پان گي مۋن اتىنداعى تۇراقتى دامۋ ينستيتۋتى اشىلدى

قازاقستانداعى مەديتسينا مەكە­مە­لەرىنە كورەيانىڭ دەنساۋلىق ساقتاۋ جۇيە­سىن ترانسفەرتتەۋ ارقىلى قازاقستان دەنساۋ­لىق ساقتاۋ جۇيەسىنىڭ باسەكەگە قابىلەت­تىلىگىن كوتەرۋگە ارنالعان باسقو­سۋعا كەلگەن بۇۇ-نىڭ سەگىزىنشى باس حاتشى­سى پان گي مۋندى ءال-فارابي اتىن­داعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ قارسى الدى.

جالپى, كورەيا رەسپۋبليكاسىمەن اراداعى ستراتەگيالىق ارىپتەستىك ءبىلىم, دەنساۋلىق, عىلىمي-يننوۆاتسيالىق جانە قايىرىمدىلىق قىزمەتى باعىتىندا كەڭىنەن دامىپ كەلەدى. «Severance-kz» قورىمەن بىرگە ەلىمىزدە مەديتسينا قىزمەتكەرلەرىنە ارنالعان شەبەرلىك ساباقتارى مەن بىلىكتىلىك كوتەرۋ كۋرستارى ۇيىمداستىرىلىپ, مامان دايارلاۋدىڭ حالىقارالىق باعدارلاماسى ەنگىزىلدى. اسىرەسە شىعىس قازاقستان مەن اقتوبە وبلىستارىندا ناتيجەلى جۇمىس جۇرگىزگەن وڭتۇستىككورەيالىق ماماندار تاجىريبەسىن قازىر وزگە دە وڭىرلەرگە تاراتۋ كوزدەلىپ وتىر. وسى ورايدا ەلىمىزدىڭ دەنساۋلىق ساق­تاۋ جۇيەسىن تسيفرلاندىرۋعا يننو­ۆا­تسيالىق تەحنولوگيالاردى ەنگىزۋ ماق­ساتىندا بىرلەسكەن عىلىمي-زەرتتەۋ جۇمىستارى جۇرگىزىلىپ كەلەدى.

كەزدەسۋدە ءال-فارابي اتىنداعى قازاق ۇلتتىق ۋنيۆەرسيتەتىنىڭ نەگىزىندە پان گي مۋن اتىنداعى تۇراقتى دامۋ ينستيتۋتىن اشۋ تۋرالى مەموراندۋمعا قول قويىلدى.

– وسى مەموراندۋم ارقىلى قازاق­ستان­نىڭ دەنساۋلىق ساقتاۋ دەڭگەيىن ارت­تىرۋعا كۇش جۇمسايتىن بولامىز. ءال-فارابي اتىنداعى قازۇۋ-دا مەنىڭ ەسىمىممەن تۇراقتى دامۋ ورتالىعىنىڭ اشىلۋى زور قۇرمەت دەپ بىلەمىن. تۇراقتى دامۋ باستاماسى العاش رەت بۇۇ-دا كوتەرىلگەن بولاتىن. نەگىزگى ماقسات – الەمدە بەيبىتشىلىكتى ساقتاۋ. بۇل ماقساتقا 2030 جىلى جەتۋدى كوزدەپ وتىرمىز. مەن نۇرسۇلتان نازارباەۆتىڭ جەتەكشىلىگىمەن بۇۇ-نىڭ بارلىق باستامالارى بەلسەندىلىكپەن جۇزەگە اسىرىلاتىنىنا سەنەمىن. اتالعان باس­تامالاردى العا جىلجىتۋدا ءال-فارابي اتىنداعى قازۇۋ ماڭىزدى ءرول اتقارادى», دەدى پان گي مۋن.

ۋنيۆەرسيتەت رەكتورى ع.مۇتانوۆ حالىقارالىق اكادەميالىق قوعامعا اتالعان ينستيتۋتتىڭ باعىتى مەن تۇجىرىمداماسىن ءتۇسىندىردى. ونىڭ ايتۋىنشا, ادامزات وركەنيەتى ءۇشىن تۇراقتى دامۋ تاقىرىبى وتە وزەكتى. ونىمەن ادام ءىس-قيمىلىنىڭ بارلىق ءتۇرى بايلانىستى. ماسەلەن, ازىق-ت ۇلىك قاۋىپسىزدىگى, اسكەري قاۋىپسىزدىك, تابيعي رەسۋرستاردىڭ, جەردەگى جانە سۋ استىنداعى ءومىردىڭ ساقتالۋى سياقتى ماسەلەلەردى جاتقىزۋعا بولادى.

«قازىر وسى ماسەلەلەردىڭ شەشىمى ىزدەستىرىلۋدە. ويتكەنى ازىق-ت ۇلىكتىڭ, رەسۋرستاردىڭ جەتىسپەۋشىلىگىن وتكەرۋدەمىز, ەكولوگيا بۇزىلدى, ناۋقاس ادامداردىڭ سانى ارتىپ كەلەدى. وسى قارقىنمەن كەتە بەرسەك, ونى رەتتەي الماي قالامىز. ادامزات وركەنيەتىنىڭ ءارى قاراي دامۋى بەلگىلى ءبىر ۋاقىتپەن شەكتەلەدى. اتالعان ماسەلەمەن بارلىق جاھاندىق ينس­تيتۋتتار, تانىمال عالىمدار اينالىسۋدا. ءتىپتى 10, 20 نەمەسە 100 جىلدان كەيىنگى ادامزاتتىڭ تىرشىلىگىن انىقتايتىن ريم كلۋبى بار. مۇنىڭ ءبارىن باسقارۋسىز جىبەرۋگە بولمايدى», دەدى ع.مۇتانوۆ.

سوندىقتان بۇل ينستيتۋت حالىقارالىق دەڭگەيدە جۇمىس ىستەيدى. ونى پان گي مۋننىڭ توراعالىعىنداعى كەڭەس باسقارادى. ينستيتۋت قىزمەتىنە تانىمال عالىمدار قاتىساتىن بولادى. الايدا نەگىزگى سالماق ۋنيۆەرسيتەت قىزمەتكەرلەرى مەن ماگيسترانتتارىنا تۇسپەك. ولار شەتەلدىك ارىپتەستەرىمەن بىرگە ناقتى جوبالاردى جۇزەگە اسىرادى.

دۋمان اناش,

«ەگەمەن قازاقستان»