قازاقستان سىرتقى ىستەر ءمينيسترى قايرات ءابدىراحمانوۆ قىتاي حالىق رەسپۋبليكاسىنا رەسمي ساپارمەن بارىپ, قىتاي مەملەكەتتىك كەڭەسىنىڭ مۇشەسى, سىرتقى ىستەر ءمينيسترى ۆان يمەن ەكى جاقتى كەلىسسوزدەر وتكىزدى.
بايىپتى كەزدەسۋدىڭ بارىسىندا سىرتقى ساياسات ۆەدومستۆولارىنىڭ باسشىلارى قازاقستان-قىتاي قارىم-قاتىناستارىنىڭ كەڭ اۋقىمدى ماسەلەلەرىن تالقىلادى. قازاقستان پرەزيدەنتى نۇرسۇلتان نازارباەۆتىڭ قىتايعا جاسايتىن الداعى ساپاردىڭ دايىندىعىنا جانە ونىڭ شانحاي ىنتىماقتاستىق ۇيىمىنىڭ سامميتىنە قاتىسۋىنا, سونداي-اق ءارتۇرلى دەڭگەيلەردەگى ەكى جاقتى بايلانىستارعا, سونىڭ ىشىندە ساۋدا-ەكونوميكالىق, ينۆەستيتسيالىق, عىلىمي-تەحنيكالىق, مادەني-گۋمانيتارلىق جانە باسقا دا باعىتتاردى قامتيتىن ىنتىماقتاستىق جونىندەگى بىرلەسكەن كوميتەتى بويىنشا بايلانىستارعا ەرەكشە كوڭىل ءبولىندى.
تاراپتار ەكى ەل ازاماتتارىنىڭ ءوزارا ساپارلارىمەن جانە ولاردىڭ قۇقىقتارىن قورعاۋمەن, ترانسشەكارالىق سۋ كوزدەرىن ۇتىمدى پايدالانۋمەن بايلانىستى ماسەلەلەردى قاراستىردى. تاياۋ ۋاقىتتا كونسۋلدىق قىزمەتتەر ارقىلى سىمارالىق كونسۋلتاتسيالاردى وتكىزۋگە ۋاعدالاستى.
ق.ءابدىراحمانوۆ قازاقستان ترانزيتتىك-كولىكتىك الەۋەتتى ىسكە اسىرۋ, قىتايدان قازاقستان ارقىلى ەۋروپاعا جانە تاياۋ شىعىسقا كونتەينەرلىك تاسىمالداردىڭ كولەمىن ارتتىرۋ اياسىندا «نۇرلى جول» باعدارلاماسى مەن ء«بىر بەلدەۋ – ءبىر جول» قىتايلىق باستاماسىن ءبىر-بىرىمەن تۇيىندەستىرۋدى ودان ءارى بەلسەندى جالعاستىراتىنى تۋرالى ايتتى.
تاراپتار وندىرىستىك قۋاتتى دامىتۋ باعدارلاماسىن ودان ءارى قارقىندى ىسكە اسىرۋعا مۇددەلەرىن ءبىلدىردى. بۇگىنگى كۇنى جالپى سوماسى 27 ميلليارد دوللاردى قۇرايتىن 51 جوبا بويىنشا جۇمىس اتقارىلۋدا, سونىڭ ىشىندە 158 ميلليون دوللارعا 5 جوبا ىسكە قوسىلدى. قازاقستان اۋىل شارۋاشىلىعى ونىمدەرىن قىتاي نارىعىنا جەتكىزىلىمىنىڭ نومەنكلاتۋراسىن كەڭەيتۋ وتە ماڭىزدى بولىپ تابىلادى.
سونىمەن قاتار, مينيسترلەر ينۆەستيتسيالار, ەنەرگەتيكا, قارجى, شەكارا ماڭىنداعى ساۋدا سالالارىنداعى ىنتىماقتاستىقتى نىعايتۋ, «قورعاس» شەكارا ماڭى ىنتىماقتاستىق حالىقارالىق ورتالىعى قىزمەتىنىڭ تيىمدىلىگىن ارتتىرۋ بويىنشا كەلەسى قادامداردى تالقىلادى. 2017 جىلى قىتاي قازاقستاننىڭ ەڭ ءىرى سىرتقى ساۋدا ارىپتەسى بولدى. ەلىمىزدىڭ باسقا مەملەكەتتەرمەن ساۋدا اينالىمىنىڭ جالپى كولەمىندەگى قحر-نىڭ ۇلەسى 17,4% قۇرايدى. ەكى جاقتى ساۋدا كولەمى 32,6% - عا ارتىپ, 10,5 ميلليارد دوللارعا جەتتى.
«استانا» حالىقارالىق قارجى ورتالىعى, «جاسىل تەحنولوگيالارى» مەن ينۆەستيتسيالىق جوبالارىنىڭ حالىقارالىق ورتالىعى جانە IT-ستارتاپتار تەحنوپاركى قىزمەتىنىڭ ىسكە قوسىلۋ اياسىندا قازاقستان-قىتاي ىنتىماقتاستىعىنىڭ كەلەشىگىنە ەرەكشە نازار اۋدارىلدى.
مادەني-گۋمانيتارلىق بايلانىستاردى كەڭەيتۋدىڭ, تۋريزم, دەنساۋلىق ساقتاۋ, بۇقارالىق اقپارات قۇرالدارى جانە باسقا دا سالالارداعى ءوزارا ءىس-قيمىلدىڭ ماڭىزدىلىعى اتاپ ءوتىلدى.
مينيسترلەر وزەكتى حالىقارالىق جانە وڭىرلىك ماسەلەلەر بويىنشا, سونىڭ ىشىندە سيرياداعى, اۋعانستانداعى جاعدايلار بويىنشا جان-جاقتى پىكىر الماستى. كوپجاقتى قۇرىلىمداردا, سونىڭ ىشىندە شىۇ, اوسشك جانە بۇۇ اياسىندا ۇيلەستىكتى جالعاستىرۋ نيەتتەرىن راستادى.
سونىمەن قاتار, ساپار بارىسىندا ق.ءابدىراحمانوۆ بەيجىڭنىڭ «چاويان» ورتالىق پاركىندەگى اباي قۇنانباەۆتىڭ ەسكەرتكىشىنە گۇل شوعىن قويىپ, قازاقستاننىڭ قىتايداعى ەلشىلىگىنىڭ قولداۋىمەن قىتايدا العاش رەت قۇرىلعان «بالدىرعان» قازاق وقۋ ورتالىعىنىڭ اشىلۋىنا قاتىستى.