مەملەكەت باسشىسى راسىمگە قاتىسۋشىلارعا ارنالعان سوزىندە «KADEX-2018» كورمەسى اياسىندا «قازاقستانداعى عارىش كۇندەرى» اتتى حالىقارالىق فورۋمنىڭ ءوتۋى بيىلعى شارانىڭ باستى ەرەكشەلىگى ەكەنىن اتاپ ءوتتى.
قازاقستان پرەزيدەنتى «KADEX-2018» كورمەسىنىڭ قارۋ-جاراق پەن اقپاراتتىق قاۋىپسىزدىكتى قامتاماسىز ەتۋ سالاسىنداعى الەمدىك ماڭىزى بار جيىنعا اينالعانىن ايتتى.
– كورمەگە الەمنىڭ 28 ەلىنەن 318 كومپانيا قاتىسىپ وتىر. كورمە قوناقتارى قورعانىس ونەركاسىبى كەشەنى جانە عارىش سالاسىنداعى سوڭعى جەتىستىكتەرمەن تانىسا الادى. بۇل جولى ەلەكتروندىق جۇيە مەن بايلانىس جانە قارۋ-جاراقتى باسقارۋ جۇيەسىن دامىتۋعا ايرىقشا ءمان بەرىلدى, – دەدى نۇرسۇلتان نازارباەۆ.
ەلباسى قازاقستاننىڭ تاتۋ كورشىلىك پەن ىنتىماقتاستىقتى نىعايتۋعا باعىتتالعان بەيبىت ساياسات جۇرگىزىپ وتىرعانىن اتاپ ءوتتى.
– قورعانىس سالاسى مەن قارۋلى كۇشتەردىڭ الەۋەتىن دامىتۋ – مەملەكەت باسىمدىقتارىنىڭ ءبىرى. ورتالىق ازيا بويىنشا بىرەگەي سانالاتىن «KADEX» حالىقارالىق كورمەسى بۇل باسىمدىقتاردى ىسكە اسىرۋدىڭ ءتيىمدى قۇرالى بولىپ تابىلادى, – دەدى مەملەكەت باسشىسى.
قازاقستان پرەزيدەنتى ەلىمىزدىڭ قورعانىس ونەركاسىبى كەشەنىن دامىتۋ ءۇشىن حالىقارالىق كورمەنى وتكىزۋدىڭ تيىمدىلىگىنە توقتالدى.
– بيىل كورمەگە قاتىسۋ ءۇشىن الەمنىڭ 40 ەلىنەن رەسمي دەلەگاتسيالار مەن شەتەلدىك 108 كومپانيا باسشىلارى كەلدى. قول قويىلاتىن ىسكەرلىك كەلىسىمدەر مەن شارتتار وتاندىق جانە شەتەلدىك قورعانىس ونەركاسىبى كەشەنىنىڭ كاسىپورىندارى اراسىنداعى حالىقارالىق كووپەراتسيا مەن سەرىكتەستىكتى دامىتۋعا سەپتىگىن تيگىزەتىن بولادى. سونداي-اق, بۇل ينۆەستيتسيا تارتىپ, جالپى قازاقستان ەكونوميكاسىنىڭ ەكسپورتتىق الەۋەتى مەن باسەكەگە قابىلەتتىگىن ارتتىرۋعا ىقپال ەتەدى, – دەدى نۇرسۇلتان نازارباەۆ.
كورمەنىڭ اشىلۋ ءراسىمى اياقتالعاننان كەيىن ەلباسى «قازاقستان ينجينيرينگ» ۇلتتىق كومپانياسىنىڭ, رەسەي مەن قىتايدىڭ پاۆيلوندارىن ارالاپ كوردى.