بيىل قوستاناي وبلىسىندا بالالار 14 جازعى لاگەردە دەمالادى. ولاردىڭ 10-ى مەملەكەتتىك, تورتەۋى جەكە مەنشىك لاگەر.
وبلىستىق ءبىلىم باسقارماسىنىڭ باسشىسى ءباتيما داۋىموۆانىڭ ايتۋىنشا, قازىر لاگەرلەر بالالاردى قابىلداۋعا شۇعىل دايىندىق ۇستىندە. لاگەرلەردى سىرلاۋ, تازالاۋ, اۋىز سۋىن, تاماق دايىنداۋ كەشەنىن تەكسەرۋ سەكىلدى جۇمىستار اتقارىلىپ جاتىر. قوستانايداعى «مەرەي», ارقالىقتاعى «سترويتەل» جەكە مەنشىك لاگەرلەرى مەن ينتەرنات ۇيىمدارى بازاسىنداعى لاگەرلەر بالالاردى قابىلداۋعا دايىن تۇر. سالا باسشىسى سونىمەن قاتار جىتىقارا جانە ليساكوۆ قالالارى مەن قارابالىق, اۋليەكول اۋداندارىنداعى ءتورت دەمالىس لاگەرىنە كۇردەلى جوندەۋ جۇمىستارى كەرەكتىگىن ايتتى. جىتىقارا مەن ليساكوۆتاعى لاگەرلەردىڭ جوبالىق-سمەتالىق قۇجاتتارى دايىن ەكەندىگى دە ايتىلدى.
الايدا, قايتا جوندەۋگە كەتەتىن قارجى كولەمى وبلىس اكىمى ارحيمەد مۇحامبەتوۆتى قاناعاتتاندىرمادى. ليساكوۆ قالاسى دەمالىس لاگەرىن جوندەۋگە 377 ميلليون تەڭگە بيۋدجەت قارجىسىن بولمەك.
«مۇنداي قارجىعا 200 ورىندىق بالا باقشا سالۋعا بولادى. ول جىل ون ەكى اي جۇمىس ىستەيدى, ال اينالدىرعان 3 ايعا جەتەر-جەتپەس ۋاقىت جۇمىس ىستەيتىن لاگەر ءۇشىن وسىنشا قارجىنى شىعىن ەتۋگە بولا ما؟ قۇرىلىستى بارىنشا ارزانداتىڭدار. سمەتالىق-جوبالىق قۇجات قايتا قارالسىن», دەدى ارحيمەد بەگەجان ۇلى.
لاگەردى جوندەۋگە بولىنگەن قارجىنىڭ 50 پايىزى ونىڭ فاسادىن جاساۋعا ەسەپتەلگەن. سۋبۇرقاق سالۋ جوسپارلانعان. بىراق ءوڭىر باسشىسى مۇنىڭ بارلىعىن دا ارزانداتۋعا بولاتىنىن قايتالاپ ەسكەرتتى. قۇجات قايتا قارالاتىن بولدى.
ءنازيرا جارىمبەت, «ەگەمەن قازاقستان»
قوستاناي