حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا قازاقستان جازۋشىلار وداعىنىڭ مۇشەسى, حالىقارالىق «شابىت» فەستيۆالىنىڭ لاۋرەاتى, جازۋشى-جۋرناليست ميرا شۇيىنشاليەۆا «تۇماداي تۇنىق, تاۋلارداي زاڭعار» اتتى شىعارماشىلىق كەشىن وتكىزدى.
جەرگىلىكتى جازۋشىنىڭ اۆتورلىق كەشىنە قازاقستان جازۋشىلار وداعى باسقارماسى توراعاسىنىڭ ورىنباسارى مەرەكە قۇلكەنوۆ, جازۋشى-دراماتۋرگ دۋلات يسابەكوۆ جانە م.شۇيىنشاليەۆا شىعارماشىلىعىن زەرتتەگەن عالىم, م.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى, پروفەسسور گۇلجيھان وردا ارنايى كەلىپتى. مەيماندار مەن مەرەيتوي يەسىن ارنايى قابىلداپ, قۇرمەت كورسەتكەن باتىس قازاقستان وبلىسىنىڭ اكىمى التاي كولگىنوۆ وڭىردەگى ادەبيەتتىڭ دامۋى, شىعارماشىلىق ورتا تۋرالى دا وي ءبولىستى.
ميرا حامزاقىزىنىڭ شىعارماشىلىق كەشى تەاتر فويەسىندەگى كىتاپ كورمەسىنەن باستالدى. كەشتىڭ العاشقى بولىگىندە اۆتوردىڭ «شۇبەرەك قۋىرشاق», ء«ۇش تومپەشىك», «قاۋىرسىن گۇل», «وكىنىش», «تۇياق», «تاقسىرەت» شىعارمالارىنان جاس وقىرماندار – قازاق تەاترىنىڭ ارتيستەرى مەن ستۋدەنتتەر مونولوگ ورىندادى. وسى كەشتە اۆتوردىڭ «ار ازابى» اتتى جاڭا كىتابىنىڭ تۇساۋى كەسىلدى.
– قازىرگى قازاق ادەبيەتىندە پروزا جانرىنا قالام تارتىپ جۇرگەن قىزدار ساۋساقپەن سانارلىق. ءشاربانۋ قۇماروۆا, ءشاربانۋ بيسەنوۆالاردىڭ سوڭىنان ەرىپ كەلە جاتقان جازۋشى قىزداردىڭ ءبىرى وسى – ميرا شۇيىنشاليەۆا. ميرا شۇيىنشاليەۆانى قازىرگى قازاق ادەبيەتىنىڭ بەلدى وكىلى دەۋگە بولادى. قالامگەردىڭ شىعارمالارىنان قازىر ءوزىمىز ءومىر ءسۇرىپ جاتقان كەزەڭدەگى زامانداستارىمىزدىڭ قيلى تاعدىرىن كورۋگە بولادى. ادەبيەتتە قالىپتاسقان ار ءىلىمى – ميرا شىعارمالارىنىڭ نەگىزگى وزەگى. بۇعان دەيىن جارىق كورگەن شىعارمالارىنداعى كەز كەلگەن كەيىپكەرىن الىپ قاراساڭىز دا, تۇساۋى كەسىلگەلى وتىرعان «ار ازابى» جيناعىنا ەنگەن شىعارمالارىنىڭ نەگىزگى كەيىپكەرلەرىنىڭ ءبارى دە ار ازابىنان وتكەن, ار سوتىندا ءوز جاۋاپكەرشىلىگىن كوتەرە بىلگەن كەيىپكەرلەر, - دەيدى عالىم گۇلجيھان وردا.
كەشتە ميرا حامزاقىزى وقىرماندارىنىڭ ساۋالدارىنا جاۋاپ بەرىپ, ءوزىنىڭ كەلەشەك شىعارماشىلىق جوسپارلارىمەن ءبولىستى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن ايباتىر نۇراش