قازاقستان مۇسىلماندارى ءدىني باسقارماسىنىڭ توراعاسى سەرىكباي قاجى وراز رامازان ايىنىڭ قاي كۇنى باستالاتىنىن رەسمي تۇردە جاريا ەتتى.
«كەلە جاتقان قاسيەتتى رامازان ايى بارشامىزعا قۇتتى, بەرەكەلى بولعاي! بيىل قازاقستان مۇسىلماندارى ءدىني باسقارماسى عۇلامالار كەڭەسىنىڭ شەشىمىمەن شاريعات ەرەجەلەرىندە ايدى كورىپ, ورازان بەكىتۋ جانە وتاندىق استرافيزيكالىق زەرتتەۋلەر ورتالىعىنىڭ نەگىزدەرىنە سۇيەنە وتىرىپ, 16 مامىر كەشكە العاشقى تاراۋيح نامازى وقىلادى. 17 مامىر رامازان ايىنىڭ ءبىرىنشى كۇنى بولىپ بەكىتىلدى. تولىعىراق اقپاراتتار رەسمي سايتىمىزدا بەرىلەدى. كەلە جاتقان ۇلىق اي بارشامىزعا قۇتتى, بەرەكەلى بولسىن!», - دەدى باس ءمۇفتي ءوز سوزىندە.
رامازان ايىنىڭ باستالۋىن ناقتى انىقتاۋ شاريعي ۇكىمدەر مەن استرونوميالىق ەسەپتەر نەگىزىندە جۇزەگە اسادى. العاشقى كەزەڭدە مۇسىلماندار جاڭا تۋعان ايدى كوزبەن كورەتىن. عىلىم مەن تەحنولوگيا دامىعان زاماندا مۇسىلماندىق كۇنتىزبە شاريعي ۇكىم مەن عىلىمي زەرتتەۋلەر نەگىزىندە جاسالدى.
پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «ورازانى ايدىڭ تۋىنا قاراپ باستاپ, ايدىڭ تۋىنا قاراپ اياقتاڭدار. ەگەر اي كورىنبەسە, شاعبان ايىن وتىز كۇنگە تولتىرىپ, باستاي بەرىڭدەر», - دەگەن.
دەمەك, مۇسىلمان جۇرتشىلىعى رامازاننان بۇرىن بولاتىن شاعبان ايىنىڭ جيىرما توعىزى كۇنى كەشكە قاراي جاڭا ايدىڭ (رامازاننىڭ) تۋىن كۇتۋلەرى كەرەك. جاڭا اي كورىنسە, وندا كەلەسى كۇنى ورازا ۇستايدى. ەگەر كورىنبەسە, سول ايدى وتىز كۇنگە تولتىرىپ, ورازانى باستايدى. بىرقاتار مۇسىلمان مەملەكەتتەرىنىڭ عالىمدارى وسى حاديستە ايتىلعان شاعبان ايىنىڭ 29-ىنشى كۇنى 15 مامىرعا, ال 30-ىنشى جۇلدىزى 16 مامىرعا ساي كەلەتىنىن مالىمدەۋدە. دەمەك, استرونوميالىق ەسەپتەر 16 مامىردا جاڭا ايدىڭ تۋىلاتىنىن كورسەتۋدە. ال 17 مامىر - رامازان ايىنىڭ العاشقى كۇنى بولىپ ەسەپتەلەدى.
قازاقستان مۇسىلماندارى ءدىني باسقارماسى ەلىمىزدەگى ىرگەلى زەرتتەۋ ورتالىقتارىنىڭ ءبىرى بولىپ سانالاتىن «ۇلتتىق عارىشتىق زەرتتەۋلەر مەن تەحنولوگيالار ورتالىعى» مەكەمەسىنەن جاڭا ايدىڭ كورىنۋىنە قاتىستى رەسمي مالىمەت سۇراتتى. اتالمىش مەكەمە 16 مامىردا استرونوميالىق قۇرالدار كومەگىمەن جاڭا ايدى كورۋگە بولاتىنىن مالىمدەدى.
وسىعان وراي, قمدب عۇلامالار كەڭەسى شاريعي ۇكىم مەن وتاندىق استرونوميالىق عىلىمي زەرتتەۋ ناتيجەسىن نەگىزگە الا وتىرىپ: «17 مامىر - رامازان ايىنىڭ ءبىرىنشى كۇنى», - دەگەن شەشىم قابىلدادى.