مەملەكەت باسشىسىنىڭ تاپسىرماسىنا ساي قابىلدانعان «تسيفرلى قازاقستان» مەملەكەتتىك باعدارلاماسى قوعامنىڭ بارلىق سالاسىندا جان-جاقتى جۇزەگە اسىرىلۋدا. جەرگىلىكتى اكىمدىكتەردىڭ نازارىندا تۇرعان وسىناۋ ماسەلەگە «نۇر وتان» پارتياسى دا بەلسەنە اتسالىسىپ, ءبىلىم بەرۋ سالاسىن تسيفرلاندىرۋ, مەكتەپتەردە ەلەكتروندى كۇندەلىك جۇيەسىن ەنگىزۋ جانە باعدارلامالاۋ مەن روبوت تەحنيكا نەگىزدەرىن تەرەڭدەتىپ وقىتۋ شارالارىن جۇزەگە اسىرۋدا. اتالعان باعىتتا ماڭعىستاۋ وبلىسىندا ءىت سىنىپتار مەن ءىت مەكتەپتەر اشۋ جوسپارلانىپ وتىر.
ينفورماتيكا جانە اقپاراتتىق-كوممۋنيكاتسيالىق تەحنولوگيالاردى وقىتۋ ارقىلى وقۋشىلاردىڭ شىعارماشىلىق قابىلەتتەرىن دامىتۋ ماقساتىنداعى ءىت مەكتەپتەر مەن سىنىپتاردا ساباقتار ينفورماتيكا ءپانى مۇعالىمى نەمەسە ءىت ماماندارىنىڭ Love to Code جانە جاڭا باسقا دا باعدارلامالارمەن جۇمىس جاساۋدى ۇيرەتۋى ارقىلى جۇزەگە اسىرىلادى.
ازىرگە بۇل باستامالار مەكتەپتەردە فاكۋلتاتيۆتى ءپان رەتىندە ەنگىزىلىپ, 3-6 ايلىق كۋرس رەتىندە جۇرگىزىلەدى دە وقىتۋ ءۇردىسى مودۋلدىك جۇيە بويىنشا جۇزەگە اسادى. قازىرگى تاڭدا ماڭعىستاۋ وبلىسى بويىنشا جالپى ءبىلىم بەرەتىن 134 مەكتەپتىڭ بارلىعى ينتەرنەت جەلىسىنە قوسىلعان, ونىڭ ىشىندە 127 مەكتەپ, ياعني 94,7% كەڭجولاقتى ينتەرنەت جەلىسىمەن قامتاماسىز ەتىلگەن. سونداي-اق ماڭعىستاۋلىق مەكتەپتەر 75,3% Wi-Fi جەلىسىمەن قامتىلعان. قۇزىرلى ورىنداردىڭ مالىمدەۋىنە سايكەس, 2018 جىلى وڭىردەگى 33 مەكتەپتە ءىت سىنىپتارى اشىلادى.
مامىردىڭ سوڭعى كۇندەرى ءبىلىم سالاسىنان جاقسى جاڭالىق جەتتى. 21 مامىر كۇنى Nسوس كومپانياسىنىڭ دەمەۋشىلىگىمەن جەكەلەنگەن پاندەردى تەرەڭدەتىپ وقىتاتىن مامانداندىرىلعان فورت-شەۆچەنكو مەكتەپ-ينتەرناتىندا, 22 مامىردا «ەر ساي كاسپيان كونتراكتور» جشس قولداۋىمەن قۇرىق ورتا مەكتەپ گيمنازياسىندا, 23 مامىردا مەكتەپتى 2010 جىلعى ءبىتىرۋشى تۇلەكتەر كومەگىمەن قىزىلتوبە ليتسەيىندە ءىت سىنىپتارى اشىلدى. ەندى جاڭا وقۋ جىلىنا دەيىن اقتاۋ قالاسىنداعى مامانداندىرىلعان ەكونوميكالىق ليتسەيدىڭ بازاسىندا ءىت مەكتەبى اشىلادى دەپ جوسپارلانعان.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى