قازاق قىزى سامال ەسلياموۆانىڭ 71 حالىقارالىق كانن كينوفەستيۆالىندە «ەڭ ۇزدىك ايەل ءرولى» اتالىمىندا جەڭىمپاز اتانۋى – كۇللى قازاقستانعا قۋانىش سىيلادى. بۇقارالىق اقپارات قۇرالدارىندا ول تۋرالى اقپاراتتار مەن ماتەريالدار لەگى دە قاپتادى. وسى ورايدا سامالدىڭ ۇستازى, ناتاليا نازاروۆامەن حابارلاسىپ, سۇحبات قۇردىق. تەاتردا جانە بىرنەشە كوركەم فيلمدە ويناعان نازاروۆا قازىرگى كەزدە رەسەيدەگى گيتيس-تە ءتالىم بەرەدى. سامال جۇلدە العان كۇنى نازاروۆا فەيسبۋكتەگى پاراقشاسىندا الاقايلاپ ءسۇيىنشى سۇراعان.
- ءسىز بىرنەشە جىل سامالدىڭ ۇستازى بولدىڭىز عوي, ونىڭ اكتەرلىك قابىلەتىن قالاي باعالايسىز؟
– سامالدىڭ وزىنە ءتان نازىك سۇيكىمدىلىگى بار. جانە ونىڭ بويىندا ەرەكشە اكتەرلىك قابىلەت بار. ول سىرت كوزگە بايقالا بەرمەيدى. بىراق وبرازعا كىرىپ, ءرولىن ويناي باستاعان ساتتە ءسىز سامالدى ەمەس, ناعىز كەيىپكەردى كورەسىز. ول مۇلدە فالش جاساي المايدى. دۆورتسەۆوي جەتىستىگى مەن ەڭبەگىنىڭ قۇپياسى – سامالدىڭ تابيعاتى مەن قابىلەتىن ءدوپ تاني الۋىندا جاتىر.
- سامالمەن العاش رەت قاشان كەزدەستىڭىز جانە قانداي اسەردە قالدىڭىز؟
– سەرگەي بىزگە ونى الىپ كەلىپ, مامان رەتىندە قاراپ كورۋىمىزدى سۇرادى. بىراق ءبىز ول كەزدە كۋرستى تولىقتاي جيناپ قويعانبىز, سوندىقتان قوسىمشا ادام الۋ مۇمكىن ەمەس ەدى. ول وتە سابىرلى, سالماقتى بولدى. مەن ءبىزدىڭ بىلىكتى رەجيسسەرىمىز ەۆگەني كامەنكوۆيچكە ءوتىنىش جاساپ, سامالدىڭ قابىلەتىن بايقاپ كورۋىن سۇرادىم. ول قىز ساحناعا شىقتى دا, تاتيانانىڭ حاتىن وقي جونەلدى. سامالدىڭ ول حاتتى نازىك يىرىمدەرمەن تەبىرەنە, جۇرەككە جەتكىزە وقىعانى سونشالىقتى ارتقى تۇستان «مەن وعان ۇيلەنگىم كەلەدى» دەگەن فومەنكو تەاترىنىڭ بەلدى ارتىستەرىنىڭ ءبىرىنىڭ داۋسى ەستىلدى. ءبىز بۇل جاعدايعا راحاتتانا ك ۇلىپ الدىق. سودان كەيىن كامەنكوۆيچ ء«بىزدىڭ قازاقستانمەن ارنايى كەلىسىمىمىز بار. ول ەلدىڭ ستۋدەنتتەرى ارناۋلى كۆوتامەن وقيدى. تيىسىنشە, ەشقانداي ارتىق ورىن المايدى» دەدى. وسىلايشا, سامال ءبىزدىڭ كۋرسقا ءتۇسىپ كەتتى.
- فيلمدەگى ايەل وبرازىنىڭ قازىلار القاسىن ءتانتى ەتكەنىنىڭ سەبەبى نەدە دەپ ويلايسىز؟
– ازىرگە «ايكا» تۋىندىسىن كورىپ شىقپادىم. سول سەبەپتى, ەشقانداي پىكىر ايتا الماسپىن.
– سەرگەي نەگە وسى رولگە سامالدى تاڭدادى؟ بۇل تۇرعىداعى ءسىزدىڭ جەكە پىكىرىڭىز قانداي؟
– سەرگەيدىڭ بۇل تاڭداۋىنىڭ سەبەبى ونىڭ وزىنە عانا ايان دەپ ويلايمىن. دەگەنمەن «تيۋلپان» كارتيناسىنان كەيىن ەكەۋىنىڭ شىعارماشىلىق بىرلەستىگى دامي ءتۇستى. ءارى سامالدىڭ قابىلەتى, تالانتى رەجيسسەرگە انىق كورىندى. «تيۋلپاننان» كەيىن رەجيسسەر سامالدا ۇلكەن پوتەنتسيال بار ەكەنىن ايقىن تۇسىنسە كەرەك.
- كانن حالىقارالىق فەستيۆالىندە مۇنداي بيىكتى باعىندىرۋ – ۇلكەن جەتىستىك. تالايلار ارمانداپ وتەتىن شىڭ. ءدال وسىنداي تابىستان كەيىن سامالدىڭ كاسىبي كارەراسى قالاي ءوربۋى مۇمكىن؟
– مۇنداي جەتىستىككە جەتكەننەن كەيىنگى ءارتىستىڭ تاعدىرى بولجاپ بولمايتىن دۇنيە. الدەقانداي بولجام ايتىپ, بال اشۋ وتە قيىن. قالاي بولعان كۇندە دە تەك كوپتەگەن رولدەردى ءساتتى ورىنداپ, جۇرتشىلىققا ودان ءارى تانىلا تۇسەدى دەپ ۇمىتتەنەمىن. ءبىزدىڭ سامالمەن قارىم-قاتىناسىمىز وتە جاقسى دەڭگەيدە. ول جانى جايساڭ, كەرەمەت ادام. ساباقتى دا اسا مۇقيات, جوعارعى باعاعا وقىدى. ايتپاقشى, ول ءوزىن وجەت مىنەزدى اكتريسا رەتىندە دە كورسەتە الدى. باتىلدىق, وجەتتىك ادامعا, ونىڭ ىشىندە اكتەرگە كەرەك قاسيەت. سوندىقتان ونىڭ جولى – داڭعىل دەپ ۇلكەن سەنىممەن ايتا الامىن.
- سامال ءبىلىم العان, ءوزىڭىز قىزمەت ەتەتىن وقۋ ورداسى تۋرالى ايتا كەتسەڭىز؟
– سامال بۇل ءبىلىم ورداسىندا 2007-2011 جىلدارى وقىپ, ءتالىم الدى. گيتيس (تەاتر ونەرى مەملەكەتتىك ينستيتۋتى) – رەسەيدەگى ەڭ ۇزدىك تەاتر ونەرىن دارىپتەيتىن, ۇيرەتەتىن جوعارى وقۋ ورىندارىنىڭ بىرەگەيى. قازىرگى تاڭدا ەلدەگى ۇزدىك تەاتر وقۋ ورىندارىنىڭ تورتتىگىنە كىرەدى. ال سامال وقىعان رەجيسسۋرا فاكۋلتەتى – ءتىپتى اڭىزعا اينالعان ورتا دەسە دە بولعانداي. اتالعان فاكۋلتەت قابىرعاسىنان تالاي مىقتى اكتەرلەر مەن رەجيسسەرلەر تۇلەپ ۇشقان.
مەن «تيۋلپان» ءفيلمىن وتە قاتتى ۇناتتىم. وعان دەيىن دۆورتسەۆويدى بىلمەيتىن ەدىم. ءبىرىنشى فيلمدەگى سامالدىڭ جۇمىسى مەنىڭ كوڭىلىمە عاجايىپ اسەر سىيلادى. ونى اۋىزبەن سيپاتتاپ جەتكىزە سالۋ قيىن. جالپى, مەن سەرگەيدى ءبىرتۋار رەجيسسەر دەپ ەسەپتەيمىن. مەن ءۇشىن ول – رەسەيدەگى ءنومىرى ءبىرىنشى مامان. سامالدىڭ وسىنداي شەبەردىڭ قولىنا تاپ بولۋى دا – ۇلكەن باقىت. دەگەنمەن اكتەردىڭ ءوزى ىنتاسىز, قابىلەتسىز بولسا, رەجيسسەردىڭ ويىنداعى دۇنيەنى الىپ شىعا المايدى. بۇل جەردە تاندەم مىقتى بولىپ تۇر. سامال – وتە ەڭبەكقور جانە شىنايى تالانت. بۇل تۇرعىدا ول كوپتەگەن ارتىستەردەن كوش ىلگەرى الدا تۇر. وسى جەتىستىكتەن كەيىن ونىڭ رولدەردەگى بولمىسى ودان ءارى اشىلا تۇسەدى, جۇلدىزى جارقىراي تۇسەدى دەپ سەنەمىن. ءوزىم سامالدىڭ ۇستازى بولعانىمدى ماقتان ەتەمىن.
- سۇحباتىڭىزعا راحمەت!
اڭگىمەلەسكەن اباي ايماعامبەت