ورالدا «اسىل ميراس» اۋتيزم ورتالىعى اشىلدى

– وتكەن جىلى ورالدا «Samruk-Kazyna Trust» كومپانياسى مەن «دارا» قورىنىڭ الەۋمەتتىك باعدارلاماسى شەڭبەرىندە تۇڭعىش رەت كوررەكتسيالىق ورتالىق اشىلعان بولاتىن. زاچاگانسك كەنتىندە ەرەكشە بالالارعا ارنالعان ورتالىق جەرگىلىكتى مەتسەناتتار كۇشىمەن سالىنىپ جاتىر. بۇگىن اشىلىپ وتىرعان «اسىل ميراس» ورتالىعىندا دا مىقتى ماماندار ەرەكشە بالالارمەن جۇمىس ىستەيتىن بولادى. مۇنىڭ ءبارى تاعدىر تاۋقىمەتىنە ۇشىراعان سابيلەرىمىزگە ۇلكەن كومەك, - دەدى ءوزى سوزىندە باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ.

بولاتا وتەمۇراتوۆ قورىنىڭ ديرەكتورى مارات ايتماعامبەتوۆتىڭ ايتۋىنشا, «اسىل ميراس» اۋتيزم ورتالىقتارى قازاقستاندا 2015 جىلدان باستاپ اشىلا باستاعان. سودان بەرى ەلىمىز بويىنشا 3622 بالا قورعا حابارلاسىپ, كومەك سۇراپتى.

– وسىلاردىڭ ىشىنەن 2608 بالا مامانداندىرىلعان دياگنوستيكالىق تەكسەرۋدەن ءوتتى. باعدارلاما بويىنشا 2 151 بالاعا تەگىن كومەك كورسەتىلدى. ورتالىققا عىلىممەن دالەلدەنگەن, ەڭ ءتيىمدى ادىستەمەلەر قولدانىلادى. ورال قالاسىندا دا ءبىز مۇقتاج جاندارعا بارىنشا كومەك كورسەتەمىز دەپ ويلايمىن. مۇنداي بالالار مەن ولاردىڭ اتا-اناسى قوعامنىڭ كومەگىن سەزىنۋى وتە ماڭىزدى, - دەيدى م.ايتماعامبەتوۆ.

جاڭا ورتالىقتا بالالاردىڭ سال اۋرۋىنا ۇشىراعاندار ءۇشىن زاماناۋي جابدىقتار, «اكروبات» ترانسفورمەرى, باسقا دا قۇرالدار – بارلىعى 7 980 مىڭ تەڭگەنىڭ مۇلكى ورنالاستىرىلعان ەكەن.

«بايتەرەك» قوعامدىق بىرلەستىگىنىڭ جەتەكشىسى مەرۋەرت سانكاەۆا ورتالىقتى باعدارلامالىق قامتۋ مىندەتىن دە ب.وتەمۇراتوۆ قورى ءوز موينىنا العانىن ايتادى. ورالدىق «اسىل ميراس» ورتالىعىندا ارنايى دايىندىقتان وتكەن 8 مامان قىزمەت ەتپەك. مۇندا كەلۋشىلەرگە ەرتە كومەك, سويلەۋ داعدىسىن دامىتۋ, ورتاعا بەيىمدەۋ, الەۋمەتتىك جانە تۇرمىستىق تۇيسىكتى قالىپتاستىرۋ سەكىلدى مامانداندىرىلعان ساباقتار جۇرگىزىلەدى.

باتىس قازاقستان وبلىسىندا اۋتيزم دياگنوزى قويىلعان 140 بالا بار, ونىڭ 47-ءسى ورال قالاسىندا تۇرادى. ولاردىڭ جاس مولشەرى 7 مەن 15 جاس ارالىعىندا.

قازبەك قۇتتىمۇرات ۇلى,

«ەگەمەن قازاقستان»

ورال قالاسى

سۋرەتتى تۇسىرگەن دينارا كەندىرباەۆا