قوستانايلىق فەرمەرلەر سۋبسيدياعا ءوتىنىش بەرە الماي وتىر

«سۋبسيدياعا ەلەكتروندى ءوتىنىش بەرۋ كروسسۆورد ويىنى سياقتى. كىم كەزدەيسوق شەشسە سول سۋبسيدياعا قول جەتكىزەدى, كىم شەشە   الماسا تۇكسىز قالادى» دەدى كەڭەس وتىرىسىندا كەلگەن فەدوروۆ اۋدانىنداعى شارۋا قوجالىعىنىڭ جەتەكشىسى  يۋري مالىشكو. ول اڭگىمە  كاسىپكەردىڭ سەرۆيسپەن جۇمىس ىستەي المايتىندىعىندا ەمەس, minagro.kz پورتالىنىڭ  دۇرىس جۇمىس ىستەمەيتىندىگىندە ەكەندىگىن ايتتى.

 «كاسىپكەرلەردىڭ مالىمەتىنشە, جەر تەلىمى 300 گەكتار بولسا, ول  جەر كاداسترى مالىمەتتەرى بازاسىندا 0,2 گەكتار دەپ كورسەتىلەدى. بۇل بازادا جەر تەلىمىنىڭ ءبىر بولەگى كورسەتىلمەي قالادى. سونداي-اق 2003 جىلعا دەيىن مەملەكەتتىك جەر اكتىسىن گەوگرافيالىق كوورديناتىن بەكىتپەي, شەكاراسىن بەلگىلەمەي بەرگەن» دەدى قوستاناي وبلىستىق كاسىپكەرلەر پالاتاسىنىڭ ەكسپەرتى تەڭىز قاباقوۆ. سوندىقتان اۋداندىق اكىمدىكتەر كاسىپكەرلەرگە جەر تەلىمى تۋرالى جاڭا ۇلگىدەگى اكت الۋدى ۇسىنادى. جەر كاداسترى دەپارتامەنتى تالاپ ەتىپ وتىرعان جەرگە ورنالاستىرۋ جوباسى كاسىپكەرلەرگە 80000 تەڭگەگە تۇسەدى.

«اۋدان اكىمدەرى شارۋا قوجالىقتارىن بىرىكتىرىپ, شارۋاشىلىقتاردى ىرىلەندىرۋدە كوپ جۇمىس ىستەدى. فەدوروۆ اۋدانىندا 300 شارۋاشىلىقتان قازىر   قازىر 70-ءى قالدى. قازىر سول 70 شارۋاشىلىقتىڭ بارلىعى دا  كەرەعار قيىنشىلىقپەن بەتبە-بەت كەلىپ وتىر. ولاردىڭ بارلىعى   دا بين بويىنشا  ارىزىن وتكىزە الماي ءجۇر» دەدى مالىشكو.

 كاسىپكەرلەردىڭ قۇقىن قورعاۋ جونىندەگى وبلىستىق كەڭەستىڭ توراعاسى ۆلاديمير شاكۋن جەرگىلىكتى جەردە قالىپتاسىپ وتىرعان جاعدايدى كاسىپكەرلەردىڭ ۇلتتىق پالاتاسىنا, اۋىل شارۋاشىلىعى مينيسترلىگىنە جانە وزگە دە مۇددەلى قۇرىلىمدارعا  جەتكىزۋدى ۇسىندى. سونىمەن قاتار جەر اكتىسىن وزگەرتۋ ءىسىن سارالاۋ ءۇشىن  ونى مەملەكەتتىك قىزمەت جانە سىبايلاس جەمقورلىققا قارسى ءىس-قيمىل جونىندەگى وبلىستىق دەپارتامەنتىنە جىبەرۋدى ۇيعاردى.

«بۇل جاعدايدى كاسىپكەرلەردىڭ پروبلەمالىق ماسەلەلەرى تىزىمىنە ەنگىزەتىن بولامىز» دەپ كەڭەستى تۇجىرىمدادى قوستاناي وبلىستىق كاسىپكەرلەر پالاتاسىنىڭ ديرەكتورى مۇرات ابەنوۆ.

ء نازيرا جارىمبەت,

«ەگەمەن قازاقستان»

قوستاناي