وبلىس ديقاندارى الدىندا 4,1 ميلليون گەكتار جەرگە تۇقىم سەبۋ جۇمىستارىن ساپالى اياقتاۋ مىندەتى تۇر. وسىنشا كولەمدەگى القاپتىڭ 2,7 ميلليون گەكتارىن ءداندى, 1 ميلليون گەكتارىن مايلى داقىلدار قۇرايدى.
كۇن رايىنىڭ ءار ء ساتىن ءتيىمدى پايدالانىپ قالۋدى ماقسات ەتكەن اگروقۇرىلىمدار بۇگىندە ەن دالانى قىزۋ ەڭبەك دۇبىرىنە بولەپ ءجۇر. اۋىل شارۋاشىلىعى ماماندارى بەرگەن اقپارات بويىنشا جاۋاپتى ناۋقانعا 13 مىڭ تراكتور, 16 مىڭعا جۋىق تۇقىم سەپكىش اگرەگاتتار, 1147 ەگىس كەشەنى تارتىلعان. تۇقىم, جانار-جاعارماي قورى جەتكىلىكتى. 123 مىڭ توننا مينەرالدىق تىڭايتقىش الىنعان.
جاۋاپتى ناۋقانعا جان-جاقتى دايىندىقپەن كىرىسكەندەردىڭ ءبىرى– مامليۋت اۋدانىندا ورنالاسقان زاپكەن شاياحين جەتەكشىلىك ەتەتىن «سەنىم» جشس-ءى. بيداي-س ۇلىدان بولەك 500 گەكتار زىعىر, 100 گەكتار راپس ەگۋدى جوسپارلاپ وتىرمىز. «بوياۆچانكا», «ومبى-35» سەكىلدى تەرىسكەيدىڭ كليماتىنا ءتوزىمدى تۇقىم سۇرىپتارى جەرسىندىرىلگەن. باعىمدا ەكىجۇزگە جۋىق قازاقتىڭ اقباس سيىرلارى بولعاندىقتان, جەمازىق كولەمىن دە ءبىرشاما ۇلعايتتىق, دەيدى بىلىكتى باسشى. باقىت مانتاەۆتىڭ تەحنيكا تىزگىندەپ كەلە جاتقانىنا ون جىلدان اسىپتى. «ۆەرسايتلي 435» ەگىس كەشەنىن ۇرشىقشا ۇيىرەدى. كانادالىق زاماناۋي تەحنكا كۇنىنە 150-200 گەكتار القاپقا ىرىس ءدانىن سەبۋگە قاۋقارلى. تاڭ اتقاننان ىمىرت ۇيىرىلگەنگە دەيىن بەل جازبايتىن مەحانيزاتورلار ءۇشىن ءۇش مەزگىل ىستىق اس ۇيىمداستىرىلعان.
وبلىس ورتالىعىندا وتكەن اگرارشىلاردىڭ باس قوسقان جيىنىندا «اتامەكەن-اگرو-تيميريازەۆو» سەرىكتەستىگىنىڭ ساندىق تەحنولوگيالاردى اۋىل شارۋاشىلىق سالاسىنا قولدانۋداعى تاجىريبەسى تاراتىلعان ەدى. «اگروجوسپار» باعدارلاماسىنىڭ تيىمدىلىگى وتە زور. بۇرىندارى اگرونومدار ەگىستىكتىڭ قۇرىلىمىن ەسەپتەۋمەن ەكى ايداي اينالىسسا, قازىر بىرەر اپتانىڭ ىشىندە تاپ-تۇيناقتاي ەتەدى. بەينەباقىلاۋ ارقىلى توپىراقتىڭ قۇرامىن, قۇنارلىلىعىن, القاپقا قانشا مولشەردە تۇقىم, گەربيتسيد ءسىڭىرۋ قاجەتتىگىن ناقتى بىلەمىز. مۇنىڭ ءوزى ەگىستىك جاعدايىنا باقىلاۋ جاساۋعا, بارىنشا مول ءونىم الۋعا مۇمكىندىك بەرەدى, دەيدى جشس ديرەكتورى ايدارحان ەسەركەنوۆ اگروتەحنولوگيالاردىڭ ارتىقشىلىقتارى جايلى. «باپتاي بىلسەڭ جەر جومارت» قاعيداسىن قاتاڭ ۇستانعان «اقجەر 2010» شارۋاشىلىعى 15 مىڭ گەكتار جەرگە يەلىك ەتەدى. مۇندا ماتەريالدىق-تەحنيكالىق بازانى نىعايتۋعا كوڭىل ءبولىنىپ, جارتى ميلليارد تەڭگەگە سوڭعى ۇلگىدەگى ەگىس كەشەندەرى اكەلىنگەن. استىق ساقتايتىن قويما جاڭارتىلعان. كوكتەمگى دالا جۇمىستارى ۋاقىتىندا جۇمىسشىلاردىڭ سانى ءبىرجارىم ەسەگە دەيىن ارتقان. ورتاشا جالاقى 115 مىڭ تەڭگەنىڭ توڭىرەگىندە. زىعىر, راپس, جاسىمىق سياقتى مايدى داقىلدارعا باسىمدىق بەرىلگەن. «اندرەەۆكا-سك» شارۋا قوجالىعى دا اۋىسپالى ەگىس جۇيەسىن ءتيىمدى پايدالانىپ ءجۇر. جانار-جاعارماي, تۇقىم, مينەرالدىق تىڭايتقىش قاجەتتە مولشەردە ازىرلەنىپ, سوڭعى ەكى جىلدا 300 ميلليون تەڭگەگە تەحنيكالار ساتىپ الىنعان. قوجالىق جەتەكشىسى سەرالى شاريپوۆتىڭ ايتۋىنشا قاراجاتتىڭ ءبىر بولىگى سۋبسيديالاناتىندىقتان قايتارۋ سونشالىقتى قيىندىق تۋعىزبايدى. ەگىستىك القاپتارىن 400 گەكتار راپس, 1300 گەكتار زىعىر, 2 مىڭ گەكتار بيداي قۇرايدى. مۇنىڭ سىرتىندا جەمازىق داقىلدارى تاعى بار. جاۋاپتى ناۋقانعا 50 مەحانيزاتور اتسالىسۋدا.
سولتۇستىك قازاقستان تاجىريبە ستانساسىنىڭ ماماندارى توپىراقتا ىلعالدىڭ جەتكىلىكسىزدىگىنە نازار اۋدارۋعا, ۆەگەتاتسيالىق سەبۋ مەرزىمىن ۇزارتىپ الماۋعا كەڭەس بەرەدى. ولاردىڭ اقىلىنا قۇلاق اسقان قىزىلجار اۋدانىنىڭ ديقاندارى 16,5 مىڭ گەكتار القاپقا ىلعال ساقتاۋ, توپىراقتى وڭدەۋ شارالارىن تىڭعىلىقتى جۇرگىزىپ, 20 مىڭ گەكتار جەرگە تىڭايتقىش سىڭىرگەن. نولدىك تەحنولوگيانى كەڭىنەن مەڭگەرۋدىڭ ارقاسىندا ىستە كىدىرىس سەزىلمەيدى. ارامشوپتەر مەنتۇرلى زيانكەستەردەن قورعانۋ جولدارى دا ويلاستىرىلعان.
اتاپ وتۋگە بولاتىن ماڭىزدى كورسەتكىشتەردىڭ ءبىرى– بيىل مايلى داقىلدار كولەمى 285 مىڭ گەكتارعا كوبەيتىلىپ, 1 ميلليون گەكتارعا جەتكىزىلۋى. بۇل قادام بيۋدجەتكە قوسىمشا 60-70 ميلليارد تەڭگە كىرىس اكەلەدى دەگەن بولجام بار.
ءومىر ەسقالي, «ەگەمەن قازاقستان»