ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ «رۋحاني قازىنا» كىشى باعدارلاماسى اياسىندا تاراز قالاسىنداعى «بالاساعۇن» ورتالىق كونتسەرت زالىندا قازاقستان رەسپۋبليكاسىنىڭ حالىق ءارتىسى, مەملەكەتتىك سىيلىقتىڭ لاۋرەاتى التىنبەك قورازباەۆتىڭ ء«ان-جىرىم ساعان, تۋعان ەل!» اتتى ءان كەشى ءوتتى. اتالعان ونەر كەشىن جامبىل وبلىستىق مادەنيەت, ارحيۆتەر جانە قۇجاتتاما باسقارماسى ۇيىمداستىردى.
اۋەلى ساحناعا التىنبەك قورازباەۆتىڭ ءوزى كوتەرىلىپ, ەسترادالىق-سيمفونيالىق وركەستردىڭ سۇيەمەلدەۋىمەن «قاراشا قاز, قايداسىڭ؟», «تاۋداعى كوكتەم», «ەلگە سالەم» اندەرىن ورىندادى. ونەر كەشىندە التىنبەك قورازباەۆ ۇلى كۇيشى, داۋلەسكەر دومبىراشى نۇرعيسا تىلەنديەۆتى ءوزىنىڭ ۇستازى سانايتىنىن ايتىپ, كوپشىلىككە ءوزىنىڭ ونەر جولىن اڭگىمەلەپ بەردى.
ءتىپتى كەيبىر تانىمال اندەرىنىڭ دۇنيەگە كەلۋ تاريحىنا دا توقتالىپ, كورەرمەننىڭ قىزىعۋشىلىعىن ارتتىردى. سونىمەن قاتار ماقپال ءجۇنىسوۆا, «مۋزارت» توبى, سايات مەدەۋوۆ, توقتار سەرىكوۆ, بەيبىت سەيدۋاليەۆا, الما امانجولوۆا, جانبولات ەرباتىروۆ, جازيرا بايىربەكوۆا, جۇبانىش جەكسەن ۇلى جانە وزگە دە ەسترادا انشىلەرى اۋليەاتا كەڭىستىگىن انگە بولەپ, التىنبەك قورازباەۆتىڭ «ساعىندىم كەنەن اتامدى», «ۇشقوڭىر», «اگۋگاي, دومبىرا», «ساعىندىم الماتىمدى», «اقمونشاقتى اۋىلىم» اتتى اندەرىن ناقىشىنا كەلتىرە ورىندادى.
التىنبەك قورازباەۆ بۇل كۇندە حالىققا ەلۋدەن استام ءان مەن بىرنەشە كۇي جانە ەكى درامالىق سپەكتاكل مۋزىكاسىنىڭ اۆتورى رەتىندە تانىمال. ال قاسيەتتى قارا دومبىرانى جانىنا سەرىك ەتىپ, قوڭىر ۇنىمەن قازاق ونەرىنىڭ اتاعىن اسپانداتقان التىنبەك بۇل كۇنى تۋعان توپىراعىنا تاعزىم ەتىپ, حالقىمەن قاۋىشتى. تۋعان دالاسىن انگە بولەپ كەلە جاتقان ونەر يەسى سونىمەن قاتار بىرنەشە شاكىرت تاربيەلەگەن ۇستاز رەتىندە دە بەلگىلى. ماسەلەن, بۇل كۇنى التىنبەك قورازباەۆ پەن مەيرامبەك بەسپاەۆتىڭ قوسىلا شىرقاۋىنداعى «سەن مەنى ساعىندىڭ با؟» ءانى ۇستاز بەن شاكىرت اراسىنداعى اسەرلى كورىنىستەردى بەينەلەدى.
ايتا كەتەيىك, ءان كەشىنەن تۇسكەن قارجىعا تاراز قالاسىنىڭ №30 مەكتەپ-گيمنازياسىنان اشىلاتىن ءىت-باعدارلاماسىنا التىنبەك قورازباەۆتىڭ ارنايى سەرتيفيكاتى تابىستالدى.
حاميت ەسامان,
«ەگەمەن قازاقستان»
جامبىل وبلىسى