ەرلىك – ەلگە مۇرا, ۇرپاققا ۇلگى. بابالار ەرلىگى قازىرگى جاستاردى وتانىنا دەگەن ادالدىققا, ۇلتىنا دەگەن سۇيىسپەنشىلىككە باۋليدى. وسى ورايدا وڭتۇستىك قازاقستان وبلىسى, وتىرار اۋدانى, شەڭگەلدى اۋىلىندا ۇلى جەڭىستىڭ 73 جىلدىق مەرەكەسىنە وراي اشىلعان «ەر ەسىمى – ەل ەسىندە» دەپ اتالاتىن مونۋمەنتتىڭ الار ورنى ەرەكشە.
كوپشىلىككە قۋانىش سىيلاعان مونۋمەنتتى اۋىل تۇرعىندارى ءوز قاراجاتىنا تۇرعىزىپتى. قاريالار بۇل باستامانى تۋعان جەرگە دەگەن سۇيىسپەنشىلىك, ۇلكەنگە قۇرمەت ەكەنىن ايتىپ, ريزاشىلىقتارىن ءبىلدىردى. مونۋمەنتتە ەل باسىنا كۇن تۋعان شاقتا اۋىلدا ايانباي ەڭبەك ەتكەن جانداردىڭ دا ەسىمدەرى جازىلعان. سالتاناتتى جيىندا يگى ىسكە مۇرىندىق بولعان ەكونوميكا عىلىمدارىنىڭ دوكتورى بەيبىت سىزدىقوۆ كوپشىلىكتى اتا-بابالاردىڭ ەسىمى جازىلعان مونۋمەنتتىڭ نەگىزگى ميسسياسىن ۇمىتپاۋعا شاقىردى. «شەڭگەلدى اۋىلىنىڭ تاريحى 300-350 جىل بۇرىن باستاۋ العان. بۇل ۋاقىت ارالىعىندا كوپتەگەن اتا-بابالارىمىز دۇنيەدەن وزدى. وكىنىشكە قاراي, ولاردىڭ ءبىرىن بىلسەك, ءبىرىن بىلمەيمىز. سوندىقتان بۇل سوڭىمىزدان ەرىپ كەلە جاتقان جاس ۇرپاققا اتا-بابالارىمىزدىڭ ەسىمدەرى قاشالىپ جازىلعان مونۋمەنتتى مۇرا ەتىپ قالدىرساق دەگەن ىزگى نيەتپەن جاسالعان دۇنيە. اتا-بابالارىمىزدىڭ اتى جازىلعان جادىگەرلەردى بۇلدىرمەي ساقتاپ قالۋ – بۇگىنگى ۇرپاقتىڭ نەگىزگى مىندەتى», دەدى ب.سىزدىقوۆ.
سونداي-اق شاعىن ەلدى مەكەننىڭ تاريحى جانە قان مايداندا بەيبىت زامان ءۇشىن جاۋعا قارسى تۇرعان اۋىل ازاماتتارى تۋرالى قۇندى ماعلۇماتتار قامتىلعان «تۋعان جەر تاريحى» اتتى كىتاپ تا تۇرعىندارعا تارتۋ ەتىلدى.
عالىمجان ەلشىباي, «ەگەمەن قازاقستان»