«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قىزمەتىندەگى باسىم باعىتتاردىڭ ءبىرى – «تسيفرلىق قازاقستان» مەملەكەتتىك باعدارلاماسى اياسىندا حالىق اراسىندا ەلەكتروندىق پورتال ارقىلى كورسەتىلەتىن مەملەكەتتىك قىزمەتتەردى وزدىگىمەن پايدالانا بىلۋگە ۇيرەتۋ جانە كەڭىنەن ناسيحاتتاۋ.
باعدارلامانى جۇزەگە اسىرۋ باعىتىندا «ەلەكتروندىق ۇكىمەت جانە ەلەكتروندىق قىزمەتتەر» كۋرسى بويىنشا وقۋ باعدارلاماسى ازىرلەنگەن بولاتىن. جالپى وسى جوبا اياسىندا «ازاماتتارعا ارنالعان ۇكىمەت» 8 ملن ادامنىڭ تسيفرلىق ساۋاتتىلىعىن ارتتىرماق. بۇل تۋرالى وكق-دا وتكەن مەمكورپوراتسيانىڭ 2 جىلدىق قىزمەتىن قورىتىندىلاۋعا ارنالعان جيىندا مەملەكەتتىك كورپوراتسيانىڭ باسقارما توراعاسى ابىلايحان وسپانوۆ حابارلادى.
ا.وسپانوۆ اتاپ وتكەندەي, ۇستىمىزدەگى جىلدىڭ ماۋسىم-تامىز ايلارىندا «ۇات» اق, «قازپوشتا», «زەردە» جانە جەرگىلىكتى اتقارۋشى ورگانداردارمەن بىرلەسە وتىرىپ شامامەن جارتى ميلليون ادامنىڭ تسيفرلىق ساۋاتتىلىعىن ارتتىرۋ جوسپارلانۋدا. وسى ماقساتتا قازاقستان بويىنشا 880 جاتتىقتىرۋشىنى ارنايى دايىندىقتان وتكىزىپ, سەرتيفيكاتتار تابىستالدى. اتالمىش وقىتۋ كۋرستارى قالا, اۋدان, اۋىل حالقىنا بىردەي قولجەتىمدى بولادى.
قازىرگى تاڭدا مەملەكەتتىك كورپوراتسيانىڭ ءاربىر فرونت-ءوفيسى وزىنە-ءوزى قىزمەت كورسەتۋ «Connection Point» سەكتورىمەن جابدىقتالعان, ول جەردە «ەلەكتروندىق ۇكىمەت» پورتالى جانە باسقا دا مەملەكەتتىك رەسۋرستارعا شىعۋ مۇمكىندىگىمەن قامتاماسىز ەتىلگەن 2 628 جۇمىس ورىندارى ۇيىمداستىرىلدى. وزىنە-ءوزى قىزمەت كورسەتۋ سەكتورىندا ازاماتتار ءوز بەتىنشە ەتسق الۋعا ءوتىنىم بەرۋگە, سونداي-اق 700-دەن استام ەلەكتروندىق قىزمەت پەن سەرۆيستەر الۋعا مۇمكىندىگى بار. جىل باسىنان بەرى «Connection Point» ارقىلى 4,5 ملن.-نان اسا كەڭەس بەرىلىپ, 4 ملن. قازاقستاندىق وزدىگىمەن قىزمەت العان.
«سونىمەن قاتار بيىل ەلىمىزدىڭ بارلىق وبلىس ورتالىقتارىندا تسيفرلىق حالىققا قىزمەت كورسەتۋ ورتالىقتارىن ىسكە قوسۋدى جوسپارلاپ وتىرمىز. قازىر جوبا پيلوتتى نەگىزدە استانا, الماتى, شىمكەنت قالالارىندا ءتيىمدى جۇمىس جاساۋدا. مۇنداي ورتالىقتاردىڭ ەرەكشەلىگى – بەلگىلەنگەن كەستەگە سايكەس تسيفرلىق ساۋاتتىلىق داعدىلارىن ارتتىرۋ بويىنشا تاقىرىپتىق دارىستەر وتكىزەتىن سىنىپتارىنىڭ بولۋى. 2018 جىلدىڭ 4 ايىندا اتالمىش سىنىپتاردا 3,6 مىڭ ادام ءبىلىمىن جەتىلدىردى», - دەدى ا.وسپانوۆ.
سونىمەن قاتار ادام كوپ شوعىرلاناتىن ورىنداردا (ساۋدا ورىندارىندا, ۆوكزالداردا, اۋەجايلاردا, سوتتاردا جانە ت.ب.) مۇددەلى مەملەكەتتىك ورگاندارمەن بىرگە تۇراقتى نەگىزدە «تسيفرلىق قازاقستان» مەملەكەتتىك باعدارلاماسى بويىنشا كەڭ اۋقىمدى اكتسيالار مەن اقپاراتتىق-ءتۇسىندىرۋ جۇمىستارى جۇرگىزىلەدى.
ايتا كەتەيىك, جىل باسىنان بەرى مەملەكەتتىك جانە جەكە وقۋ ورىندارىندا 10 مىڭنان اسا ستۋدەنت تسيفرلىق قىزمەتتتەر الۋ بويىنشا داعدىلارىن ماشىقتاندىردى.