ماڭعىستاۋ وبلىسى ىشكى ىستەر دەپارتامەنتىنىڭ عيماراتى الدىنداعى الاڭدا اعىمداعى جىلعى 05 مامىردا «وتان قورعاۋشىلار» مەن «جەڭىس كۇنىنە» ارنالعان سالتاناتتى شارا ءوتتى. مەرەكەلىك شاراعا ۇلى وتان سوعىسى مەن ىشكى ىستەر ورگاندارىنىڭ ارداگەرلەرى, اۋعانستان سوعىسىنىڭ ارداگەرلەرى, ۇلتتىق-مادەني ورتالىعىنىڭ وكىلدەرى قاتىستى.
دەپارتامەنت باستىعى پوليتسيا پولكوۆنيگى ق.د.تايمەردەنوۆتىڭ باستاۋىمەن شەرۋلىك توپ قىزمەت بابىندا قازا بولعان ارىپتەستەرىمىزگە ورناتىلعان ەسكەرتكىشكە گۇل شوقتارىن قويۋ ءراسىمىن جاسادى.
- 9 مامىردى اتاپ ءوتۋ تەك ءداستۇر عانا ەمەس, بۇل ءبىزدىڭ بوستاندىعىمىزدى قورعاعانداردىڭ الدىندا ولاردىڭ باتىلدىعى مەن ەرلىگىنە باس ءيىپ, شىنايى ريزاشىلىعىمىزدى ءبىلدىرۋ. بۇگىنگى تاڭدا, اسىرەسە جەڭىس كۇنى مەن وتان قورعاۋشىلار كۇنىنىڭ قارساڭىندا بىزدەر بەيبىت ءومىردىڭ قۇندىلىعىن جاقسى سەزىنۋىمىز قاجەت دەپ بىلەمىن. اكەلەرىمىز بەن اتالارىمىزدىڭ قاھارماندىعى مەن ەرلىك ىستەرىن ەسكە الىپ, جاۋىنگەرلىك كۇزەتتە وتانىمىزدىڭ قاۋىپسىزدىگىن قامتاماسىز ەتىپ, بەيبىت ءومىر مەن ەل تىنىشتىعىن ساقتايتىن ادال ۇلدارىمىزدى ماقتان تۇتامىز. اسكەري قىزمەت ءاردايىم قاسيەتتى بورىش, ءاربىر ازامات ءۇشىن ادالدىقتىڭ, ەرلىك پەن جانقيارلىقتىڭ مەكتەبى بولدى.بەيبىت كەزەڭدە ءوز ءومىرىن وتانىن قورعاۋدىڭ كۇردەلى ماماندىعىنا ارناعان جانە بۇگىنگى كۇنى ەلىمىزدىڭ اسكەري كۇشى مەن قورعانىس قابىلەتىن ارتتىرۋ جولىندا قىزمەت اتقاراتىن بارلىق ازاماتتارىمىزدى شىن جۇرەكتەن قۇتتىقتايمىز!-دەدى ماڭعىستاۋ وبلىسىنىڭ ءىىد باستىعى پوليتسيا پولكوۆنيگى قانات تايمەردەنوۆ.
شارا بارىسىندا ىشكى ىستەر مينيسترلىگىنىڭ بۇيرىعىمەن قىزمەتتىك مىندەتتەرىن ادال ورىنداپ, جۇمىستا جەتكەن جەتىستىكتەرى ءۇشىن بىرقاتار دەپارتامەنت قىزمەتكەرلەرى «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىمەن, «ىشكى ىستەر ورگاندارىنىڭ ۇزدىگى» توسبەلگىسىمەن, قازاقستان رەسپۋبليكاسى ءىىم-ءنىڭ «قۇرمەت گراموتاسىمەن»,قازاقستان رەسپۋبليكاسى ءىىم-ءنىڭ «گراموتاسىمەن», قازاقستان رەسپۋبليكاسى ىشكى ىستەر مينيسترلىگىنىڭ العىس حاتىمە ماراپاتتالدى. سونداي-اق, ىشكى ىستەر سالاسىندا ۇزاق جىل قىزمەت جاساعان كۇزەت قىزمەتىن باقىلاۋ بولىمشەسىنىڭ باستىعى پوليتسيا پولكوۆنيگى لوبيان زوگراب سەدراكوۆيچ پەن جەرگىلىكتى پوليتسيا قىزمەتى باستىعىنىڭ ورىنباسارى پوليتسيا پولكوۆنيگى سادۋوۆ ورازباي جومارت ۇلىن سالتاناتتى تۇردە زەينەتكەرلىككە شىعارىپ سالۋ ءراسىمى وتكىزىلدى.
جيىن سوڭىندا قۇتتىقتاۋ ءسوز العان ماڭعىستاۋ وبلىسىنىڭ ىشكى ىستەر دەپارتامەنتى ارداگەرلەر كەڭەسىنىڭ توراعاسى جاريەۆ ناعاشىباي ارداگەرلەردى بۇگىنگى مەرەكەمەن قۇتتىقتاپ, زور دەنساۋلىق, بىرلىك پەن تىنىشتىق تىلەدى.
«وتان قورعاۋشىلار كۇنى» مەن «جەڭىس كۇنىنە» وراي وتكىزىلگەن سالتاناتتى شارا اقتاۋ قالاسى ىشكى ىستەر باسقارماسىندا جالعاسىن تاپتى.
اتاۋلى مەرەكە شاراسى اقتاۋ قالاسى ىشكى ىستەر باسقارماسىنىڭ ءبىرىنشى باسشىسى ميليتسيا پولكوۆنيگى ن.قاناەۆتىڭ ەسكەرتكىشىنە گۇل شوقتارىن قويۋدان باستالدى. باسقارما قىزمەتكەرلەرى مەن مەرەكە قوناقتارى ۇلى وتان سوعىسىندا قازا تاپقاندار مەن قىزمەتتىك بورىشىن اتقارۋ كەزىندە قازا تاپقانداردى ءبىر مينۋت ۇنسىزدىكپەن ەسكە الدى.
سالتاناتتى جيىندا 8 قىزمەتكەر انت قابىلداپ, قىزمەتتىك مىندەتتەرىن ادال اتقارعانى ءۇشىن ء ىىد-ءنىڭ «قۇرمەت گراموتاسىمەن» 2 قىزمەتكەر, «العىس حاتىمەن» 2, قىزمەتكەر ماراپاتتالىپ, 2 قىزمەتكەرگە «العىس» جاريالاندى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى