ايماق باسشىسى قۇمار اقساقالوۆ 73-ءشى حالىقارالىق كانن كينوفەستيۆالىندە «ۇزدىك ايەل ءرولى» اتالىمى بويىنشا جەڭىمپاز اتانعان جەرلەسىمىز سامال ەسلاموۆانى ارنايى قابىلداپ, ۇلكەن جەڭىسىمەن قۇتتىقتادى.
كەزدەسۋگە اكتريسانىڭ اتا-اناسى ءىلياس, گۇلمايرا ەسلاموۆتەر, العاشقى سىنىپ جەتەكشىسى زۋحرا ساپاروۆا, ءسابيت مۇقانوۆ اتىنداعىقازاق سازدى-دراما تەاترىنىڭ اكتەرلەرى, ونەر كوللەدجىنىڭ وقىتۋشىلارى مەن ستۋدەنتتەرى قاتىستى.
قۇمار ىرگەباي ۇلى ءوز سوزىندە ونىڭ وسى جوعارى اتاققا تمد ەلدەرى اراسىنان ءبىرىنشى بولىپ قول جەتكىزگەنىن, ۇنەمى شىعارماشىلىق ىزدەنىستەرگە ۇمتىلىپ, جانكەشتى ەڭبەگىمەن, تابيعي دارىن-قابىلەتىمەن بيىك بەلەستەردى باعىندىرىپ كەلە جاتقان اتاپ كورسەتتى. الەمدەگى ەڭ تانىمال كينوبايقاۋداعى بۇل جەتىستىك قازاقستان ءۇشىن زور مارتەبە.قازاقتىڭ اتىن شىعارىپ, رۋحىن كوتەردى. الىستاعى اۋىلدان, قاراپايىم وتباسىدان شىقسا دا ونەردەگى بيىك جولىنا ءبارىمىز كۋامىز. ادامنىڭ ىشكى رۋحاني الەمى اتا-جۇرتىنان, تۋعان جەرىنەن, تاريحىنان ءنار الادى. وعان سامالدىڭ بۇگىنگىدەي ماراپاتى دالەل. جۇلدىزىنىڭ جارقىراي تۇسۋىنە تىلەكتەسپىز, دەدى .
كانن حالىقارالىق كينوفەستيۆالىنىڭ جەڭىمپازى جەرلەستەرىنىڭ ىستىق ىقىلاسقا تولى قۇتتىقتاۋلارى مەن قولداۋلارى ءۇشىن جۇرەكجاردى العىسىن جەتكىزدى. تۋعان جەرگە تابانىم ءتيىپ ەدى, قوبالجىعان كوڭىلىم ساپ باسىلدى. كوپ جىل بويى جىراقتاجۇرگەن مەن ءۇشىن اتامەكەننەن اسقان قىمبات دۇنيە جوق, دەدى ول ۇلكەن تەبىرەنىسپەن. ءسوز اراسىندا ونىڭ پەتروپاۆل ونەر كوللەدجىن, رەسەيدىڭ تەاتر ونەرى ۋنيۆەرسيتەتىن بىتىرگەنىن, «قىزعالداق» فيلمىندە تىرناقالدى ءرولىن سومداپ, فرانتسيادا «ەرەكشە كوزقاراس» كونكۋرسىنىڭ باس جۇلدەسىن ولجالاعانىن ايتا كەتكەن ءجون.
جىلى ءجۇزدى جۇزدەسۋ سوڭىندا قازاقستاننىڭ ابىرويىن اسقاقتاتىپ, مەرەيىن وسىرگەن سامال ەسلاموۆاعا ءۇش بولمەلى پاتەردىڭ كىلتى تابىس ەتىلدى. اتا-اناسى العىس حاتپەن ماراپاتتالدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى