ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا تەگىن مەديتسينالىق كومەكتىڭ كەپىلدەندىرىلگەن كولەمىنىڭ (تمككك) جاڭارتىلعان ۇلگىسى تانىستىرىلدى. تمككك پاكەتى ەلباسىنىڭ بيىلعى جولداۋىندا بەرگەن تاپسىرماسى بويىنشا وڭتايلاندىرىلىپ جاتىر.
جيىنعا دەنساۋلىق ساقتاۋ ۆيتسە-ءمينيسترى ءلاززات اقتاەۆا, «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامىنىڭ باسقارما توراعاسى ەلەنا باحمۋتوۆا, دەنساۋلىق ساقتاۋ مينيسترلىگى فارماتسيا كوميتەتىنىڭ توراعاسى ليۋدميلا بيۋرابەكوۆا, «سك-فارماتسيا» جشس باسقارما توراعاسىنىڭ مىندەتىن اتقارۋشى ءشارىپ بەرىك قاتىستى.
پرەزيدەنت تاپسىرماسىنا سايكەس, وڭتايلاندىرۋ بارىسىندا مەديتسينالىق كومەكتىڭ قۇرىلىمىن قايتا قاراۋعا, قىمبات ستاتسيونارلىق كومەكتەن تيىمدىلىگى جوعارى پروفيلاكتيكالىق مەديتسيناعا كوشۋگە, ديسپانسەرلىك باقىلاۋدى اۋرۋدى باسقارۋ باعدارلامالارىنا ترانسفورماتسيالاۋعا دەن قويىلىپ وتىر. وسىنى ەسكەرە وتىرىپ, مەديتسينالىق قامسىزداندىرۋدىڭ ءۇش دەڭگەيلى جۇيەسى ۇسىنىلعان. ول جالپى جۇرتشىلىققا ارنالعان مينيمالدى الەۋمەتتىك ستاندارت, ياعني تمككك پاكەتى, الەۋمەتتىك مەديتسينالىق ساقتاندىرۋ جۇيەسىندە ساقتاندىرىلعاندارعا ارنالعان قىزمەتتەر پاكەتى, سونداي-اق مەديتسينالىق كومەكتىڭ وزگە قارجى كوزدەرىنەن قارجىلاندىرىلاتىن قوسىمشا كولەمى. تمككك-ءنىڭ جاڭا ۇلگىسى شۇعىل جانە كەزەك كۇتتىرمەيتىن جاعدايعا تاپ بولعان ءار ادامعا كومەك كورسەتۋگە جانە جۇرتشىلىق ءۇشىن ماڭىزى بار سىرقاتتاردى باقىلاۋدا ۇستاۋعا باعىتتالعان. تمككك پاكەتىنىڭ جان-جاقتى ناقتىلانعان ءتىزىمى ۇكىمەت قاۋلىسىمەن بەكىتىلەدى.
ءباسپاسوز ءماسليحاتى بارىسىندا دەنساۋلىق ساقتاۋ ۆيتسە-ءمينيسترى ل.اقتاەۆا جاڭا ۇلگىدەگى تمككك پاكەتى ءۇش كەزەڭ بويىنشا ەنگىزىلەتىنىن اتاپ ءوتتى. ء«بىرىنشى كەزەكتە بۇل – قولدانىستاعى تمككك پاكەتىندە قامتىلعان مەديتسينالىق كومەككە رەۆيزيا جاساۋ جانە كومەك ءتىزىمىن ناقتىلاۋ. ەكىنشىدەن, ءمامس جۇيەسىن ەنگىزە وتىرىپ, تمككك-ءنىڭ جاڭا ۇلگىسىن دامىتۋ, ۇشىنشىدەن, مەديتسينالىق تەحنولوگيالاردىڭ ۇزدىكسىز دامۋىن ەسكەرە وتىرىپ, تمككك جانە ءمامس پاكەتتەرىن تۇراقتى تۇردە جاڭارتىپ وتىرۋ», دەدى ول.
ل.اقتاەۆانىڭ ايتۋىنشا, تمككك پاكەتىندە باستاپقى مەديتسينالىق-سانيتارلىق كومەكتىڭ بارلىق تۇرلەرىنە كەپىلدىك بەرىلگەن. وعان بارلىق ازاماتتارعا ارنالعان نەگىزگى مەديتسينالىق قىزمەتتەر, نىسانالى توپتارعا ارنالعان سكرينينگتەر, جۇكتى ايەلدەر مەن 1 جاسقا دەيىنگى بالالاردى قاراۋ, سوزىلمالى جانە الەۋمەتتىك ماڭىزى بار اۋرۋلارعا شالدىققان تۇرعىنداردى تۇراقتى باقىلاۋ, ت.ب. جاتادى.
«25 مامىرداعى مالىمەتتەرگە سۇيەنسەك, الەۋمەتتىك مەديتسينالىق ساقتاندىرۋ قورى كەلىسىمشارت بەكىتكەن ەمدەۋ مەكەمەلەرىنە 310,7 ملرد تەڭگە قارجى تولەدى. بۇل حالىققا كەپىلدەندىرىلگەن مەديتسينالىق كومەك شەڭبەرىندە تەگىن قىزمەت كورسەتۋ جونىندە بەكىتىلگەن كەلىسىمشارت سوماسىنىڭ 45 پايىزىنا تەڭ. 2018 جىلى كەپىلدەندىرىلگەن تەگىن مەديتسينالىق كومەك شەڭبەرىندە بەكىتىلگەن كەلىسىمشارتتاردىڭ جالپى سوماسى 694 ملرد تەڭگەنى قۇراعان بولاتىن. قازىرگى تاڭدا قور 1463 مەديتسينا ۇيىمىمەن كەلىسىمشارت بەكىتكەن. ونىڭ 613-ءى جەكەمەنشىك كلينيكالار», دەدى «الەۋمەتتىك مەديتسينالىق ساقتاندىرۋ قورى» كەاق باسقارما توراعاسى ە.باحمۋتوۆا.
راۋان قايدار, «ەگەمەن قازاقستان»