اتىراۋدا قىسقى سپورت تۇرلەرى جاقسى دامىپ كەلەدى. وبلىستىق دەنە شىنىقتىرۋ جانە سپورت باسقارماسىنىڭ باسشىسى ازامات بەكەتتىڭ ايتۋىنشا, وڭىردە 3 پەن 14 جاس ارالىعىنداعى 60 بالا مانەرلەپ سىرعاناۋمەن اينالىسادى.
جاس سپورتشىلارعا مانەرلەپ سىرعاناۋدىڭ قىر-سىرىن وليمپيا ويىندارىنىڭ جۇلدەگەرى دەنيس تەننىڭ وزىنەن ۇيرەنۋگە مۇمكىندىك تۋدى. مۇز ايدىنىندا وتكەن شەبەرلىك سىنىبىن 500-دەن استام اتىراۋلىق كەلىپ تاماشالادى.
– بالالاردىڭ مانەرلەپ سىرعاناۋعا دەگەن قۇلشىنىسىنا ريزا بولدىم, – دەيدى دەنيس تەن. – وبلىس باسشىلىعى تاراپىنان سپورتقا وڭ كوزقاراس بار ەكەن. بالالارعا ساپالى جاتتىعۋ جۇمىستارىنا قاجەت جاعدايدىڭ ءبارى جاسالعان. وسى شەبەرلىك سىنىبى جاس سپورتشىلارعا جىگەر بەرەدى دەگەن سەنىمدەمىن.
كەزدەسۋدە اتىراۋلىق مانەرلەپ سىرعاناۋشىلار وليمپيادا جۇلدەگەرى الدىندا ونەرلەرىن كورسەتىپ, باعىت-باعدار الدى. اتىراۋداعى مۇز سارايىندا وقۋشىلار مانەرلەپ سىرعاناۋدى تەگىن ۇيرەنەدى. ولار ءتۇرلى دەڭگەيدەگى جارىستاردا وزا شاۋىپ بايگە الىپ ءجۇر.
باقىتگۇل باباش,
«ەگەمەن قازاقستان»
اتىراۋ