ەۋروپا فۋتبول قاۋىمداستىعىنىڭ وداعى (ۋەفا) كەلەسى ماۋسىمنان باستاپ ەۋروپا ليگاسىنا رەبرەندينگ جاساماق. بۇل تۋرالى ۇيىمنىڭ رەسمي سايتى مالىمدەدى.
ۋەفا رەسمي سايتىنىڭ تاراتقان مالىمەتىنە سەنسەك, ءتۋرنيردىڭ ءانۇرانى جانە رەسمي دوبى وزگەرەدى. «ەۋروپا ليگاسىنىڭ نەگىزگى ەلەمەنتتەرى سانالاتىن لوگوتيپ پەن ونىڭ ءتۇسى وزگەرىسسىز قالادى, بىراق ۆيزۋالدى ورنەكتەر باتىل جانە انىق سيپاتتارعا يە بولدى. فۋتبولشىلار مەن جانكۇيەرلەر اراسىنداعى بايلانىستى بەينەلەيتىن قۋات تولقىنى سىزىلعان سىزىقتار مەن ۇشاقتاردىڭ قاناتى ارقىلى بۇكىل ەۋروپا بويىنشا كلۋبتاردىڭ ساياحاتىنا كوز جەتكىزۋگە بولادى», دەپ جازادى رەسمي سايت.
ۋەفا اتالعان وزگەرىستەر ءتۋرنيردىڭ ابىرويى مەن ماڭىزدىلىعىن ارتتىرا تۇسەدى دەپ ەسەپتەيدى.
الىپتار ايقاسى 21 شىلدەدە وتەدى
بۇكىلالەمدىك بوكس سۋپەر سەرياسىنىڭ اۋىر سالماقتاعى WBC جانە WBO الەم چەمپيونى ۋكراينالىق الەكساندر ۋسيك (14-0, 11 كو) پەن رەسەيلىك بوكسشى مۇرات گاسسيەۆ (26-0, 19 كو) اراسىندا وتەتىن جەكپە-جەكتىڭ وتەتىن كۇنى بەلگىلى بولدى.
بۇل تۋرالى رەسەيلىك بوكسشىنىڭ جاتتىقتىرۋشىسى ابەل سانچەس مالىمدەدى. شەتەلدىك باسىلىمدارعا بەرگەن سۇحباتىندا ول كەيىنگە شەگەرىلگەن جەكپە-جەك 21 شىلدەدە وتەتىنىن ايتقان. «بىزگە بوكس كەشىن ۇيىمداستىرۋشى تاراپ جەكپە-جەكتىڭ 21 شىلدە كۇنى وتەتىنىن ايتقانىمەن, ناقتى قاي ەلدە ۇيىمداستىرىلاتىنىن ايتقان جوق. بۇل ءبىر تۇسىنىكسىز جاعداي بولىپ تۇر», دەيدى ول.
ايتا كەتەيىك, بۇعان دەيىن گاسسيەۆ-ۋسيك جەكپە-جەگى 11 مامىردا ساۋد ارابياسىندا وتەدى دەپ جوسپارلانعان بولاتىن. الايدا كەزدەسۋگە دايىندىق بارىسىندا ۋكراينالىق بوكسشىنىڭ جاراقات الىپ قالۋىنا بايلانىستى كەزدەسۋ مەرزىمىن كەيىنگە شەگەرگەن-ءدى.
لەمپارد چەمپيونشيپ كومانداسىن جاتتىقتىرادى
انگليا قۇراماسى مەن «چەلسي» كومانداسىنىڭ بۇرىنعى جارتىلاي قورعاۋشىسى فرەنك لەمپارد «دەربي كاۋنتي» كلۋبىنىڭ باس جاتتىقتىرۋشىسى بولىپ تاعايىندالدى.
چەمپيونشيپتىڭ 2017/18 جىلعى ماۋسىمىندا «دەربي كاۋنتي» 6-ورىن يەلەنىپ, پرەمەر-ليگا ءۇشىن بەرىلەتىن جولداماعا قول جەتكىزگەن-ءدى. الايدا پلەي-وفف كەزەڭىندە «فۋلحەم» كومانداسىنان جەڭىلىپ, جوعارى توپقا شىعا المادى.
ايتا كەتەيىك, لەمپاردتىڭ ءوزى فۋتبولشى كارەراسىن 2017 جىلدىڭ اقپان ايىندا اياقتاعان ەدى. جاتتىقتىرۋشى رەتىندە تاجىريبەسى جوق فۋتبولشىنىڭ جاتتىقتىرۋشى اتانعانىنا بارلىق جانكۇيەرلەر تاڭدانىسىن ءبىلدىرىپ جاتىر.
دايىنداعان ءالي بيتورە, «ەگەمەن قازاقستان»