بيىلعى «بوزتورعاي» بايقاۋىنا 800-دەن اسا دارىندىبالا قاتىسادى. بۇل تۋرالى بۇگىن الماتى قالاسى وڭىرلىك كوممۋنيكاتسيالار قىزمەتىنىڭ الاڭىندا حح «بوزتورعاي» بالالار شىعارماشىلىعى حالىقارالىق بايقاۋىنا ارنالعان ءباسپاسوز ماجىلىسىندە ايتىلدى.
ءباسپاسوز ماجىلىسىنە كسرو حالىق ءارتيسى, سوتسياليستىك ەڭبەك ەرى, اكادەميك بيبىگۇل تولەگەنوۆا, كومپوزيتور, قر ەڭبەك سىڭىرگەن قايراتكەرى, پروفەسسور كەڭەس دۇيسەكەەۆ, رەسەي مادەنيەتىنىڭ ەڭبەك سىڭىرگەن قايراتكەرى, ۆيتەبسكدەگى سلاۆيان بازارىنىڭ رەسەيدەگى شتابىنىڭ ديرەكتورى نيكولاي كريۆەنكو, «بوزتورعاي» بالالار شىعارماشىلىعى حالىقارالىق بايقاۋىنىڭ ديرەكتورى قارلىعاش ابدىكارىموۆا قاتىستى.
قارلىعاش ابدىكارىموۆانىڭ ايتۋىنشا, ءداستۇرلى «بوزتورعاي» بالالار شىعارماشىلىعى حالىقارالىق كونكۋرسى الماتىدا وسىمەن جيىرماسىنشى رەت وتپەك. وتكەن جىلدارداعىداي, كونكۋرس الماتى قالاسىنىڭ ورتالىق دەمالىس ساياباعىندا بار ءسان-سالتاناتىمەن وتەدى.
بيىلعى بايقاۋعا قازاقستاننىڭ بارلىق ايماقتارىنان جانە قىرعىزستان, وزبەكستان, رەسەي, بەلورۋسسيا, ۋكراينا, ارمەنيا, گرۋزيا, ازەربايجان, ليتۆا, لاتۆيا, بولگاريا, يتاليا, چەحيانىڭ ەلدەرىنىڭ ونەرلى ورەندەرى كەلمەك. كونكۋرسقا 800 – دەن اسا بالا قاتىسادى,-دەپ حابارلادى بايقاۋ ديرەكتورى.
ايناش ەسالي,
«ەگەمەن قازاقستان».
الماتى