جاقىندا جارما اۋدانىنىڭ ورتالىعى قالباتاۋ اۋىلىندا استانا قالاسىنىڭ 20 جىلدىعىنا, اۋداننىڭ قۇرىلعانىنا 90 جىل جانە وليمپيا ويىندارىنىڭ كۇمىس جانە قولا جۇلدەگەرى, كسرو-نىڭ جەتى دۇركىن, الەم چەمپيونى داۋلەت تۇرلىقانوۆتىڭ جۇلدەسىنە ارنالعان ءبىرىنشى اشىق وبلىستىق تۋرنير بولىپ ءوتتى.
بۇعان دەيىن داۋلەت بولات ۇلى سالىپ بەرگەن بۇل سپورت كەشەنىندە سان مارتە رەسپۋبليكالىق, وبلىستىق جارىستار وتكىزىلىپ كەلگەن. ال بۇل جولعى جاسى نەبارى ون, ون ەكى جاستاعى بالالاردىڭ ءدۇبىردى دوداسى تۇڭعىش رەت وتكىزىلىپ وتىر. سەبەبى كۇنشىعىس ەلىندە بالالاردى ءتورت جاسىنان سپورتقا باۋليدى ەكەن. ءبىز ولاردان كەمبىز بە؟ اۋداندا سپورت كەشەنىن سالعان كەزدە ەر داۋلەت سونى كوزدەسە كەرەك.
وسى ءتۋرنيردى وتكىزۋگە بەلسەنە ارالاسقان, ءدۇبىرلى دودانىڭ شىعىنىن كوتەرۋگە اتسالىسقان وبلىستىق گرەك-ريم, ەركىن جانە ايەلدەر كۇرەسى فەدەراتسياسىنىڭ پرەزيدەنتى مارات مۇزاپاروۆ اتالمىش سپورت تۇرلەرىمەن قازىر مىڭداعان بالالاردىڭ جاتتىعىپ جۇرگەنىن, كۇنى ەرتەڭ ولاردىڭ اراسىنان داۋلەت سياقتى ساڭلاقتاردىڭ شىعاتىنىن ايتتى.
«اقسۇڭقار جەمىن شاشىپ جەيدى» دەگەندەي, قاشاندا تۇرعىندارعا جومارت قولىن سوزىپ, قايىرىمدىلىق شارالارىن وتكىزەتىن ەر داۋلەت كسرو-نىڭ ەڭبەك سىڭىرگەن سپورت شەبەرى ەسەنعالي ەڭسەباەۆتىڭ جۇبايىنا پاتەر كىلتىن تابىس ەتتى. قاتتى تولقىعان انا داۋلەتكە, وتباسىنا اماندىق, ساۋلىق تىلەدى.
جارما اۋدانىنىڭ اكىمى نۇرلان سىدىقوۆ قازاق ەلىنىڭ ماقتانىشى, داڭقتى بالۋان داۋلەت بولات ۇلىنا, ونىڭ جۇبايى قازاقستان گاندبول فەدەراتسياسىنىڭ پرەزيدەنتى, ازيا گاندبول فەدەراتسياسىنىڭ مۇشەسى گۇلنار ىسماعۇلقىزىنا «جارما اۋدانىنا سىڭىرگەن ەرەكشە ەڭبەگى ءۇشىن» توسبەلگىسىن تاپسىردى. ال باتىردىڭ اناسى, ارداقتى ۇستاز ءمارزيا اپايعا «اسىل انا» توسبەلگىسىمەن ماراپاتتادى.
سالتاناتتى شارادان سوڭ تۋرنير باستالدى. بۇل جولى اشىق بىرىنشىلىككە الماتى قالاسى, الماتى, پاۆلودار, وڭتۇستىك قازاقستان وبلىستارىنان, وبلىستىڭ اۋداندارىنان ەكى جۇزگە تارتا بالالار قاتىستى. 26 كيلو سالماقتاعى اسىقتىڭ الشىسىنداي شىمىر بالا جارمالىق نۇرجان ءاشىمجانوۆتىڭ بەلدەسۋى كوپشىلىككە ۇنادى. قورقىپ, ۇركۋدى بىلمەيتىن نۇرجان قارسىلاس شاق كەلتىرمەدى. قارسىلاستارىن ءبىرىنشى كەزەڭدە ايقىن باسىمدىقپەن جەڭدى. اقتىق سايىستا شىمكەنتتىك سۇلتان مارات ۇلىن كىلەمدە قاپى قالدىرعانى سول ەدى, بىرنەشە رەت سالتو جاساپ, جينالعانداردى ءتانتى ەتتى.
– قازىر 11 جاستامىن. سەنەسىز بە, گرەك-ريم كۇرەسىمەن جاتتىعا باستاعانىما بەسىنشى جىل. باستاپقىدا اتا-انام ءالى بالاسىڭ, دەنەڭە زاقىم كەلتىرىپ الاسىڭ دەپ كۇرەسپەن شۇعىلدانۋىما قارسى بولعان. ارمانىم – وسى كەشەندى سالىپ بەرگەن داۋلەت كوكەم سياقتى جاۋىرىنى جەر يىسكەمەگەن چەمپيون بولۋ, – دەيدى كوزىنەن وت ۇشقىنداعان نۇرجان. بۇل سالماقتا ەكى ءۇشىنشى ورىندى الماتى وبلىسىنىڭ تۇلەگى سۇلەيمەن اليەۆ پەن ءۇرجار اۋدانىنان كەلگەن ەرلان ەرنۇر يەلەندى.
34, 39, 46, 54 كيلو سالماقتا الماتى وبلىسىنىڭ بالۋانى تەمىرعالي ەراسىل, جارمالىقتار ەردوس جۇماعۇلوۆ, دياس حادجيمۇرات, سەمەيلىك ەرقانات مۇقيات چەمپيون اتاندى. كەلەسى كۇنى 36, 42, 50 جانە 50 كيلودان جوعارى سالماقتاعى بالالار كىلەمگە شىعىپ تاماشا ونەر كورسەتتى. جارىس اياقتالعان سوڭ حالىقارالىق دارەجەدەگى باس تورەشى, جارىسقا باسشىلىق جاساعان ماناربەك بودەنوۆ پەن باس حاتشى ماقسات اشيمانوۆ جۇلدەگەرلەردى ماراپاتتادى. ءبىرىنشى ورىن العاندارعا – 30, ەكىنشى ورىن – 20, ال ەكى ءۇشىنشى ورىنعا يە بولعاندار ارقايسىسى 15 مىڭ تەڭگە مەن العىس حاتتاردى يەلەندى.
وڭداسىن ەلۋباي, جۋرناليست شىعىس قازاقستان وبلىسى, جارما اۋدانى
سۋرەتتى تۇسىرگەن اۆتور