان بولاتىن. تىڭ باستاما اۋىل, اۋداندارداعى كوپتەگەن تالانتتاردى ەلگە تانىتتى. ونەردە ءوز دارىنىن دالەلدەپ, بيىكتەن كورىنۋىنە مۇمكىندىك جاسادى.
مىسالى, العاشقى بايقاۋدا باس جۇلدەنى ەنشىلەگەن جۇبانىش جەكسەن ۇلى بۇگىندە قازاقستاننىڭ ەڭبەك سىڭىرگەن قايراتكەرى, قازاق ەستراداسىنداعى جارىق جۇلدىزداردىڭ ءبىرى. ال بايقاۋدىڭ ەكىنشى جىلى وتىرار اۋدانىنان كەلىپ, باعىن سىناعان حاديشا شالاباەۆا باس جۇلدەنى يەلەندى. جاس دارىنداردىڭ جولىن اشۋ ماقساتىنداعى جاقسى باستاما ءتۇرلى سەبەپتەرمەن توقتاپ قالعان ەدى.
ماقتاارال اۋداندىق ىشكى ساياسات, مادەنيەت جانە تىلدەردى دامىتۋ ءبولىمىنىڭ مەڭگەرۋشىسى پەردەش ەسەنبەكوۆتىڭ ايتۋىنشا, ەكى مىڭىنشى جىلدارى بۇل ونەر بايقاۋى «ماقتاارال اۋەندەرى» دەگەن اتپەن وتە باستاعان. دەڭگەيى تومەندەپ, تەك اۋدان كولەمىندە عانا. «ەندى مىنە, ءمىرزاشول توپىراعىندا اراعا 23 جىل سالىپ ءان الامانى قايتادان جاندانىپ وتىر. بايقاۋدىڭ باستى ماقساتى – ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جاس بۋىندى وتانشىلدىققا تاربيەلەۋ, جاستاردىڭ ەسترادالىق ءان ورىنداۋ شەبەرلىگىن شىڭداۋ, ەل ىشىندەگى جاس تالانتتاردى قولداۋ, سونداي-اق ءمىرزاشول تۋرالى جاڭا اندەردى حالىق اراسىندا كەڭىنەن ناسيحاتتاۋ», – دەيدى پ.ەسەنبەكوۆ. قايتا قولعا الىنعان, استانا قالاسىنىڭ 20 جىلدىعى مەن ماقتاارال اۋدانىنىڭ 90 جىلدىق مەرەيتويىنا وراي وتكىزىلگەن بايقاۋعا وبلىستىڭ قالا, اۋداندارىنان 16-29 جاس ارالىعىنداعى 21 ءانشى قاتىستى.
ماقتاارال اۋدانى اكىمدىگىنىڭ قولداۋىمەن جانە اۋداندىق ىشكى ساياسات, مادەنيەت جانە تىلدەردى دامىتۋ ءبولىمىنىڭ ۇيىمداستىرۋىمەن وتكەن ونەر مەرەكەسىندە وبلىس اكىمى ج.تۇيمەباەۆ قازاق اندەرى – حالقىمىزدىڭ باعا جەتپەس بايلىعى, سارقىلماس قازىناسى ەكەنى, ىرگەسى بەرىك, سۇيەگى مىعىم مەملەكەت قۇرۋدىڭ نەگىزگى العىشارتتارىنىڭ ءبىرى حالىقتىڭ مادەني-رۋحاني تۇرعىدان دامۋى ەكەنىن اتاپ ءوتتى.
بايقاۋ قورىتىندىسى بويىنشا باس جۇلدەنى ماقتاارالدىق ءانشى ءارىپحان نۇريسلام, ءى ورىندى شىمكەنتتىك «سارىن» توبى يەلەندى. ال ءىى ورىنعا ورداباسى اۋدانىنىڭ تۇرعىنى اينۇر اۋباكيروۆا, ءىىى ورىنعا شاردارالىق جاندوس اشىربەكوۆ پەن تۇركىستاندىق ءبىرجان ساپاربەكوۆا لايىقتى دەپ تانىلدى. جەڭىمپازدارعا بەرىلگەن جۇلدە دە قوماقتى. اتاپ ايتساق, باس جۇلدەگە – 1 ميلليون تەڭگە, 1-ورىنعا – 500 مىڭ تەڭگە, 2-ورىنعا – 400 مىڭ, 3-ورىنعا – 300 مىڭ جانە قالعان ورىندارعا 50-100 مىڭ تەڭگە ارالىعىندا اقشالاي سىيلىقتار بەرىلدى. ونەرسۇيەر قاۋىم قايتا جاڭعىرعان بايقاۋدىڭ ەندى جىل سايىن وتكىزىلىپ تۇراتىنىنا سەنىمدى.
عالىمجان ەلشىباي, «ەگەمەن قازاقستان»
وڭتۇستىك قازاقستان وبلىسى