«وتان – وتباسىنان باستالادى» دەگەن ۇلعاتتى ءسوزدىڭ ءمانىن ايشىقتايتىن «مەرەيلى وتباسى» بايقاۋى بيىل بەسىنشى رەت وتكىزىلىپ وتىر.
جاقىندا الماتى وبلىسىندا وسى بايقاۋ مارەگە جەتتى. وڭىردەگى ونەگەلى وتباسىلاردىڭ اراسىنان ۇزدىك اۋلەتتى انىقتاۋ جۇمىسى جىل بويى جۇرگىزىلگەن ەكەن. اۋەلگىدە بايقاۋعا قاتىسۋعا 500-گە جۋىق وتباسى ۇسىنىس ءبىلدىرىپتى. ولاردىڭ اراسىنان 38 وتباسى ىرىكتەلىپ, اقتىق سىنعا وتكەن.
- وتباسى بىرلىگىن, بۇتىندىگىن ساقتاۋ ءۇشىن قانداي قادام جاساعان دۇرىس؟ اسىرەسە جاستارعا وي سالاتىنداي شارالار قاجەت. بۇدان بەس جىل بۇرىن ەلباسى باستاماسىمەن جۇزەگە اسقان «مەرەيلى وتباسى» بايقاۋىنىڭ ميسسياسى وسى بولاتىن. قازىر بايقاۋعا قاتىسۋشى وتباسىلاردىڭ قاتارى كوبەيىپ, شاتتىعى شالقىعان شاڭىراق يەلەرىنىڭ سانى ارتقان- دەدى «مەرەيلى وتباسى» بايقاۋىنىڭ جەڭىمپازدارىن ماراپاتتاۋ ساتىندە وبلىس اكىمىنىڭ ورىنباسارى جاقسىلىق ومار.
بايقاۋ قورىتىندىسىندا قازىلار القاسىنىڭ شەشىمىمەن ءبىرىنشى دارەجەلى ديپلومدى تالدىقورعان قالاسىنان راحىمبەكوۆتەر وتباسى جانە جامبىل اۋدانىنان كاريباەۆتار اۋلەتى يەلەندى. ولارعا 1 000 000 تەڭگە اقشالاي سىياقى تابىس ەتىلدى.
راحىمبەكوۆتەر اۋلەتىنىڭ وتاعاسى مىقتىبەك مىرزا ونەگەلى وتباسىنىڭ يەسى عانا ەمەس, بىلىكتى باسشى, ءبىلىمدى زاڭگەر, مەتسەنات ازامات. «اينالايىن» بالالار ءۇيىنىڭ تۇلەكتەرى مەن جاعدايى تومەن وتباسىلارىنان شىققان 100 بالانى تەگىن وقىتىپ, ماماندىق مەڭگەرۋىنە سەپتىگىن تيگىزدى. وقۋ وزاتتارى مەن ونەر يەلەرىنە دە قارجىلىق تۇرعىدا دەمەۋ كورسەتىپ جۇرگەن قايىرىمدى جان. اۋلەتتىڭ وتاناسى قالقا بالجانوۆا دا ءبىلىم سالاسىندا ەڭبەك ەتۋدە. تالدىقورعان قالالىق «انالار القاسى» قوعامدىق بىرلەستىگىنىڭ ءتورايىمى. ونەگەلى وتباسىنىڭ ۇل-قىزدارى دا تابىستى ەڭبەك ەتىپ, ەلىمىزدىڭ دامۋىنا ۇلەس قوسۋدا. ال ەكىنشى «مەرەيلى وتباسىنىڭ» وتاعاسى ءبىرجان كاريباەۆ جەكە كاسىپكەر, ال وتاناسى ءاليا ابسەمەتوۆا حالىقارالىق ەكونوميست, جۋرناليست, ديزاينەر. اتالمىش وتباسى ەلىمىزدەگى بالالار قۇقىعىن قورعاۋ كوميتەتى مەن «ميلوسەرديە» ەرىكتىلەر قوعامى» قورىنىڭ بىرلەسكەن «كازاحستان بەز سيروت» جوباسىنا ءوز ۇلەسىن قوسۋدا. شاڭىراق يەلەرى ءبىرجان مەن ءاليا وزدەرىنىڭ ەكى ۇلىنا قوسا, قازاق, نەمىس, ورىس ۇلتىنان جەتى پەرزەنت اسىراپ الىپ, باۋىرىنا باسىپ وتىرعان جاندار. ءبىر وتباسىندا تاربيەلەنىپ جاتقان 6 ۇل, 3 قىز مەملەكەتتىك تىلدە ءبىلىم الۋدا. وزگە ۇلتتان اسىراپ العان ۇل-قىزدارىنىڭ بويىنا ۇلتتىق سالت-ءداستۇرلى سىڭىرە وتىرىپ, زامان تالابىنا ساي ءبىلىمدى ۇرپاق تاربيەلەۋدى ماقسات تۇتاتىن ونەگەلى وتباسى.
جەتىسۋدان شىققان قوس «مەرەيلى وتباسى» ءوڭىردىڭ نامىسىن رەسپۋبليكالىق بايقاۋدا قورعايتىن بولادى.
قالماحانبەت مۇقامەتقالي,
«ەگەمەن قازاقستان»
الماتى وبلىسى